Sigui pa e contenido

Sigui pa e index

 NAN A LOGRA ENFRENTA E RETO

Ricardo y Andres Ta Conta Nan Experencia

Ricardo y Andres Ta Conta Nan Experencia

Educacion basa riba Bijbel por cambia bida di hende. Ban considera dos ehempel: Ricardo y Andres.

RICARDO: Mi a join un gang ora mi tabatin 15 aña. Mi amigonan nobo tabatin un influencia grandi riba mi. Aunke esey por zona straño, mi meta den bida tabata pa pasa dies aña den prizon. Den mi bario nan tabata respeta y admira esnan cu a bay cera. Y ami kier a bira mescos cu nan.

Mi tabata hiba un bida inmoral, uza droga y mi tabata un persona violento. Un anochi mi tabata envolvi den un tiroteo. Mi a pensa cu nan lo mata mi, pero mi a logra scapa. Despues di esey, mi a cuminsa pensa ta kico mi ta haciendo cu mi bida y mi a dicidi cu mi kier cambia. Pero con lo mi por a logra esey? Cerca ken lo mi por haya yudansa?

Mayoria di mi famia tabata infeliz. Nan bida tabata yen di problema. Pero e famia di un di mi omonan tabata diferente. Mi tabata sa cu nan ta bon hende y cu nan ta biba segun principio di Bijbel. Nan a hasta siña mi cu Dios su nomber ta Jehova. Un poco tempo despues di e tiroteo, mi a haci oracion na Jehova. Mi a yam’e na su nomber y mi a pidie pa yuda mi. Pa mi sorpresa, e siguiente dia, un testigo di Jehova a bati na mi porta! Y despues, el a cuminsa duna mi les di Bijbel.

No mucho tempo despues, mi a enfrenta un reto grandi. Mi ex-amigonan tabata yama mi varios biaha pa mi pasa tempo cu nan. Aunke no tabata facil, mi a bisa no. Mi tabata determina pa sigui studia Bijbel. Y mi ta hopi contento cu mi a tuma e decision ey! Mi bida a cambia completamente y mi a haya berdadero felicidad.

Mi ta corda cu mi a yega di bisa Jehova den oracion cu antes mi tabata kier a pasa dies aña den prizon pa haya respet como miembro di un gang. Pesey, mi a puntr’e pa mi sirbi sikiera dies aña como un predicador full-time pa mi por siña otro hende tocante Bijbel. Jehova a scucha mi oracion y mi tin 17 aña como un predicador full-time. Y e bon ta cu nunca mi no a bay prizon.

Pero mayoria di mi ex-amigonan si a bay cera pa hopi aña. Otronan ta morto. Mi ta hopi agradecido na mi famia cu ta Testigo cu nan tabata dispuesto pa ta diferente y pa biba segun principio di Bijbel. Mi ta respeta nan hopi mas cu mi a yega di respeta cualkier miembro di e gang. Mas cu tur cos, mi ta masha agradecido na Jehova kende a siña mi e mihor manera di biba.

 ANDRES: Mi a nace y crece den un bario pober, yen di droga, asesinato, extorsion y prostitucion. Mi tata tabata un alcoholico y adicto na cocaina. Mi tata cu mi mama semper tabata insulta otro y hasta golpia otro.

Na un edad jong, mi a cuminsa bebe alcohol y uza droga. Mi a pasa mayoria di mi tempo riba caya. Mi tabata horta y despues bende e cosnan cu mi a horta. Ora mi a bira mas grandi, mi tata kier a cera un amistad cu mi pero el a haci esaki na un manera robes. El a siña mi con pa pasa droga y otro mercancia ilegal di contrabanda pa despues bende nan. Den un poco tempo mi a gana hopi placa. Un dia, ora mi tabata na cas, polis a aresta mi. Y mi a ser sentencia na cinco aña di prizon pa intento di asesinato.

Riba un mainta, nan a invita tur e presonan pa bin scucha un discurso di testigonan di Jehova. Mi a dicidi di bay tende e discurso. Loke nan a bisa tabata zona logico y mi cuminsa tuma les di Bijbel cerca e Testigonan. Nan no a purba di suavisa loke Bijbel ta bisa, sino nan a mustra mi Dios su normanan moral halto.

Mi a realisa cu mi no por a haci cambio sin haya yudansa, specialmente ora e otro presonan a cuminsa menasa mi pasobra nan no tabata gusta cu mi ta studia Bijbel. Pesey mi a haci oracion na Jehova y mi a pidie pa forsa y sabiduria. Jehova a yuda mi, y en bes di laga miedo domina mi, mi a haya curashi pa papia cu e presonan tocante Bijbel.

Ora e momento a yega pa mi sali fo’i prizon, mi tabata asina nervioso cu mi kier a keda un tiki mas. Mientras cu mi tabata saliendo, algun preso tabata zwaai nan man bisa ayo. Algun di nan hasta a bisa mi yen di cariño: “Tur cos bon, wardador chikito.”

Mi no kier pensa mes con mi bida lo tabata si mi no a laga Dios educa mi. Mi ta hopi agradecido cu Dios ta stima mi y no a mira mi como un caso perdi. *

^ par. 15 Riba jw.org bo por haya mas ehempel cu ta mustra con Bijbel a cambia bida di hende. Bay na LOKE BIJBEL TA SIÑA > PAZ & FELICIDAD.