Sigui pa e contenido

Sigui pa e index

Imita e Ehempel di Jehova Su Bon Amigonan

Imita e Ehempel di Jehova Su Bon Amigonan

“E [amistad] intimo di [Jehova] ta cu esnan cu ta tem’e.”SAL. 25:14.

CANTICA: 106, 118

1-3. (a) Dicon nos por ta sigur cu nos por bira amigo di Dios? (b) E ehempelnan di ken nos lo trata den e articulo aki?

TRES biaha Bijbel ta yama Abraham amigo di Dios. (2 Cro. 20:7; Isa. 41:8; Sant. 2:23) En realidad, Abraham ta e unico persona cu Bijbel ta yama specificamente amigo di Dios. Nos mester conclui cu Abraham tabata e unico persona cu a bira Dios su amigo? No, pasobra Bijbel ta mustra cu cada un di nos por bira amigo di Dios.

2 Bijbel ta yen di relato di hende homber y muher cu a teme Jehova, pone fe den dje y a bira su bon amigo. (Lesa Salmo 25:14.) Nan tur ta forma parti di e “nubia ... grandi di testigo” cu Pablo a menciona. (Heb. 12:1) Aunke cada un di nan tabata diferente, nan tur tabata amigo di Dios.

3 Laga nos analisa e ehempel di tres bon amigo di Dios: (1) Ruth, un viuda jong y leal di Moab; (2) Ezekias, un rey leal di Juda y (3) Maria, Hesus su mama, kende tabata humilde. Con nan a bira amigo di Dios? Y kico nos por siña for di nan?

 RUTH A MUSTRA AMOR LEAL

4, 5. Ki decision Ruth mester a tuma, y dicon esaki tabata asina dificil p’e? (Wak e prome plachi.)

4 Tres viuda tabata pasando door di e sabananan di Moab pa bay Israel. Ken nan tabata? Noemi cu su nueranan, Ruth y Orfa. Na caminda, Orfa a dicidi di bay Moab bek. Pero Noemi tabata determina pa bay bek Israel, su pais natal. Y kico Ruth lo a haci? E mester a tuma e decision di mas importante di su bida. Lo el a bay Moab bek cerca su famia? Of, lo el a keda cu Noemi, su suegra, y bay Betlehem?—Ruth 1:1-8, 14.

5 Ruth su famia tabata biba na Moab, y facilmente e por a pensa cu tabata mas mihor pa e bay bek cerca nan ya cu nan lo por a percura p’e. Ademas, e tabata conoce e idioma, e cultura y e hendenan di Moab. Na Betlehem lo e no tabatin e bentahanan ey. Noemi tabatin miedo cu e lo no por haya un esposo of un luga di biba pa Ruth eynan. Pesey el a conseha Ruth pa keda Moab. Manera nos a mira caba, Orfa “a bay bek cerca su pueblo y su diosnan.” (Ruth 1:9-15) Pero Ruth si no a dicidi di haci esey.

6. (a) Ki decision sabi Ruth a tuma? (b) Dicon Boaz a bisa cu Ruth a busca refugio bou di e halanan di Jehova?

6 Parce cu Ruth a siña conoce Jehova for di su esposo of for di Noemi. El a siña cu Jehova no ta manera e diosnan di Moab. Ruth tabata stima Jehova y e tabata sa cu Jehova merece su amor y su adoracion. Pero conocemento so no tabata suficiente. Ruth mester a tuma un decision. Y el a tuma un decision sabi, esta pa sirbi Jehova. El a bisa Noemi: “Bo pueblo lo ta mi pueblo, y bo Dios, mi Dios.” (Ruth 1:16) Ora nos mira e amor cu Ruth tabatin pa Noemi, esey ta touch nos curason. Pero loke ta impresiona nos mas ainda ta e amor cu e tabatin pa Jehova. Y esey ta loke a impresiona Boaz tambe, kende mas despues a elogi’e pa e echo cu el a busca refugio bou di e halanan di Jehova. (Lesa Ruth 2:12.) E palabranan di Boaz kisas ta pone nos corda con un puyito ta busca proteccion bou di e halanan di su tata. (Sal. 36:7; 91:1-4) Asina tambe, Jehova amorosamente a proteha Ruth y a recompens’e pa su fe. Y Ruth nunca a lamenta cu el a tuma e decision ey.

7. Kico por yuda esnan cu ta duda pa dedica nan bida na Jehova?

7 Hopi hende ta siña tocante Jehova, pero nan no ta busca refugio bou di su halanan. Nan no ta tuma e decision di dedica nan bida na Jehova y batisa. Si abo tambe ta sinti asina, bo a yega di puntra bo mes pakico bo ta duda? Corda, tur hende ta sirbi un of otro dios. (Jos. 24:15) Dicon no tuma refugio den e unico Dios cu ta merece pa nos sirbie? Ora bo dedica bo bida na Jehova, bo ta demostra cu bo tin fe y cu bo kier tuma refugio den dje. Y e lo yuda bo pa bo por sigui sirbie sin importa e problemanan cu bo por haya bo cu ne. Esey ta loke cu Jehova a haci pa Ruth.

