Sigui pa e contenido

Sigui pa e index

Hoben​​—⁠Con Bo Por Prepara pa Bautismo?

Hoben​​—⁠Con Bo Por Prepara pa Bautismo?

“Pa haci bo boluntad, o mi Dios, ta un delicia pa mi.”—SAL. 40:8.

CANTICA: 51, 58

1, 2. (a) Dicon bautismo ta algo serio? (b) Kico un persona mester ta sigur di dje prome cu e batisa, y dicon?

BO TA un hoben cu tin pensa di batisa? Si ta asina, esey ta e privilegio di mas grandi cu cualkier hende por tin. Manera e articulo anterior a mustra, bautismo ta algo serio. E ta mustra cu bo a dedica bo bida na Jehova, esta, cu bo a haci un promesa solem na dje. Bo a primintie cu lo bo sirbie pa semper y cu e cos di mas importante den bo bida ta pa haci su boluntad. Pues, bo mester batisa solamente ora bo ta suficiente madura, ora e decision ey ta bin di bo mes y ora bo a compronde kico dedicacion ta.

2 Pero kico si bo no tin sigur cu bo ta cla pa bautismo? Of kico si abo kier batisa pero bo mayornan ta sinti cu bo tin cu warda un tiki, kisas te ora bo haya mas experencia den hiba un bida cristian? Sea cual sea e caso, no desanima. Uza e tempo ey pa haci mas progreso, y lo no dura mucho cu lo bo por batisa. Cu esey na mente, bo por pone meta relaciona cu: (1) bo conviccionnan, (2) bo accionnan y (3) bo aprecio pa e rescate.

 BO CONVICCIONNAN

3, 4. Ki les hobennan por saca for di e ehempel di Timoteo?

3 Pensa un rato riba con lo bo contesta e siguiente preguntanan: Dicon mi ta kere cu Dios ta existi? Kico ta convence mi cu Bijbel ta e Palabra inspira di Dios? Dicon mi ta pensa cu ta mihor pa biba segun e normanan moral di Dios en bes di imita e estilo di bida di e mundo aki? E preguntanan ey no ta pa lanta duda den bo. Mas bien, nan por yuda bo aplica e conseho di apostel Pablo: “Comproba pa boso mes kico ta e boluntad di Dios, cu ta bon, agradabel y perfecto.” (Rom. 12:2) Pero dicon e cristiannan na Roma mester a comproba pa nan mes algo cu ya caba nan a acepta?

4 Ban wak e ehempel biblico di Timoteo. E tabata conoce e Scritura bon, pasobra “for di chikito” su mama y su wela a siñ’e e berdad. A pesar di esey, Pablo a urgi Timoteo: “Sigui den e cosnan cu bo a siña y a keda convenci di dje.” (2 Tim. 3:14, 15) Pues, Timoteo tabata sigur cu el a haya e berdad, y el a haci e berdad di su mes. El a acept’e, no pasobra su mama y su wela a bis’e pa haci esey, sino pasobra el medita riba e berdad y a keda convenci di dje.—Lesa Romanonan 12:1.

5, 6. Dicon ta importante pa bo siña uza bo “capacidad di pensa” ora bo ta jong?

5 Kico di abo? Podise bo conoce berdadnan biblico pa hopi tempo caba. Si ta asina, ta bon pa bo pone como meta pa analisa pakico bo ta kere den loke bo ta kere. Esey lo duna bo mas conviccion ainda y lo yuda bo pa bo no laga e presion di bo pareunan, e pensamento di mundo of ni bo mes sintimentonan influencia bo.

6 Si bo siña uza bo “capacidad di pensa” for di ora bo ta jong, lo bo por sa con pa contesta preguntanan manera: Con bo por sa cu di berdad Dios ta existi? Con por ta cu Dios semper a existi? Dicon un Dios di amor ta permiti maldad? Ora bo ta prepara pa contesta preguntanan asina, nan lo no debilita bo fe. Al contrario, lo bo sinti bo motiva pa haci mas estudio personal.

7-9. Splica con e serie riba jw.org titula “Kico Bijbel Ta Siña Realmente?” por yuda bo pa fortalece bo conviccion den loke Bijbel ta siña.

7 Estudio personal profundo por yuda bo contesta pregunta, kita cualkier duda cu bo por tin y fortalece bo conviccion. (Echo. 17:11) Nos tin diferente publicacion cu por yuda bo cu esey. Algo cu a yuda hopi hende ta e foyeto The Origin of Life—Five Questions Worth Asking y e buki Is There a Creator Who Cares About You? Ademas, hopi hoben gusta e serie di guia pa studia riba jw.org titula “Kico Bijbel Ta Siña Realmente?” for di cua nan ta saca hopi beneficio. Pa bo por hay’e, bay na e tab di LOKE BIJBEL TA SIÑA. Cada un di e guianan aki ta diseña pa yuda bo fortalece bo confianza den un topico di Bijbel.

