Sigui pa e contenido

Sigui pa e index

2 Yudansa pa Resolve Problema

2 Yudansa pa Resolve Problema

Algun problema den bida tin tendencia di persisti, tin bes pa hopi aña. Kisas nan por hasta cria raiz prome cu bo realisa mes cu tin un problema. Bijbel ta duna nos sabiduria pa resolve e problemanan persistente y frustrante ey? Ban wak algun ehempel.

PREOCUPA DI MAS

Rosie a bisa: “Mi tabata preocupa henter ora. Den mi cabes mi tabata mira mi problemanan mas grandi cu nan ta en realidad y semper mi tabata imagina e pio cos cu por sosode.” Cua textonan a yud’e? Un di nan ta Mateo 6:34: “No sea nunca ansha pa e dia di mañan, pasobra e dia di mañan lo tin su mes inkietudnan. Cada dia tin su mes problemanan.” Awor Rosie ta bisa cu e palabranan ey di Hesus a yud’e stop di preocupa tocante loke lo por sosode mañan. Rosie a sigui bisa: “Mi tabatin suficiente problema caba. Pakico worry tocante algo cu no a sosode y cu probablemente lo no sosode tampoco?”

Yasmine tambe a cuminsa sinti cu ansiedad tabata tumando control di su bida. E di: “Mi tabata yora varios biaha pa siman, y tin bes mi no por a drumi anochi. Pensamentonan negativo tabata caba cu mi.” Cua texto a yud’e? El a menciona 1 Pedro 5:7: “Tira tur boso inkietud riba [Dios], pasobra e ta interesa den boso.” Yasmine a bisa: “Mi a sigui haci oracion y Jehova a contesta mi oracionnan. Mi a sinti comosifuera un carga pisa a kita for di mi lomba. Cada pasa tanto tempo, mi pensamentonan negativo sa bolbe, pero awor mi sa con pa deal cu nan.”

 LAGA PA DESPUES LOKE BO POR HACI AWOR

Un hoben cu yama Isabella a bisa: “Ami kier sa cu mi ta busca excuus pa pospone loke mi tin cu haci pasobra e ta algo cu mi a hereda; mi tata tambe ta haci esey. Mi ta keda sin haci loke ta importante pa mi por keda sin haci nada; mi ta djis relax y wak television. Esey ta un mal custumber, pasobra e ta duna bo mas stress y pone cu bo no ta haci nada bon.” Un principio cu a yuda Isabella ta esun na 2 Timoteo 2:15, cu ta bisa: “Haci tur bo esfuerso pa presenta bo mes na Dios como un hende aproba, un trahador cu no tin nada di tene berguensa di dje.” Isabella a bisa: “Mi no tabata kier pa Jehova sinti berguensa di mi trabou djis pasobra mi a laga pa despues loke mi por a haci di biaha.” El a mehora hopi.

Kelsey a bisa mescos: “Mi tabatin un proyecto cu mester a keda cla un cierto fecha pero mi a lag’e te na ultimo momento. Mi tabata yora, perde soño y preocupa. Esey no tabata bon pa mi.” Kelsey a haya yudansa na Proverbionan 13:16: “Tur hende prudente ta trata cu conocemento, ma un bobo ta manifesta locura.” El a splica loke e texto aki a siñ’e despues cu el a medita riba dje: “Ta sabi pa ta practico y plania delanta. Awor mi ta pone cosnan pendiente riba mi schedule di trabou den un schrift riba mi lessenaar, y esey ta yuda mi plania sin laga nada te na ultimo momento.”

SOLEDAD

Kirsten a conta: “Mi esposo a bay laga mi cu cuater yiu chikito.” Cua principio biblico a yud’e? Proverbionan 17:17 cu ta bisa: “Un amigo ta stima tur ora bay, y un ruman ta naci pa tempo di adversidad.” Kirsten a busca yudansa den congregacion. Kico el a haya? “Mi amigonan a rondona mi den diferente manera. Algun a laga saco di compras y flor na mi porta di cas. Tres bes henter un grupo grandi di ruman a yuda ami cu mi yiunan muda. Un hende a yuda mi haya trabou. Mi amigonan semper tabat’ey pa mi.”

Delphine, cu nos a menciona caba, tambe a lucha cu soledad. Despues cu el a perde tur cos, e ta conta: “Mi a sinti comosifuera mi tabata wak tur hende bibando nan bida hunto mientras cu ami tabata mi so y infeliz.” Un texto cu a yud’e ta Salmo 68:6: “Dios ta provee un cas pa e solitario.” El a splica: “Mi tabata sa cu e texto no tabata kiermen djis un cas literal aworaki. Mas bien, mi a bin compronde cu Dios ta ofrece nos un cas spiritual, un luga di berdadero siguridad caminda bo por haya berdadero amistad y yudansa emocional cerca hende cu ta stima Jehova. Pero mi tabata sa cu lo mi no por hala cerca hende si mi no hala cerca Jehova prome. Pues, Salmo 37:4 a yuda mi cu esey: ‘Deleita bo mes den SEÑOR, y e lo duna bo e deseonan di bo curason.’”

El a conclui: “Mi a realisa cu mi mester pega mas firmemente na Jehova. E ta e mihor amigo cu un hende por tin. Despues mi a traha un lista di actividad cu lo mi por disfruta di dje cu otro hende, di manera cu mi por forma amistad cu hende cu tambe ta stima Jehova. Mi a siña mira e bon den otro hende y trata nan comosifuera ta bon so mi por mira den nan.”

Ta claro cu amigonan cu ta sirbi Dios tambe ta imperfecto. Testigonan di Jehova ta lucha cu problema mescos cu tur otro hende. Pero e siñansanan di Bijbel ta motiva hende pa yuda otronan ki ora cu ta posibel. Ta sabi pa haya amistad asina. Sinembargo, principionan di Bijbel por yuda nos tambe cu problema cu no tin solucion actualmente, manera por ehempel maleza cronico y tristeza?

Conseho di Bijbel por yuda bo haya amigo fiel