Sigui pa e contenido

Sigui pa e index

Siña traha duro ta mescos cu haci ehercicio, esey lo beneficia bo awor y den futuro

 PA HOBEN

11: Balente

11: Balente

LOKE ESAKI TA NIFICA

Hende balente no ta core pa trabou. Al contrario, nan gusta traha duro pa percura pa nan necesidadnan y pa yuda otro hende. Nan gusta traha hasta si otro hende ta haya cu e trabou no ta dje importante ey.

DICON ESEY TA IMPORTANTE?

Si nos gusta of no, bida ta yen di responsabilidad. Nos ta biba den un mundo unda cu hopi hende no gusta traha duro. Kiermen si nos ta balente, nos lo tin bentaha.—Eclesiastes 3:13.

“Mi a siña cu ora bo traha duro, bo ta haya un sintimento di orguyo y satisfaccion. E sintimento ey a yuda mi cu awor mi gusta traha. Ora bo tin custumber di traha duro, bo ta haya un bon reputacion.”—Reyon.

PRINCIPIO DI BIJBEL: “Den tur trabou tin ganashi.”—Proverbionan 14:23.

LOKE BO POR HACI

Si bo kier haya un punto di bista positivo di trabou, sigui e consehonan cu tin akibou.

Pone meta pa logra haci loke bo tin cu haci mas mihor. Sea cu bo ta haci trabou di cas, huiswerk of traha, dedica bo mes na e trabou cu bo ta haciendo. Y ora bo siña haci bo trabou bon, busca manera pa hacie mas lihe y mas mihor. Mas mihor bo ta den bo trabou, mas lo bo gust’ele.

PRINCIPIO DI BIJBEL: “Bo ta mira un hende cu habilidad den su trabou? E lo para dilanti di reynan; e lo no para dilanti di hende insignificante.”—Proverbionan 22:29.

Mira mas aya. Den casi tur caso, bo ta beneficia otro hende ora bo ta percura bon pa bo responsabilidadnan. Por ehempel, ora bo ta balente y ta haci bo trabounan di cas, bo ta haci e trabou na cas bira menos pisa pa e otro miembronan di bo famia.

PRINCIPIO DI BIJBEL: “Tin mas felicidad den duna cu den ricibi.”—Echonan 20:35.

Haci mas. En bes di haci solamente loke nan a pidi bo, purba di haci mas. Di e manera ey, abo tin control riba bo bida. Ta berdad cu lo bo traha mas e ora ey, pero lo ta pasobra abo mes kier y no pasobra nan a obliga bo haci esey.—Mateo 5:41.

PRINCIPIO DI BIJBEL: “Pa bo acto di bondad no sali forsa, sino di bo propio boluntad.”—Filemon 14.

Sea balansa. Ora un hende ta balente, e no ta floho pero tampoco adicto na su trabou. E ta zorg pa e ta balansa y ta haya goso den traha duro pero e ta gusta descansa tambe.

PRINCIPIO DI BIJBEL: “Un man yen di sosiego ta mihor cu dos mokete yen di trabou y coremento tras di biento.”—Eclesiastes 4:6.