8 Bo conoce bo Bijbel, y pesey kisas lo ta facil pa contesta e preguntanan cu tin den e guianan pa studia. Pero kico ta haci bo asina sigur di bo contestanan? E guianan pa studia ta yuda bo rasona riba varios texto y ta anima bo pa skirbi dicon bo ta kere den nan. Nan por yuda bo pensa con lo bo splica otro hende bo creencianan biblico.  E serie online titula “Kico Bijbel Ta Siña Realmente?” a yuda hopi hoben fortalece nan conviccion den loke Bijbel ta siña. Si bo tin acceso na nan, bo por inclui nan den bo estudio personal.

9 Ora bo comproba pa bo mes cu esaki ta e berdad, bo ta dal un stap mas cerca di bo bautismo. Un ruman muher jong a bisa: “Prome cu mi a dicidi di batisa, mi a studia Bijbel y a mira cu esaki ta e religion berdadero. Y cada dia cu pasa, mi ta keda mas convenci di esey.”

BO ACCIONNAN

10. Dicon un cristian batisa tin cu demostra cu su accionnan cu e tin fe?

10 Bijbel ta bisa: “Fe riba su so, si e no tin obra, ta morto.” (Sant. 2:17) Si bo tin un fe fuerte, lo bo demostra esey cu bo accionnan. Ki tipo di accion? Bijbel ta papia di “conducta santo” y “obranan cu ta demostra devocion na Dios.”—Lesa 2 Pedro 3:11.

11. Splica kico e expresion “conducta santo” ta nifica.

11 Pa bo “conducta [ta] santo”, bo mester ta moralmente limpi. Con ta bay cu esey? Pensa por ehempel riba e ultimo seis lunanan. Bo a demostra cu bo a entrena bo “capacidad di compronde” pa distingui loke ta bon for di loke ta malo? (Heb. 5:14) Bo por pensa riba ocasionnan cu bo a resisti tentacion of presion di pareu? Ora bo ta na scol, bo conducta ta un bon ehempel pa otronan? Bo ta defende bo creencianan en bes di purba di ta manera bo compañeronan di klas djis pa nan no tenta bo? (1 Ped. 4:3, 4) Ta berdad cu niun hende no ta perfecto. Hasta sirbidornan di Jehova cu a sirbie pa hopi aña por ta timido y tin dificultad pa defende e berdad. Pero un persona dedica na Jehova lo ta orguyoso di por carga e nomber di Dios, y lo e demostra esey cu su conducta.

12. Cua ta algun “[obra] cu ta demostra devocion na Dios”, y con bo mester mira nan?

12 Awor, kico di e “obranan cu ta demostra devocion na Dios”? Algun di e obranan aki ta actividadnan di congregacion, manera bay e reunionnan y predica. Ademas, nan ta inclui actividadnan spiritual cu otro hende no ta mira, manera bo oracionnan y estudio personal. Un persona cu a dedica su bida na Jehova lo no mira e actividadnan aki como un carga. Mas bien, lo e tin e mesun actitud cu Rey David, kende a bisa: “Pa haci bo boluntad, o mi Dios, ta un delicia pa mi; bo ley ta den mi curason.”—Sal. 40:8.

13, 14. Ki herment por yuda bo haci “obranan cu ta demostra devocion na Dios”, y con algun hoben a beneficia di dje?

13 Pagina 308 y 309 di e buki Questions Young People Ask—Answers That Work (Volumen 2) tin algun pregunta cu lo yuda bo pone meta. Algun di e preguntanan aki ta: “Con specifico bo oracionnan ta, y kico nan ta revela tocante bo relacion cu Jehova? Kico bo sa studia den bo estudio personal? Bo ta bay sirbishi hasta ora bo mayornan no bay?” E pagina di tarea tin tambe espacio pa bo nota bo metanan cu bo kier pone relaciona cu bo oracionnan, estudio personal y sirbishi.

14 Hopi hoben cu tin pensa di batisa ta haya cu e pagina di tarea ey ta un herment hopi valioso. Un ruman muher jong cu yama Tilda a bisa: “Mi a  uza e pagina di tarea pa pone meta. Un pa un mi a logra e metanan ey, y despues di mas o menos un aña, mi tabata cla pa bautismo.” Patrick, un ruman homber jong, tambe a beneficia di e pagina di tarea. El a bisa: “Mi tabata sa caba kico tabata mi metanan, pero loke a yuda mi traha mas duro pa logra nan ta ora mi a skirbi nan.”

