Sigui pa e contenido

Sigui pa e index

 E CAMINDA CU TA HIBA NA FELICIDAD

Keda Contento Cu Loke Bo Tin y Sea Generoso

Keda Contento Cu Loke Bo Tin y Sea Generoso

BO NO A RIPARA CU HENDE TA MIDI FELICIDAD Y EXITO A BASE DI PLACA Y COS MATERIAL? Bou di influencia di e punto di bista ey, miyones di hende ta traha mata curpa pa hopi ora largo pa nan gana mas placa. Pero acaso placa y cos material ta haci hende berdaderamente feliz? Ban wak si esey ta berdad of no.

Segun e revista Journal of Happiness Studies, unabes cu nos necesidadnan basico ta cubri, mas entrada lo no haci nos mas feliz ni pone nos sinti mas mihor. Un articulo den e revista Monitor on Psychology ta bisa cu placa mes no ta e problema, “ta coremento tras di placa ta haci hende infeliz.” E palabranan ey ta cuadra cu e siguiente conseho cu Bijbel a duna casi dos mil aña pasa: “Amor pa placa ta raiz di tur sorto di cos perhudicial, y algun hende cu a cay pa e amor aki ... a causa nan mes hopi dolor.” (1 Timoteo 6:9, 10) Kico ta algun di e dolornan ey cu hende por pasa aden?

NAN TA PREOCUPA Y PERDE SOÑO PASOBRA NAN MESTER PROTEHA NAN RIKESA. “Soño di e homber trahador ta dushi, sea cu e ta come poco of hopi. Ma bariga-yen [of, “e abundancia”, NW] di e homber rico no ta lag’e drumi.”—Eclesiastes 5:12.

NAN TA KEDA DECEPCIONA ORA NAN NO LOGRA HAYA E FELICIDAD CU NAN A SPERA DI HAYA. Un di e motibonan cu nan ta sinti nan decepciona ta pasobra e deseo pa haya mas placa ta un deseo cu no por ser satisface. “Esun cu ta stima placa lo no keda satisfecho cu placa, ni esun cu ta stima abundancia, cu su entrada.” (Eclesiastes 5:10) Ademas, e deseo pa placa por pone un hende sacrifica loke ta hopi importante, manera pasa tempo cu su famia y amigonan of dedica tempo na Dios.

NAN TA SINTI DUELE Y FRUSTRACION ORA PLACA PERDE BALOR OF INVERSION BAY MALO. “No cansa bo curpa pa rikesa; stop di preocupa pa esey. Ora bo pone bo bista riba dje, e no t’ey mas. Pasobra rikesa siguramente ta cria hala pa su mes, manera un aguila cu ta bula bay.”—Proverbionan 23:4, 5.

 CUALIDADNAN CU TA HACI NOS FELIZ

KEDA CONTENTO CU LOKE BO TIN. “Nos no a bini cu nada na mundo, y nos no por bay cu nada tampoco. Pues, si nos tin cuminda, paña y un dak riba nos cabes, nos lo keda contento cu e cosnan aki.” (1 Timoteo 6:7, 8) Por lo general, hende cu ta contento cu loke nan tin no ta keha y nan actitud ta yuda nan pa no envidia otro hende. Y como cu nan no kier gasta mas di loke nan por afford, nan ta evita hopi preocupacion y stress.

GENEROSIDAD. “Tin mas felicidad den duna cu den ricibi.” (Echonan 20:35) Hende generoso ta feliz pasobra nan gusta haci otro hende feliz. Y hasta ora nan no tin hopi pa duna, nan ta duna un tiki di nan tempo y energia. Hopi biaha, nan ta haya loke placa no por cumpra: hopi amor, respet y bon amigo, kendenan, na nan turno, tambe ta duna generosamente.—Lucas 6:38.

PONE HENDE PROME CU COS MATERIAL. “Mihor un tayo di berdura caminda tin amor, cu un toro gorda y odio hunto cu ne.” (Proverbionan 15:17) Kico esey kiermen? Mihor bo tin bon amigo cu ta stima bo en bes di hopi cos material. Y amor, manera nos lo mira despues den e revista aki, ta sumamente importante pa un hende por ta feliz.

Sabina, un señora di Sur America a siña con valioso principio di Bijbel ta. Sabina su esposo a bay lag’e, y Sabina tabata lucha pa gana su pan di cada dia pa cria su mes y su dos yiu muhernan. E tabatin dos trabou y tur dia e tabata lanta 4 or di marduga. Aunke cu e tabata keda na werki, toch el a dicidi di tuma les di Bijbel. Kico tabata e resultado?

Sabina su situacion economico no a cambia, pero su actitud si. Por ehempel, el a haya e felicidad cu un hende ta sinti ora nan ta consciente cu nan tin mester di Dios. (Mateo 5:3) Ademas, Sabina a haya bon amigo entre e pueblo di Dios. Y el a experencia e felicidad di comparti loke cu el a siña cu otro hende.

Bijbel ta bisa: “Sabiduria ta demostra pa medio di su obranan cu e ta husto.” (Mateo 11:19) For di esey nos por conclui cu ta bon pa nos keda contento cu loke nos tin y pa nos ta generoso, y tambe pa pone hende prome cu cos material.