Sigui pa e contenido

Sigui pa e index

 LES 10

Hesus Semper A Obedece

Hesus Semper A Obedece

Abo ta haya cu semper ta facil pa bo obedece, esta, tende di bo tata cu bo mama?— Tin biaha ta dificil. Bo tabata sa cu Hesus a obedece tanto Jehova como su mayornan?— Su ehempel por yuda abo tambe obedece, hasta ora no ta facil. Ban siña mas di esaki.

Prome cu Hesus a bin na mundo, e tabata cerca su Tata Jehova den cielo. Pero Hesus tabatin mayor aki riba Tera tambe. Nan nomber ta Jose cu Maria. Bo sa ta con nan por a bira su mayornan?—

Jehova a pone Hesus den bariga di Maria y lag’e crece mescos cu tur otro baby ta crece den bariga di nan mama. Ta un milager esey tabata! Mas o menos nuebe luna despues, Hesus a nace. Ta asina Maria cu Jose a bira Hesus su mayornan aki riba Tera.

Tempo cu Hesus tabatin 12 aña so, el a haci algo cu a mustra cuanto e ta stima su Tata, Jehova. Esey a sosode ora cu Hesus y su famia a cana bay leu te na Jerusalem pa un celebracion special. E celebracion ey tabata pa corda e dia cu Jehova a scapa Israel for di Egipto. Riba caminda pa cas, Jose cu Maria no por a haya Hesus niun caminda. Bo sa unda e tabata?—

Pakico Hesus tabata den tempel?

Jose cu Maria a core bay Jerusalem bek y a cana busca Hesus tur caminda. Nan tabata hopi preocupa, pasobra nan no por a hay’e. Pero tres dia despues, nan a bin hay’e den tempel! Bo sa pakico Hesus tabata den tempel?— Pasobra eynan e por a siña di su Tata, Jehova. Hesus ta stima Jehova y e kier a siña con e por a hacie contento. Despues cu Hesus a bira grandi, el a keda obedece Jehova semper, hasta ora esey tabata dificil p’e y ora e mester a sufri. Hesus a obedece Jose cu Maria tambe?— Si, Bijbel ta bisa cu si.

Kico e ehempel di Hesus ta siña bo?— Bo tin cu obedece bo mayornan, hasta ora ta dificil. Bo ta bay hacie?—