Sigui pa e contenido

Sigui pa e index

Meta ta manera un mapa di cas, cu esfuerso e por bira realidad

 PA HOBEN

12: Metanan

12: Metanan

LOKE ESAKI TA NIFICA

Un meta ta mas cu djis un soño of algo cu bo ta desea pa cumpli. Pa alcansa bo meta, bo mester plania, bo mester ta flexibel y bo mester traha duro.

Meta por ta a corto plaso (por tuma dia of siman pa logra), a mediano plaso (luna) y a largo plaso (un aña of mas). Metanan cu ta a largo plaso por ser logra door di pone metanan a corto y mediano plaso.

DICON ESEY TA IMPORTANTE?

Ora bo alcansa bo metanan, esey por yuda bo haya mas confianza den bo mes, fortalece bo amistad cu otro hende y haya mas felicidad.

Confianza den bo mes: Ora bo pone metanan chikito y logra cumpli cu nan, bo ta haya mas confianza den bo mes pa traha riba metanan cu ta mas dificil pa alcansa. Bo ta hasta sinti mas confianza pa enfrenta retonan di tur dia, manera peer pressure.

Amistad: Hende gusta di ta rond di otro hende cu tin metanan, esta, esnan cu sa kico nan kier y ta traha duro pa logra esey. Ademas, un di e mihor maneranan pa fortalece un amistad ta ora bo ta traha cu un otro persona pa alcansa e mesun meta.

Felicidad: Ora bo pone un meta y bo alcans’e, bo ta sinti bon y feliz.

“Mi gusta pone meta. Metanan ta laga mi keda ocupa y ta duna mi gana pa sigui traha pa alcansa nan. Y ora mi logra alcansa mi meta, ta dushi pa wak bek y bisa: ‘Wauw, mi a logra!’”—Christopher.

PRINCIPIO DI BIJBEL: “Si bo keda warda te ora e biento y clima ta net bon, nunca lo bo no planta ni cosecha nada.”—Eclesiastes 11:4, Today’s English Version.

LOKE BO POR HACI

Sigui e consehonan aki pa pone meta y alcansa nan.

Scoge bo metanan. Traha un lista di meta cu lo bo kier logra. Y scoge cua lo bo kier traha riba dje prome, di dos, di tres, etcetera.

Plania. Haci lo siguiente pa cada meta:

  • Pone e fecha cu lo bo kier cumpli cu bo meta.

  • Pone e pasonan cu bo lo tuma riba papel.

  • Pensa ki problemanan bo por enfrenta y con bo por resolve nan.

Aplica. No warda te ora bo tin tur detaye pa cuminsa. Puntra bo mes, kico ta e prome cos cu mi por haci pa logra alcansa mi meta? Despues hacie. Wak bo progreso segun cu bo ta logra cada paso.

PRINCIPIO DI BIJBEL: “E plannan di hende balente siguramente ta conduci na abundancia [of ta duna bon resultado].”—Proverbionan 21:5.