Sigui pa e contenido

Sigui pa e index

Dicon Nos Mester Reuni pa Adora Jehova?

Dicon Nos Mester Reuni pa Adora Jehova?

“Laga nos presta atencion na otro ... y no keda sin bay e reunionnan.”HEB. 10:24, 25.

CANTICA: 20, 119

1-3. (a) Con cristiannan a demostra cu nan ta gusta reuni hunto? (Wak e prome plachi.) (b) Kico nos lo trata den e articulo aki?

ORA Corinna tabatin 17 aña di edad, su mama a ser aresta y hiba na un campo di concentracion Sovietico. Despues, Corinna a ser hiba Siberia, miles di kilometer leu for di su cas. Eynan el a traha den un boerderij caminda nan a trat’e manera un catibo. Tin biaha nan tabata oblig’e pa traha pafo den friu sin paña adecuado. A pesar di tur esey, Corinna y un otro ruman muher a dicidi cu nan lo haci tur nan esfuerso pa bay reunion.

2 Corinna a bisa: “Nos a sali for di e boerderij atardi laat y a cana 25 kilometer pa bay na un stacion di trein. E trein a sali dos or di marduga, y nos mester a core seis ora den trein. Despues nos a cana dies kilometer pa yega e luga caminda nos a reuni.” A bale la pena pa haci tur e sacrificio ey? Corinna a sigui bisa: “Na e reunion ey, nos a studia E Toren di Vigilancia y a canta canticanan di Reino. Esey tabata un experencia hopi animante cu a fortalece nos fe.” Despues di tres dia nan a bolbe bay e boerderij bek, pero e cunukero no a ripara mes cu nan no tabat’ey.

 3 E pueblo di Dios semper a considera e reunionnan hopi importante. Por ehempel, e prome cristiannan tabata ansioso pa reuni hunto pa adora Jehova y siña tocante dje. (Echo. 2:42) Siguramente nos tambe ta gusta bay reunion. Sinembargo, cada un di nos ta enfrenta obstaculo. Podise no ta facil pa bo bay bo reunionnan regularmente. Kisas bo mester traha hopi ora, bo tin yen cos di haci of bo ta hopi cansa. Kico por yuda nos vence e obstaculonan aki pa nos asisti regularmente na nos reunionnan? [1] Con nos por anima nos studiantenan di Bijbel y otronan pa asisti regularmente na e reunionnan? Den e articulo aki nos lo splica dicon asisti na e reunionnan (1) ta bon pa nos, (2) ta yuda otronan y (3) ta agrada Jehova. [2]

DICON E REUNIONNAN TA BON PA NOS?

4. Con e reunionnan ta yuda nos siña tocante Jehova?

4 E reunionnan ta educa nos. Cada reunion ta siña nos mas tocante Jehova. Por ehempel, recientemente mayoria di congregacion a studia e buki Hala Serca Yehova na e Estudio di Bijbel di Congregacion. Con bo a sinti ora nos a analisa Jehova su cualidadnan y ora bo a tende kico bo rumannan ta sinti pa Jehova? Siguramente esaki a motiva bo pa stima Jehova hopi mas ainda. Na e reunionnan, nos ta siña mas tocante Bijbel mediante discursonan, demostracionnan y lesamento di Bijbel. (Neh. 8:8) Por ehempel, pensa un rato riba e joyas spiritual cu bo ta descubri tur siman ora bo ta prepara puntonan sobresaliente y despues ta tende loke otronan a siña for di e lesamento di Bijbel.

5. Con e reunionnan ta yuda bo den bo bida y den sirbishi?

5 Reunionnan manera e Estudio di Toren di Vigilancia ta siña nos aplica principio di Bijbel den tur aspecto di nos bida. (1 Tes. 4:9, 10) Abo a yega di asisti na un Estudio di Toren di Vigilancia cu a anima bo pa haci mas den sirbishi, pa mehora bo oracionnan of pa pordona un ruman? Y kico di e reunion den siman? E reunion aki ta siña nos con pa predica e bon noticia y con pa yuda otro hende compronde e berdadnan di Bijbel.—Mat. 28:19, 20.

6. Con e reunionnan ta anima nos y ta fortalece nos fe?

6 E reunionnan ta anima nos. E mundo di Satanas ta purba di debilita nos fe, pone nos haya stress y bira deprimi. Pero nos reunionnan ta anima nos y ta fortalece nos pa sigui sirbi Jehova. (Lesa Echonan 15:30-32.) Hopi biaha na reunion nos ta analisa con profecianan di Bijbel a cumpli. Como resultado, nos ta haya mas confianza cu Jehova su promesanan pa futuro tambe lo cumpli. Nos rumannan tambe ta anima nos. Con? Wel, ora nan ta duna parti riba plataforma, ora nan ta duna comentario y ora nan ta canta cu henter nan curason. (1 Cor. 14:26) Y ora nos papia cu nos rumannan prome y despues di reunion, esey ta refresca nos pasobra nos tin hopi amigo cu realmente ta interesa den nos.—1 Cor. 16:17, 18.

