Sigui pa e contenido

Sigui pa e index

Mescos cu un compas confiabel, normanan moral por yuda bo yiu dicidi kico pa haci

 PA MAYOR

7: Norma y Balor

7: Norma y Balor

LOKE ESAKI TA NIFICA

Norma y balor ta principionan personal cu un hende ta scoge pa aplica den su bida. Por ehempel, abo ta haci bo best pa ta honesto den tur cos? E ora ey probablemente lo bo haci bo best pa bo yiunan tambe ta honesto.

Ademas, lo bo kier siña nan cu ta importante pa traha duro, trata hende na un manera husto y mustra consideracion na nan. Un hende por desaroya e cualidadnan aki hopi mas mihor si e siña nan for di chikito.

PRINCIPIO DI BIJBEL: “Instrui un mucha den e caminda cu e mester cana, y hasta ora cu e bira bieu e lo no aparta su mes for di dje.”—Proverbionan 22:6.

DICON ESEY TA IMPORTANTE?

Den e mundo di tecnologia moderno, norma y balor ta hopi importante. Un mama cu yama Karyn a bisa: “Ki ora cu ta bo yiu por topa algo malo riba su aparato electronico. Nos yiunan por ta sinta banda di nos ta wak algo inapropia.”

PRINCIPIO DI BIJBEL: “Hende madura ... a entrena [nan capacidad di compronde] pa distingui loke ta bon for di loke ta malo.”—Hebreonan 5:14.

Ta importante pa pensa riba otro hende. Esaki ta encera uza palabranan di cortesia (manera, “por fabor” y “danki”) y mustra interes den otro hende; ya casi hende no ta haci esey mas pasobra nan ta parce di ta mas interesa den nan aparatonan electronico cu den hende.

PRINCIPIO DI BIJBEL: “Manera boso kier pa hende haci cu boso, boso mester haci mescos cu nan.”—Lucas 6:31.

LOKE BO POR HACI

Splica bo yiunan kico ta bo normanan moral. Por ehempel, tin estudio cu ta mustra cu tin mas chens cu teenagernan lo abstene di sex prome cu matrimonio si nan mayornan a siña nan bon cla cu e tipo di conducta ey ta malo.

UN SUGERENCIA: Uza algo cu a pasa recientemente pa cuminsa un combersacion tocante normanan moral. Por ehempel, si tin un noticia tocante un crimen, lo bo por bisa: “Esta horibel cu hende ta odia otro asina hopi! Ta kico bo ta kere a pone nan odia otro di e forma ey?”

“Ta hopi mas dificil pa yiunan scoge entre loke ta bon y loke ta malo si nan no sa kico ta bon y kico ta malo.”—Brandon.

Siña nan bon manera. Hasta mucha chikito por siña bisa “por fabor” y “danki” y mustra interes den otro hende. Segun e buki Parenting Without Borders, “Mas mihor nan compronde cu no ta nan so ta existi sino cu nan ta forma parti di algo mas grandi, es decir un famia, scol y comunidad, mas dispuesto nan lo ta pa haci actonan di bondad na bienestar di otro hende y no pa nan mes so.”

UN SUGERENCIA: Duna bo yiunan trabou pa haci paden y pafo di boso cas pa nan siña e balor di sirbi hende.

“Si nos yiunan ta haci trabounan di cas awor, nan no ta haya nan cu sorpresa ora nan bay biba riba nan mes. Nan lo a custumbra di cumpli cu nan responsabilidadnan caba.”—Tara.