EZEKIAS “A TENE DURO NA” JEHOVA

8. Describi con e niñez di Ezekias tabata.

8 Manera nos a caba di mira, Ruth a lanta den un nacion cu tabata sirbi dios falso. En cambio, Ezekias a lanta den un nacion cu tabata dedica na Jehova. Pero no ta tur Israelita a keda fiel na Jehova. Por ehempel, Rey Acaz, tata di Ezekias, tabata  malbado. El a mustra falta di respet pa e tempel di Dios y a convence e pueblo pa adora dios falso. Acaz hasta a kima algun di e rumannan di Ezekias como sacrificio na un dios falso. Ki un morto horibel! Pues, Ezekias tabatin un niñez teribel.—2 Rey. 16:2-4, 10-17; 2 Cro. 28:1-3.

9, 10. (a) Dicon Ezekias facilmente por a bira un homber amarga? (b) Dicon nos no mester rabia cu Jehova? (c) Dicon nos no mester pensa cu nos automaticamente lo ripiti e erornan di nos famia?

9 Loke Ezekias a pasa aden facilmente por a pon’e bira amarga y rabia cu Dios. Den nos tempo, hende cu a pasa den cosnan menos duro cu Ezekias ta kere cu nan tin motibo valido pa rabia of “bira razo contra [Jehova]” y su organisacion. (Prov. 19:3) Y tin hende ta convenci cu e echo cu nan a lanta den un ambiente malo automaticamente ta nifica cu nan lo ripiti e erornan di nan famia. (Eze. 18:2, 3) E pensamentonan ey ta corecto?

10 E bida di Ezekias ta mustra claramente cu no ta asina. Nunca no tin un bon motibo pa un hende rabia cu Jehova, pasobra e no ta causa maldad. (Job 34:10) Ta berdad cu mayornan por tin un gran influencia riba nan yiunan, sea bon of malo. (Prov. 22:6; Col. 3:21) Pero esey no kiermen cu si bo famia pone un mal ehempel abo automaticamente ta bay haci mescos cu nan. Al contrario, Jehova a duna cada un di nos un regalo hopi bunita: Nos por dicidi pa nos mes ki tipo di hende nos kier ta y kico nos lo haci cu nos bida. (Deu. 30:19) Con Ezekias a uza e regalo ey?

Hopi hoben ta acepta e berdad a pesar di nan circunstancianan na cas (Wak paragraf 9, 10)

11. Dicon Ezekias tabata un di e mihor reynan di Juda?

11 Aunke Ezekias su tata tabata un di e reynan di mas malbado di Juda, Ezekias si tabata un di e mihor reynan. (Lesa 2 Reynan 18:5, 6.) El a dicidi di no sigui e mal ehempel di su tata. Mas bien, el a scoge pa scucha di Jehova su profetanan, manera Isaias, Mikeas y Oseas, kendenan a biba den e tempo ey. Nos por imagina cu Rey Ezekias a medita profundamente riba e conseho y coreccion cu e  hombernan fiel ey a dun’e. Na su turno, esey a motiv’e pa corigi e erornan grandi cu su tata a comete. Por ehempel, el a limpia e tempel, el a pidi Dios pordon pa e picanan di e pueblo y el a destrui e diosnan falso den henter e pais. (2 Cro. 29:1-11, 18-24; 31:1) Mas despues, ora cu Rey Senakerib di Asiria a menasa cu e ta bay ataca Jerusalem, Ezekias a mustra cu e tabatin hopi fe y curashi. E tabatin confianza cu Jehova lo proteha y fortalece su pueblo. (2 Cro. 32:7, 8) Mas despues, Ezekias a bira orguyoso. Pero ora cu Jehova a corigie, el a humilia su mes y el a arepenti. (2 Cro. 32:24-26) Nos por mira claramente cu Ezekias no a laga su pasado determina su futuro. Mas bien, el a demostra cu e tabata Jehova su amigo y cu e ta un bon ehempel pa nos sigui.

12. Mescos cu Ezekias, con hopi cristian awe ta demostra cu nan ta amigo di Dios?

12 Como cu nos ta bibando den un mundo cruel y sin amor, no ta nada straño cu hopi mucha ta lanta sin amor y proteccion di nan mayornan. (2 Tim. 3:1-5) Varios cristian tambe a lanta den un ambiente asina, pero toch nan tin un bon relacion cu Jehova. Mescos cu Ezekias, nan tambe a demostra cu e ambiente cu nan a lanta aden no ta determina ki tipo di hende nan lo bira. Dios a duna nos e libertad pa scoge, y mescos cu Ezekias, nos por scoge pa sirbi Dios y honr’e.

MARIA A BISA: “ATA MI AKI! JEHOVA SU SIRBIDOR!”

13, 14. Dicon Maria su asignacion tabata hopi dificil, pero con el a reacciona?

