Sigui pa e contenido

Sigui pa e index

Ki ehempel bo ta pone pa bo yiunan?

 PA MAYOR

8: Ehempel

8: Ehempel

LOKE ESAKI TA NIFICA

Mayornan cu ta pone bon ehempel ta haci loke nan ta bisa. Por ehempel, bo no por spera pa bo yiu ta honesto si e ta tende bo bisa: “Bis’e cu mi no t’ey” ora bo no kier atende un hende cu a bin cerca bo na cas.

“Un dicho popular ta ‘Haci loke mi ta bisa y no loke mi ta haci.’ Pero esey no ta funciona cu nos yiunan. Nan ta manera spons cu ta absorba tur loke nos ta bisa y haci, y si nos ta purba di siña nan algo cu nos mes no ta haci, nan ta ripara esey y nan lo bisa nos.”—David.

PRINCIPIO DI BIJBEL: “Abo cu ta predica: ‘No horta’, ta horta?”—Romanonan 2:21.

DICON ESEY TA IMPORTANTE?

Mayornan tin mas influencia riba nan yiunan chikito y hasta riba nan yiunan teenager cu cualkier otro hende, incluso mas cu esnan di nan mesun edad. Esey ta nifica cu bo ta den e mihor posicion pa guia bo yiunan den e caminda corecto, basta bo haci loke bo ta bisa.

“Nos por ripiti algo shen biaha y puntra nos mes si nos yiu a tende, pero djis un biaha cu nos no ta haci loke nos ta bisa, nos yiu lo laga nos sa esey. Yiunan ta presta atencion na tur loke nos ta haci, hasta ora nos ta pensa cu no ta asina.”—Nicole.

PRINCIPIO DI BIJBEL: “Sabiduria di ariba ta ... sin hipocresia.”—Santiago 3:17.

LOKE BO POR HACI

Puntra bo mes: Ki clase di programa ami ta wak? Con mi ta trata mi casa y mi yiunan? Ki tipo di amigo mi tin? Mi ta mustra interes den otro hende? Cu poco palabra, ami ta e tipo di persona cu mi ta desea pa mi yiunan bira?

“Ami cu mi esposo no ta pidi nos yiunan pa haci algo cu nos mes no ta haci.”—Christine.

Pidi disculpa ora bo haci fout. Bo yiunan sa caba cu bo no ta perfecto. Ora bo bisa “sorry” na momentonan apropia, tanto na bo casa como na bo yiunan, bo ta siña bo yiunan pa ta honesto y humilde.

“Ta importante pa nos yiunan tende nos bisa cu nos ta robes y pidi despensa, sino nan tampoco lo siña ta haci esey.”—Robin.

“Nos como mayor tin masha hopi influencia riba nos yiunan. Nos ehempel ta sumamente importante pasobra nan ta mir’e henter ora. Nos ehempel ta manera un buki cu tur ora ta habri; henter ora nan por siña algo for di dje.”—Wendell.