Sigui pa e contenido

Sigui pa e index

E nomber di Dios ta skirbi masha hopi biaha den e manuscritonan original di Bijbel na idioma Hebreo di antes

 E PUNTO DI BISTA BIBLICO

E Nomber di Dios

E Nomber di Dios

Hopi hende ta dirigi nan mes na un manera respetuoso na Dios uzando titulonan manera Señor, Haltisimo, Allah of Dios. Pero Dios tin un nomber. Bo mester menciona su nomber?

Con Dios su nomber ta?

LOKE ALGUN HENDE TA BISA

 

Hopi hende cu ta bisa cu nan ta cristian ta kere cu Dios su nomber ta Hesus. Tin otro hende ta bisa cu ta un Dios Todopoderoso so tin, pesey no ta necesario pa menciona su nomber. Y tin otronan ta bisa cu no ta bon pa menciona Dios su nomber.

LOKE BIJBEL TA BISA

 

E nomber di e Dios Todopoderoso no ta Hesus pasobra Hesus no ta e Dios Todopoderoso. Eigenlijk, Hesus mes a siña su compañeronan den fe pa haci oracion na Dios. El a siña nan: “Tata, laga bo nomber sea santifica.” (Lucas 11:2) Y Hesus mes a bisa Dios den oracion: “Tata, glorifica bo nomber.”—Juan 12:28.

Den Bijbel, Dios ta bisa: “Ami ta Jehova. Esey ta mi nomber y lo mi no duna mi propio gloria na ningun otro.” (Isaias 42:8, NW) “Jehova” ta un traduccion na Papiamento di e cuater consonantenan Hebreo YHWH, cu ta representa e nomber di Dios. Bo ta haya e nomber di Dios mas o menos 7.000 biaha den e Scritura Hebreo. * Den Bijbel su nomber ta ser menciona mas cu cualkier otro titulo, manera “Dios”, “Todopoderoso” of “Señor”, y mas cu cualkier otro nomber, manera Abraham, Moises of David.

Ningun caminda den Bijbel Jehova Dios ta prohibi hende di menciona su nomber na un manera respetuoso. Y den Bijbel e sirbidornan di Dios tabata menciona su nomber masha hopi biaha. Nan a inclui e nomber di Dios den e nombernan cu nan a duna nan yiunan, manera Elias cu ta nifica “Mi Dios Ta Jehova” y Zacarias cu ta nifica “Jehova A Corda.” Y nan tabata menciona e nomber di Dios ora nan tabata combersa.—Ruth 2:4.

Dios kier pa nos menciona su nomber. Bijbel ta anima nos pa “gradici Jehova, [y] invoca su nomber.” (Salmo 105:1, NW) Bijbel hasta ta bisa cu Dios ta aproba “esnan cu ta pensa riba su nomber.”—Malakias 3:16, NW.

“Pa hende por sa cu abo, kende su nomber ta Jehova, abo so ta e Haltisimo riba henter Tera.”—Salmo 83:18, NW.

 Kico e nomber di Dios ta nifica?

Algun experto riba tereno di Bijbel ta kere cu e nomber Jehova ta nifica “E Ta Causa pa Bira.” Esey ta nifica cu Dios por bira of laga su creacion bira tur loke ta necesario pa e cumpli cu su boluntad. Ta solamente e Creador todopoderoso por cumpli cu loke su nomber ta nifica.

LOKE ESAKI TA NIFICA PA BO

 

Conoce e nomber di Dios ta cambia e punto di bista cu bo tin di Dios. Lo ta mas facil pa bo acerc’e. Acaso bo por tin un bon amistad cu un persona cu bo no sa su nomber? Y e echo cu Dios a laga bo conoce su nomber ta un prueba cu e kier pa bo hala cerca dje.—Santiago 4:8.

Bo por tin sigur cu Jehova Dios semper lo cumpli cu e nificacion di su nomber pasobra semper e ta haci tur loke cu e priminti. Pesey Bijbel ta bisa: “Esnan cu conoce bo nomber lo pone nan confianza den bo.” (Salmo 9:10) Bo ta haya e confianza ey segun cu bo ta siña cu Jehova su nomber ta estrechamente liga cu su cualidadnan, manera amor leal, misericordia, compasion y husticia. (Exodo 34:5-7) Esta bon pa sa cu Jehova semper ta cumpli cu su promesanan na harmonia cu su cualidadnan!

Sin duda ta un gran honor pa conoce e Dios Todopoderoso pa nomber. Esaki por habri caminda pa bo haya bendicionnan tanto awor como den futuro. Dios ta priminti: “Lo mi proteh’e, pasobra e conoce mi nomber.”—Salmo 91:14.

“Tur cu invoca e nomber di Jehova lo ser salba.”—Joel 2:32, NW.

E nomber di Dios traduci na varios idioma

^ par. 9 Hopi traduccion di Bijbel a saca e nomber di Dios y a reemplas’e cu e titulo “SEÑOR” cu letter capital, y tin otro traduccion cu ta menciona Dios su nomber solamente den cierto texto di Bijbel of den nota. Pero e New World Translation of the Holy Scriptures ta menciona e nomber di Dios masha hopi biaha.