13 Hopi tempo despues di Ezekias, un mucha muher humilde di Nazaret cu yama Maria a cera un amistad unico cu Jehova. El a haya un asignacion special for di Jehova. Kico e asignacion tabata? E mester a sali na estado, duna luz y cria e Yiu di Dios. Imagina bo cuanto Jehova tabata stima Maria y cuanto confianza Jehova tabatin den dje. Pero con Maria a reacciona ora el a haya e asignacion ey?

“Ata mi aki! Jehova su sirbidor!” (Wak paragraf 13, 14)

14 Hopi biaha nos ta papia tocante e honor cu Maria a haya. Pero ki preocupacion e tabatin? Wel, un angel di Dios cu yama Gabriel a bisa Maria cu e lo sali na estado sin tene relacion cu un hende homber. Pero Gabriel no a bisa Maria cu e lo bay cerca su famia y bisiñanan pa splica nan con Maria lo a sali na estado. Kico nan lo a pensa di dje? Siguramente Maria lo mester tabata preocupa pa Jose, su comprometido. Con lo e por a convence Jose cu, maske e tabata na estado, el a keda fiel na dje? Ademas, e tabatin e responsabilidad grandi di cria y educa e Yiu di e Dios Haltisimo. Nos no sa kico tur e  preocupacionnan di Maria tabata. Pero loke si nos sa ta kico el a contesta e angel: “Ata mi aki! Jehova su sirbidor! Laga sosode cu mi manera bo a bisa.”—Luc. 1:26-38.

15. Dicon Maria su fe tabata asina sobresaliente?

15 Sin duda, Maria su fe tabata sobresaliente. Mescos cu un esclavo cu ta dispuesto pa haci tur loke cu su shon pidie, asina Maria tabata dispuesto pa haci tur loke su Doño, Jehova, pidie. E tabatin confianza cu Jehova lo cuid’e y proteh’e. Dicon Maria tabatin un fe asina fuerte? Nos no ta nace cu fe. Nos mester haci esfuerso pa haya fe y pidi Dios pa bendiciona nos esfuerso. (Gal. 5:22; Efe. 2:8) Maria a traha duro pa fortalece su fe. Con nos por sa esey? Wel, tin dos cos cu por yuda nos sa esey: e manera cu el a presta atencion y loke el a bisa.

16. Con nos por sa cu Maria tabata cla pa scucha?

16 E manera cu Maria a presta atencion. Bijbel ta conseha nos pa nos ta “cla pa scucha, slow pa papia.” (Sant. 1:19) Acaso Maria tabata cla pa scucha? Sigur cu si! Bijbel ta mustra cu el a presta bon atencion, specialmente ora cu tabata trata di e cosnan cu el a siña tocante Jehova. E tabata tuma tempo pa medita riba e cosnan importante ey. Un ehempel di esaki tabata tempo Hesus a nace, ora cu e wardadornan di carne a conta Maria tocante un mensahe cu nan a haya for di un angel. Un otro ehempel ta tempo Hesus tabatin 12 aña di edad. El a bisa algo cu a sorprende Maria. Den ambos caso, Maria a scucha y corda loke el a tende, y el a medita riba esey.—Lesa Lucas 2:16-19, 49, 51.

17. Kico nos por siña tocante Maria ora nos analisa loke el a bisa?

17 Loke Maria a bisa. No tin hopi cos cu Maria a bisa skirbi den Bijbel. Na Lucas 1:46 pa 55 ta e unico caminda cu Maria a papia mas tanto. Loke Maria a bisa den e textonan ey ta mustra claramente cu e tabata conoce e Scritura bon. E palabranan cu Maria a uza tabata hopi similar na e palabranan cu Ana, mama di profeta Samuel, a uza ora el a haci oracion. (1 Sam. 2:1-10) Ta parce cu Maria a cita e Scritura mas o menos 20 biaha ora el a papia. Bo por mira bon cla cu e tabata gusta papia di e berdadnan cu el a siña tocante su gran Amigo, Jehova, y tambe di su Palabra.

18. Con nos por imita Maria su fe?

18 Mescos cu Maria, tin biaha nos por haya un asignacion di Jehova cu por parce dificil. Si esey ta e caso, laga nos imita Maria su ehempel door di acepta e asignacion ey humildemente y confia cu Jehova lo yuda nos. Ademas, nos por imita Maria su fe door di scucha cuidadosamente loke nos ta siña tocante Jehova y medita riba loke nos ta siña di dje. E ora ey nos lo por comparti e berdad cu entusiasmo.—Sal. 77:11, 12; Luc. 8:18; Rom. 10:15.

19. Si nos sigui e ehempel di e bon amigonan di Jehova, di kico nos por ta sigur?

19 No tin duda cu Ruth, Ezekias y Maria tabata amigo di Jehova, mescos cu Abraham. Nan y hopi otro sirbidor fiel ta forma parti di “un nubia ... grandi di testigo” cu tabatin e privilegio di bira Dios su amigo. Esta un bon ehempel nan ta pa nos! (Heb. 6:11, 12) Si nos haci esfuerso pa imita nan ehempel, nos lo por ta Jehova su amigo pa semper.