Lo bo sigui sirbi Jehova hasta si bo mayornan no ta haci esey? (Wak paragraf 15)

15. Dicon bautismo mester ta un decision cu ta bin di bo mes?

15 Un di e preguntanan cu mas ta pone bo pensa ta: “Lo bo sirbi Jehova hasta si bo mayornan y amigonan stop di haci esey?” Corda cu como un cristian dedica y batisa, ta bo mes tin cu percura pa bo relacion cu Jehova. Bo sirbishi na dje no ta depende di otro hende, ni sikiera di bo mayornan. Bo conducta santo y obranan cu ta demostra devocion na Dios ta mustra cu bo a haci e berdad di bo mes y cu bo ta haci esfuerso pa cualifica pa bautismo.

BO APRECIO PA E RESCATE

16, 17. (a) Kico mester motiva un persona pa bira un cristian? (b) Con bo por ilustra e aprecio cu nos tin pa e rescate?

16 Un homber bon versa den e Ley di Moises a puntra Hesus: “Cua ta e mandamento di mas grandi di Ley?” Hesus a contest’e: “Stima Jehova bo Dios cu henter bo curason, cu henter bo alma y cu henter bo mente.” (Mat. 22:35-37) Pues, Hesus a splica cu ta amor pa Jehova mester motiva un persona pa batisa y bira un cristian. Un di e mihor maneranan pa bo haya mas amor pa Jehova ta ora bo medita riba e regalo di mas grandi cu Jehova a provee pa nos, esta, e sacrificio di rescate di su Yiu. (Lesa 2 Corintionan 5:14, 15; 1 Juan 4:9, 19.) Ora bo pensa riba e rescate y kico esaki ta nifica pa bo, lo bo sinti bo motiva pa mustra bo aprecio p’e.

17 Bo por compara bo aprecio pa e rescate asin’aki: Imagina bo cu bo ta hogando y un hende ta salba bo. Lo bo djis bay cas, seca bo curpa y lubida loke e persona a haci pa bo? Claro cu no. Lo bo ta hopi agradecido cu e persona ey a salba bo, y ta danki na dje cu bo ta na bida. Mescos tambe, nos mester ta hopi agradecido na Jehova y Hesucristo pa e rescate. Sin dje, den un sentido, nos tur lo hoga den pica y morto. Pero ta danki na nan gran amor nos tin e oportunidad pa biba pa semper den un paradijs riba Tera.

18, 19. (a) Dicon bo no mester tin miedo pa dedica bo bida na Jehova? (b) Den ki sentido sirbishi na Jehova lo permiti bo hiba un mihor bida?

 18 Bo ta aprecia loke Jehova a haci pa bo? Si esey ta e caso, lo ta na su luga pa bo dedica bo bida na dje y batisa. Corda, dedicacion ta un promesa solem cu bo ta haci na Jehova cu lo bo haci su boluntad pa semper, cueste loke cueste. Bo mester tin miedo pa haci un promesa asina? Claro cu no. Corda cu Jehova kier lo mihor pa bo, y e ta “recompensa esnan cu ta haci esfuerso pa busc’e.” (Heb. 11:6) Dedicacion y bautismo lo no duna bo un mal bida. Al contrario, lo bo bay hiba un mihor bida. Un ruman homber di 24 aña cu a batisa prome cu e tabata un teenager a bisa: “Si mi a warda un tiki mas pa batisa, kisas lo mi tabatin mas conocemento, pero e decision pa dedica mi bida na Jehova a proteha mi pa mi no sigui tras di metanan di mundo.”

19 Na contraste cu Jehova, Satanas ta hopi egoista y no ta interesa den bo. Diabel no por ofrece bo nada bon si bo siguie. Y esey ta logico pasobra con e por ofrece bo algo cu e mes no tin? E no tin niun bon noticia ni un speransa pa futuro. E unico cos cu e por ofrece bo ta un futuro tristo pasobra ta esey so a ked’e.—Rev. 20:10.

20. Kico un hoben por haci pa e por progresa y yega na dedicacion y bautismo? (Wak tambe e cuadro “ Algun Herment pa Yuda Bo Crece Spiritualmente.”)

20 Ta bisto anto cu e mihor decision cu bo por tuma ta di dedica bo bida na Jehova. Bo ta cla pa dal e paso ey? Si ta asina, no tarda pa hacie. Di otro banda, si bo tin mester di mas tempo, haci uzo di e sugerencianan den e articulo aki pa yuda bo sigui haci progreso. Pablo a skirbi e Filipensenan: “Te asina leu cu nos a progresa, laga nos sigui cana na un manera ordena den e mesun caminda aki.” (Flp. 3:16) Si bo sigui e conseho ey, pronto lo bo kier dedica bo bida na Jehova y batisa.