Sigui pa e contenido

Sigui pa e index

Siñansa di Bijbel Cu No Ta Bira Ouderwets

Siñansa di Bijbel Cu No Ta Bira Ouderwets

IMAGINA LO SIGUIENTE: Bo ta bishitando un museo yen di obra di antiguedad. Mayoria ta tur daña y gasta. Algun di nan falta pidanan grandi. Pero, un di nan ta remarcabel. E ta intacto. Cada detaye di su diseño complica y detaya ta claramente bisto. Bo ta puntra e guia: “Esun aki ta mas nobo cu e otronan?” E ta responde: “No, e ta mas bieu cu casi tur y nunca el a ser restaura.” Bo ta puntr’e: “Acaso e tabata bon warda na un luga?” Bo guia ta bisa: “No. Esun aki a pasa door di bientonan fuerte y awasero. Anto hopi vandalista a purba dañ’e.” Kisas lo bo keda boca habri y puntra: “Ta di kico e ta traha anto?”

Den un sentido, Bijbel ta manera e obra remarcabel ey. E ta un di e bukinan mas bieu. Claro cu tin mas buki cu tambe ta hopi bieu, pero mescos cu obranan antiguo, mayoria di nan ta tur daña y gasta. Loke nan ta bisa tocante temanan cientifico, por ehempel, a keda refuta pa conocemento nobo y echonan comproba. Mayoria di bes, nan consehonan medico ta peligroso. Y hopi scritura antiguo no ta completo mas tampoco. Algun parti a daña of a bay perdi.

Pero Bijbel ta sobresali pasobra e ta diferente. Hende a cuminsa skirbi Bijbel mas cu 35 siglo pasa, pero toch e ta intacto. Y a traves di siglonan, maske hende a ataca Bijbel bes tras bes—nan a kim’e, prohibie y menospreci’e—loke Bijbel tin di bisa a keda intacto. Y informacion cientificamente comproba cu a sali no ta indica cu loke Bijbel ta bisa no ta aplicabel mas, al contrario, gran parti di loke Bijbel ta bisa tabata hopi adelanta pa su tempo.—Wak e cuadro “Ouderwets of Avansa pa Su Tempo?

 NORMA- Y BALORNAN CU NOS MESTER AWE

Pero kisas bo ta puntra bo mes: Siñansa di Bijbel ta realmente practico pa nos tempo? Pa contesta e pregunta ey, puntra bo mes: Kico ta e problemanan di mas grave cu humanidad ta enfrenta awe? Cua di nan ta e problema cu mas ta spanta bo? Kisas bo ta pensa riba guera, polucion, crimen of corupcion. Awor, ban wak algun siñansa basico di Bijbel. Segun cu bo ta analisa nan, puntra bo mes: Si hende biba segun e norma- y balornan aki, mundo lo ta un mihor luga pa biba?

AMOR PA PAZ

“Feliz ta esnan pacifico, ya cu nan lo ser yama yiu di Dios.” (Mateo 5:9) “Si ta posibel, te asina leu cu ta depende di boso, keda na paz cu tur hende.”—Romanonan 12:18.

MISERICORDIA Y PORDON

“Feliz ta esnan misericordioso, ya cu nan lo haya misericordia.” (Mateo 5:7) “Sigui soporta otro y pordona otro libremente, hasta si un di boso tin motibo pa keha un otro. Mescos cu Jehova * a pordona boso libremente, boso tambe mester haci mescos.”—Colosensenan 3:13.

UNION RACIAL

“For di un hende [Dios] a traha tur nacion, pa nan biba riba henter e superficie di Tera.” (Echonan 17:26) “Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.”—Echonan 10:34, 35.

RESPET PA PLANETA TERA

“SEÑOR Dios a coge e homber y a pon’e den e Hofi di Eden pa cultiv’e y cuid’e.” (Genesis 2:15) Dios lo “caba cu esnan cu ta caba cu e Tera.”—Revelacion 11:18.

