Sigui pa e contenido

Sigui pa e index

 E CAMINDA CU TA HIBA NA FELICIDAD

Pordona

Pordona

“TEMPO MI TABATA CHIKITO, MI TABATA CUSTUMBRA DI TENDE HOPI INSULTO Y GRITAMENTO NA CAS”, un señora cu yama Patricia a bisa. “Nunca mi no a siña pordona. Y ora mi a bira grandi, si un hende hurt mi, mi tabata keda pensa riba loke e hende a haci mi pa hopi dia, y como consecuencia mi no por a drumi.” En berdad, rabia y rencor no ta haci nos feliz ni tampoco esey no ta bon pa nos salud. Y segun investigadornan, hende cu no ta pordona ...

  • Ta laga rabia y rencor daña nan amistad cu otro hende, y esey por pone nan sinti nan mes nan so y bandona

  • Ta ofende lihe, ta sufri di ansiedad of hasta di depresion grave

  • Ta enfoca asina hopi riba un ofensa cu nan no ta disfruta di bida

  • Ta sinti nan culpabel pasobra nan no ta sigui e norma- y balornan cu nan tin

  • Ta haya mas stress y tin mas chens di haya presion halto, maleza di curason y otro maleza doloroso, manera artritis y migraine *

KICO KIERMEN PORDONA? Pordona kiermen no keda rabia ni carga rencor ni cana rond cu gana di tuma venganza contra e hende cu a ofende nos. Pero pordona no ta nifica si cu nos ta aproba di un malecho of haci comosifuera cu ta algo chikito of cu nada no a pasa. Mas bien, esey ta un decision personal bon pensa cu ta mustra cu e persona tin un deseo sincero pa mantene paz, forma un bon relacion cu hende y mantene esey.

Un hende cu ta pordona ta mustra tambe cu e ta hinca su mes den sapato di otro hende pasobra e ta compronde cu nos tur ta hera den loke nos ta bisa of haci. (Romanonan 3:23) Bijbel ta reconoce esey, bisando: “Sigui soporta otro y pordona otro libremente, hasta si un di boso tin motibo pa keha un otro.”—Colosensenan 3:13.

Ta bisto anto cu pordona ta un manera importante cu nos ta mustra amor, “e laso perfecto di union.” (Colosensenan 3:14) Segun e website Mayo Clinic, e beneficio di pordona ...

  •   Ta cu bo ta bay mihor cu otro hende pasobra bo tin comprondemento, compasion y ta hinca bo mes den sapato di e hende cu a ofende bo

  • Ta cu bo estado mental ta mehora y bo ta sinti cu bo ta na paz cu Dios

  • Ta cu bo ta sinti menos ansiedad, stress y agresividad

  • Ta cu lo bo tin menos sintoma di depresion

PORDONA BO MES. E revista Disability & Rehabilitation ta bisa cu pordona bo mes “ta sumamente importante pa bo por tin un bon salud”, tanto fisicamente como mentalmente. Sinembargo, e revista a reconoce si cu “esey por ta hopi dificil pa logra.” Kico por yuda bo pordona bo mes?

  • No spera perfeccion di bo mes. Sea realistico y reconoce cu abo mescos cu tur otro hende ta haci fout.—Eclesiastes 7:20

  • Siña di bo foutnan, e ora ey tin menos chens cu lo bo bolbe haci e mesun fout

  • Tene pasenshi cu bo mes; tin algun defecto y mal custumber cu no ta kita di biaha. —Efesionan 4:23, 24

  • Busca amigo cu ta positivo, bondadoso y cu ta anima bo, pero cu lo ta sincero cu bo tambe.—Proverbionan 13:20

  • Si bo hurt un hende, reconoce bo eror y pidi pordon di biaha. Ora bo haci paz cu hende, lo bo haya paz mental.—Mateo 5:23, 24

TA BALE LA PENA PA APLICA PRINCIPIO BIBLICO

Patricia, kende nos a menciona caba, a siña pordona ora el a tuma les di Bijbel. El a bisa: “Mi a libra for di e rabia cu tabata venena mi. Mi no ta sufri mas y mi no ta pone otro hende sufri. Principionan di Bijbel ta sigura nos cu Dios ta stima nos y cu e kier lo mihor pa nos.”

Un meneer cu yama Ron tambe a haya paz mental ora el a aplica principio di Bijbel, el a bisa: “Mi no por controla loke otro hende ta bisa of haci, pero loke ami ta bisa of haci si mi por controla. Si mi kier tin paz, mi no mester carga rencor.”

^ par. 8 Fuente: Website di Mayo Clinic y Johns Hopkins Medicine y e revista Social Psychiatry and Psychiatric Epidemiology.