7. Dicon ta asina importante pa nos asisti na nos reunionnan?

7 Na e reunionnan, nos ta haya yudansa di Jehova su spirito santo. Hesus ta dirigi e congregacion cristian mediante spirito santo. En realidad, el a bisa nos cu nos mester “tende loke spirito santo ta bisa e congregacionnan.” (Rev. 2:7) Nos tin mester di spirito santo pa no cay den tentacion y pa predica cu curashi. Ademas, nos mester di spirito  santo pa tuma bon decision. Pesey, nos mester haci tur nos esfuerso pa asisti na nos reunionnan pa asina nos por haya yudansa di Jehova su spirito santo.

DICON E REUNIONNAN TA YUDA OTRONAN?

8. Ora nos rumannan mira nos na reunion, tende nos canta y duna comentario, con esaki ta yuda nan? (Wak e cuadro “Semper E Ta Sintie Mihor Despues di Reunion.”)

8 Na e reunionnan, nos tin oportunidad pa mustra nos rumannan cu nos stima nan. Pensa un rato riba e desafionan cu algun ruman den bo congregacion ta enfrenta. Apostel Pablo a bisa: “Laga nos presta atencion na otro.” Loke Pablo tabata kiermen ta cu nos mester mustra interes den nos rumannan. Y un manera cu nos por haci esey ta door di “bay e reunionnan.” (Heb. 10:24, 25) Ora nos bay nos reunionnan, nos ta mustra nos rumannan cu nos kier ta hunto cu nan, cu nos kier papia cu nan y cu nos ta interesa den nan. Ademas, nos ta anima nan ora nos ta duna comentario y ora nos ta canta cu henter nos curason.—Col. 3:16.

9, 10. (a) Splica con loke Hesus a bisa na Juan 10:16 ta yuda nos compronde e importancia di reuni cu nos rumannan. (b) Si nos asisti regularmente na nos reunionnan, con nos lo por yuda un ruman cu a ser rechasa door di su famia?

9 E reunionnan ta uni nos mas cu nos rumannan. (Lesa Juan 10:16.) Hesus a compara su mes cu un wardador di carne, y su siguidornan cu un tou di carne. Pensa un rato riba lo siguiente: Si tin dos carne riba un sero y dos carne den un vaye, y tin un otro ta comiendo yerba un otro caminda, nos por bisa cu e cinco carnenan ey ta un tou? No, pasobra por lo general un tou di carne ta keda hunto bou di cuido di su wardador. Di igual manera, nos no por bisa cu nos ta forma parti di un tou si nos isola nos mes for di e rumannan. Pesey nos mester reuni cu nos rumannan cristian pa nos por forma parti di “un tou” bou di cuido di “un wardador.”

10 Nos reunionnan ta yuda nos pa nos ta mas uni cu nos hermandad. (Sal. 133:1) Tin miembronan di famia cu a rechasa algun di nos rumannan spiritual ora nan a bira Testigo. Pero Hesus a priminti cu e lo duna nan un famia spiritual pa stima nan y cuida nan. (Mar. 10:29, 30) Ora bo asisti na e reunionnan regularmente, bo por bira un ruman, un mama of un tata pa e rumannan stima aki. Esey no ta motiva bo pa haci bo maximo esfuerso pa asisti na tur e reunionnan?

 DICON NOS TA AGRADA JEHOVA ORA NOS BAY NOS REUNIONNAN?

11. Con nos por duna Jehova loke e merece ora nos asisti na nos reunionnan?

11 Ora nos asisti na nos reunionnan, nos ta duna Jehova loke e merece. Como nos Creador, Jehova merece alabanza, gloria, gradicimento y honor. (Lesa Revelacion 7:12.) Ora nos canta, haci oracion y papia tocante Jehova na nos reunionnan, nos ta dun’e loke e merece, esta, nos adoracion. Ki un gran privilegio nos tin di adora Jehova kende a haci asina hopi cos pa nos!

12. Con Jehova ta sinti ora nos obedece su mandato pa asisti na nos reunionnan?

12 Jehova merece tambe pa nos obedec’e. Jehova ta pidi nos pa nos no keda sin bay nos reunionnan, specialmente durante e tempo di fin aki. Ora nos obedece e mandato aki di Jehova, nos ta agrad’e. (1 Juan 3:22) E ta mira tur e esfuerso cu nos ta haci pa bay nos reunionnan y ta balora esey.—Heb. 6:10.

13, 14. Con nos ta hala mas cerca di Jehova y Hesus ora nos ta bay nos reunionnan?