ODIA GOLOSIDAD Y INMORALIDAD

“Warda boso di tur sorto di golosidad, pasobra hasta ora un hende tin na abundancia, su bida no ta depende di loke e tin.” (Lucas 12:15) “No menciona fornicacion ni ningun sorto di impureza ni golosidad mes meymey di boso, pasobra esaki no ta apropia pa hende santo.”—Efesionan 5:3.

SER HONESTO Y TRAHA DURO

“Nos kier comporta nos mes na un manera honesto den tur cos.” (Hebreonan 13:18) “Laga esun cu ta horta, no horta mas; mas bien, lag’e traha duro.”—Efesionan 4:28.

TA IMPORTANTE PA YUDA HENDE DEN NECESIDAD

“Papia palabranan di consuelo cu esnan cu ta deprimi, apoya e debilnan, tene pasenshi cu tur.” (1 Tesalonicensenan 5:14) “Cuida huerfano y viuda cu ta pasa den tribulacion.”—Santiago 1:27.

Bijbel no ta djis duna un lista di e norma- y balornan ey. E ta siña nos tambe con pa balora nan y aplica nan den nos bida diario. Si mas hende aplica e siñansanan cu nos a menciona, lo tin menos problema na mundo, no ta berdad? Kiermen anto, principionan di Bijbel ta mas practico y al dia cu nunca prome. Pero con siñansanan di Bijbel por yuda bo aworaki mes?

CON BIJBEL POR YUDA BO AWE?

E homber di mas sabi na mundo a yega di bisa: “Sabiduria ta demostra pa medio di su obranan cu  e ta husto.” (Mateo 11:19) Bo no ta haya cu e palabranan ey tin sentido? E mihor manera pa bo test cu un conseho ta sabi ta door di aplic’e. Pues, kisas bo ta bisa: “Pero, si Bijbel ta un buki realmente practico, lo mi no mira resultado den mi bida? Con e por yuda mi enfrenta mi problemanan actual?” Ban wak un ehempel.

Delphine * tabata hiba un bida druk y satisfactorio. Pero diripiente el a cuminsa hay’e cu varios prueba. Su yiu muher teenager a muri, su matrimonio a kibra y el a hay’e cu problema financiero. E ta corda con e tabata sinti: “Mi no tabata sa mas ken mi ta sin mi yiu, sin mi casa y sin mi hogar. Mi a sinti un bashi: sin identidad, sin forsa y sin un proposito den bida.”

Nunca prome Delphine a compronde e berdad cu tin tras di e palabranan aki asina bon: “E dianan di nos bida ta setenta aña, of si hende tin hopi forsa, ochenta aña; toch nan orguyo no ta nada otro cu molester y pena, pasobra un djis el a pasa, y nos ta bula bay.”—Salmo 90:10.

Delphine a haya yudansa di Bijbel durante e temporada dificil aki. E manera cu Bijbel a yud’e ta remarcabel. Manera e siguiente tres articulonan  lo mustra, Bijbel a yuda hopi otro hende tambe ora nan a sigui su guia pa enfrenta nan problemanan. Nan a sinti cu Bijbel ta manera e obra cu nos a papia di dje na principio di e articulo aki. Tur e bukinan cu ta bira bieu y ouderwets no ta nada compara cu ne. Lo no ta pasobra, na moda di papia, Bijbel ta un buki diferente? Kisas ta pasobra e realmente ta contene e pensamentonan di Dios y no di hende?—1 Tesalonicensenan 2:13.

Kisas abo tambe ta haya cu bida ta cortico y yen di problema. Ora problema ta bira di mas pa bo, na unda bo ta bay pa haya consuelo, sosten y conseho confiabel?

Ban wak tres manera clave den cua Bijbel por resulta di ta practico den bo bida. E por siña bo con pa

  1. evita problema si ta posibel.

  2. resolve situacionnan dificil asina cu nan presenta.

  3. deal exitosamente cu situacionnan cu bo no por cambia.

E siguiente articulonan lo trata e tres puntonan aki.

^ par. 10 Bijbel ta bisa cu Dios su nomber ta Jehova.—Revelacion 4:11.

^ par. 24 Den e articulo aki y e tresnan cu ta sigui, nos a cambia algun di e nombernan.