Sigui pa e contenido

Sigui pa e index

Si bo pordona, bo no ta pusha palo bou di candela sino bo ta pag’e

 PA PAREHA CASA

4: Pordona

4: Pordona

LOKE ESAKI TA NIFICA

Pordona ta nifica cu bo no ta keda carga rencor pa e ofensa cu a ser cometi. Pero esey no ta nifica cu bo mester haci comosifuera cu ta algo chikito a sosode of cu nunca nada no a pasa.

PRINCIPIO DI BIJBEL: “Sigui soporta otro y pordona otro libremente, hasta si un di boso tin motibo pa keha un otro.”—Colosensenan 3:13.

“Ora bo ta stima un hende, bo ta pasa por halto di su imperfeccionnan y ta mira e esfuerso cu e persona ta haci pa mehora.”—Aaron.

DICON ESEY TA IMPORTANTE?

Pasobra si bo carga rencor, bo por causa daño fisico y emocional na bo mes, y na bo matrimonio.

“Un biaha mi casa a pidi mi despensa pa algo cu el a haci cu a hurt mi masha hopi mes. Tabata duro pa mi pordon’e. Pero finalmente mi a logra pordon’e, pero ta duel mi cu mi no a pordon’e mas lihe pasobra esey a causa tension innecesario den nos matrimonio.”—Julia.

LOKE BO POR HACI

PUNTRA BO MES:

E siguiente biaha cu bo casa hurt bo pa motibo di algo cu el a bisa of haci, puntra bo mes:

  • Mi ta mucho sensitivo?

  • E ofensa ta asina grandi cu e mester pidi mi pordon, of ta algo cu mi por djis pasa por halto di dje?

PAPIA CU OTRO RIBA LO SIGUIENTE:

  • Cuanto tempo ta dura pa nos pordona otro?

  • Kico nos por haci pa pordona otro mas lihe?

ALGUN SUGERENCIA

  • Ora bo casa hurt bo, no pensa cu el a hurt bo pa malo.

  • Purba hustifica e comportacion di bo casa; no lubida cu “nos tur ta trompica hopi biaha.”—Santiago 3:2.

“Ta facil pa pordona si boso tur dos ta fout, pero ta mas dificil pa pordona ora ta parce cu un di boso dos so ta fout. Bo mester ta realmente humilde pa bo pordona.”—Kimberly.

PRINCIPIO DI BIJBEL: “Sea lihe pa drecha asunto.”—Mateo 5:25.

Si bo carga rencor, bo por causa daño fisico y emocional na bo mes, y na bo matrimonio