13 Ora nos asisti na nos reunionnan, nos ta mustra Jehova cu nos kier hala mas cerca dje y su yiu Hesus. Na reunion, nos Magnifico Instructor ta siña nos, mediante Bijbel, con nos mester biba. (Isa. 30:20, 21) Hasta algun di esnan cu no ta sirbi Jehova y ta bin nos reunionnan ta reconoce cu “di berdad Dios ta meymey di [nos].” (1 Cor. 14:23-25) Jehova ta dirigi nos reunionnan pa medio di su spirito santo, y tur loke nos ta siña eynan ta bini di dje. Pues, ora nos ta bay nos reunionnan, nos ta tende kico Jehova ta bisa nos y nos ta sinti cuanto e ta stima nos. Y como resultado, nos ta hala mas cerca dje.

14 Hesus, e Cabes di e congregacion, a bisa: “Caminda dos of tres ta reuni den mi nomber, eynan mi ta meymey di nan.” (Mat. 18:20) Bijbel ta bisa tambe cu Hesus ta “cana meymey” di e congregacionnan. (Rev. 1:20–2:1) Claramente, Jehova y Hesus ta cu nos y ta fortalece nos na e reunionnan. Con bo ta kere Jehova ta sintie ora e mira cu nos ta haci tur nos esfuerso pa hala cerca dje y su Yiu?

15. Dicon nos por bisa cu ora nos bay reunion nos ta mustra Dios cu nos kier obedec’e?

15 Ora nos asisti na nos reunionnan, nos ta demostra cu nos kier obedece Jehova. Jehova no ta forsa nos pa obedec’ele. (Isa. 43:23) Pues, ora nos ta scoge pa obedec’e, nos ta demostra cu nos ta stim’e cu henter nos curason y cu nos ta kere cu e tin derecho di bisa nos kico pa haci. (Rom. 6:17) Por ehempel, un doño di trabou por presiona nos pa traha asina hopi cu nos no por bay nos reunionnan. Of e gobierno di nos pais por bisa nos cu si nos reuni, nan lo duna nos boet, cera nos den prizon of haci algo mas pio ainda. Of tin biaha bo ta djis prefera di haci algo otro en bes di bay reunion. Den cada un di e situacionnan aki nos tin cu tuma un decision: Ta ken nos lo sirbi? (Echo. 5:29) Corda, si nos dicidi di obedece Jehova, nos lo alegra su curason.—Prov. 27:11.

SIGUI REUNI CU NOS RUMANNAN

16, 17. (a) Con nos por sa cu e reunionnan tabata hopi importante pa e cristiannan di prome siglo? (b) Kico Ruman George Gangas a bisa tocante e reunionnan?

16 E prome cristiannan no a djis reuni un par di biaha so despues di e milager asombroso cu a sosode na Pentecoste di aña 33 despues di Cristo. Nan a sigui “presta atencion na otro ... y no [a] keda  sin bay e reunionnan.” (Heb. 10:24, 25) Hasta ora e gobierno Romano y e lidernan religioso hudiu tabata persigui nan, nan a haci tur nan esfuerso pa sigui bay reunion maske esey no tabata facil.

17 Hopi sirbidor di Jehova den nos tempo a mustra gran aprecio pa e reunionnan cristian. George Gangas, kende a sirbi como miembro di Cuerpo Gobernante pa mas cu 22 aña, a bisa: “Pa mi, reuni cu e rumannan ta un gran goso y un fuente di animacion. Mi ta gusta di ta un di e promenan cu ta yega salon y, si ta posibel, un di e ultimonan cu ta bay. Mi ta sinti un goso ora mi papia cu e rumannan. Ora mi ta cu nan, mi ta sinti mi na cas, den un paradijs spiritual.” El a sigui bisa: “Semper mi ta anhela pa asisti na e reunionnan.”

18. Kico bo ta pensa di e reunionnan, y kico bo ta determina pa haci?

18 Abo ta sinti mescos cu Ruman Gangas tocante e reunionnan? Si ta asina, sigui haci tur bo esfuerso pa bay bo reunionnan regularmente hasta ora esey no ta facil. Mustra Jehova cu bo ta sinti mescos cu Rey David, kende a bisa: “O SEÑOR, mi ta stima e cas caminda bo ta biba.”—Sal. 26:8.

^ [1] (paragraf 3) Algun di nos rumannan no por asisti regularmente na e reunionnan pa motibo di circunstancia fuera di nan control. Por ehempel, e rumannan aki por tin problema serio di salud. Nan por ta sigur cu Jehova ta compronde nan situacion y ta aprecia profundamente tur loke nan ta haci pa ador’e. E ancianonan por percura pa nan scucha e reunionnan, kisas via telefon of door di graba e reunionnan pa nan.

^ [2] (paragraf 3) Wak e cuadro “Motibonan Pakico Nos Mester Bay Nos Reunionnan.”