Sigui pa e contenido

Sigui pa e index

 E CAMINDA CU TA HIBA NA FELICIDAD

Proposito den Bida

Proposito den Bida

HENDE TA UNICO. NOS POR SKIRBI, PINTA, CREA Y NOS TA HACI PREGUNTANAN IMPORTANTE DI BIDA MANERA: Dicon e universo ta existi? Di unda nos a bini? Kico ta e proposito di bida? Kico lo sosode cu nos den futuro?

Tin hende no ta haci nan mes e preguntanan ey, pasobra nan ta pensa cu e preguntanan aki ta hopi dificil pa nos contesta. Y tin otro hende cu ta pensa cu no ta bale la pena pa haci e preguntanan ey, pasobra toch bida a evoluciona. Profesor di historia y biologia William Provine a bisa: “No tin ni diosnan ni proposito.” El a bisa tambe cu “regla no tin ningun fundeshi y bida no tin ningun proposito.”

Pero tin hende no ta di acuerdo cu bida no tin sentido. Nan ta mira cu leynan di wiskunde cu ta precies y bon pensa ta dirigi e universo. Nan ta keda impresiona pa e excelente diseño den naturaleza cu hende ta purba imita. Y nan bida di tur dia ta yuda nan mira cu mester tin un mente inteligente tras di tur e diseñonan complica, y cu tur esey no por a bin di su mes.

E manera di pensa ey a motiva algun hende cu ta kere den evolucion pa bolbe analisa nan punto di bista. Laga nos wak dos ehempel.

ALEXEI MARNOV, NEUROCIRUHANO. Alexei a bisa: “Na scol nan a siña mi ateismo y evolucion. Y tur hende cu tabata kere den Dios, nan tabata considera como ignorante.” Pero na 1990, Alexei su punto di bista a cuminsa cambia.

El a splica: “Semper mi ta purba compronde e dicon tras di un asunto, manera por ehempel den caso di e celebro humano. No ta nada straño cu hende a describi e organo maraviyoso aki como e structura mas complica cu ta existi. Pero ki bal cu e celebro por warda asina tanto informacion y desaroya asina tanto habilidad si bida di hende ta asina cortico? Esey no ta logico. Pesey mi a cuminsa puntra mi mes: Dicon nos ta aki? Kico ta e proposito di bida? Despues cu mi a reflexiona seriamente riba e asunto, mi a yega na e conclusion cu mester tin un Creador.”

Como cu Alexei kier a haya sa e proposito di bida, el a cuminsa studia Bijbel. Cu tempo su esposa, kende ta un dokter y un ateista, tambe a cuminsa studia, aunke na principio el a haci esey pa mustra su casa cu e ta robes. Pero awor, nan tur dos ta convenci cu Dios ta existi, y danki na Bijbel, nan sa kico ta Dios su proposito pa humanidad.

HUABI YIN, CIENTIFICO. Señora Huabi Yin a studia scheikunde, y durante hopi aña el a studia plasma cu ta ser considera como e di cuater estado di materia. E plasma cu bo ta haya den solo ta consisti principalmente di electron y ion positivo. *

Huabi a bisa: “Ora nos como cientifico ta studia fenomenonan natural, semper nos ta topa cu orden sumamente impresionante cu ta e resultado di leynan precies. Mi tabata puntra mi mes: Ken a establece e leynan ey? Si e candela cu nos ta uza pa cushina mester di un hende pa control’e, ken a establece e leynan cu ta controla e temperatura di solo? Cu tempo, mi a yega na e conclusion cu e contesta mas logico ta: ‘Na principio Dios a crea e cielonan y Tera.’”—Genesis 1:1.

Ta berdad cu ciencia a yuda nos compronde “con” fenomenonan natural ta funciona, manera por ehempel, con e neuronnan den nos celebro ta funciona y con solo ta produci luz y calor. Pero manera Alexei y Huabi a siña, Bijbel ta contesta e “dicon” tras di un asunto: Dicon e universo ta existi? Dicon tin leynan cu ta controla e universo? Y dicon nos ta existi?

Encuanto e Tera, Bijbel ta bisa: “[Dios] no a crea esaki pa e keda bashi, ma el a form’e pa e wordo habita.” (Isaias 45:18) Si, Dios a crea e Tera cu un proposito na mente, y manera nos lo mira den e siguiente articulo, e proposito ey tin di haber cu nos speransa pa futuro.

^ par. 10 Otro estadonan di materia ta solido, likido y gas.