Idioma di Seña di Angola

Riba 13 di juni 2025, Ruman Taylor Bornschein, un miembro di e Comite di Sucursal di Angola, a presenta e Traduccion di Mundo Nobo di e Scritura Griego Cristian den Idioma di Seña di Angola. E anuncio aki a tuma luga na e Congreso Regional “Adoracion Puro” di 2025 na Luanda, Angola, cu 1.540 hende presente. E Scritura Griego Cristian a wordo haci disponibel di biaha pa download riba jw.org y den e aplicacion di JW Library y JW Library Sign Language.

Esaki ta e prome traduccion completo di e Scritura Griego Cristian produci den Idioma di Seña di Angola. Testigonan di Jehova a cuminsa produci material basa riba Bijbel den Idioma di Seña di Angola desde 2013. Awe, mas o menos 1.100 ruman ta sirbi den 37 congregacion di idioma di seña y 11 grupo na tur parti di Angola.

Idioma di Seña Venezolano

Dia 14 di juni 2025, Ruman Edgardo López, un miembro di e Comite di Sucursal di Venezuela, a introduci e Traduccion di Mundo Nobo di e Scritura Griego Cristian den Idioma di Seña Venezolano. E anuncio aki a wordo haci na un reunion special na oficina di sucursal na La Victoria, cu 309 hende presente. Acerca, 1.215 hende a sigui e programa via videoconferencia. Mas despues durante e mesun fin di siman tabatin 918 hende cu a wak un grabacion di e programa. A haci e Bijbel aki mesora disponibel pa download riba jw.org y den e aplicacion di JW Library y JW Library Sign Language.

Awe, mas cu 100.000 hende ta uza Idioma di Seña Venezolano. Actualmente, tin mas di 1.300 ruman ta sirbi den 33 congregacion di Idioma di Seña y 34 grupo na tur parti di e pais.

Kituba

Riba 20 di juni 2025, Ruman Mbete François, un miembro di e Comite di Sucursal di Congo (Kinshasa), a anuncia e publicacion di e Traduccion di Mundo Nobo di e Scritura Griego Cristian y e bukinan biblico Genesis y Exodo den idioma Kituba. E anuncio aki a wordo haci na e Congreso Regional “Adoracion Puro” 2025 cu 1.276 hende presente na un Salon di Asamblea na Pointe-Noire, Republica di Congo. E edicion digital di e Bijbel aki a wordo haci disponibel di biaha pa download riba jw.org y den e aplicacion JW Library. Adicionalmente, a distribui un cantidad limita di copia imprimi di e Scritura Griego Cristian na esnan presente na e congreso. Cu tempo, e congregacionnan tambe lo ricibi copia di e edicion imprimi.

Mas di 12 miyon hende cu ta papia Kituba ta biba na Angola, Gabon, y Republica di Congo. Entre nan tin mas di 2.500 ruman cu ta sirbi den 35 congregacion di idioma Kituba.

Idioma di Seña Colombiano

Riba 21 di juni 2025, Ruman Andrés Mejía, un miembro di e Comite di Sucursal di Colombia, a anuncia cu a completa e Traduccion di Mundo Nobo di e Santo Scritura na Idioma di Seña Colombiano. E anuncio a wordo haci durante un programa special na un Salon di Asamblea den e ciudad di Cota, Colombia. E asistencia en persona na e programa tabata 1.980. Cientos mas a sigui e programa via videoconferencia for di 47 diferente sitio na tur parti di e pais. A haci e Bijbel aki mesora disponibel pa download riba jw.org y den e aplicacion di JW Library y JW Library Sign Language.

Esaki ta e prome traduccion completo di Bijbel den Idioma di Seña Colombiano. Mas o menos 500.000 hende ta uza Idioma di Seña Colombiano awe. Testigonan di Jehova ta produci material basa riba Bijbel den Idioma di Seña Colombiano pa mas cu 25 aña. Tin mas di 1.400 ruman ta sirbi actualmente den 35 congregacion di Idioma di Seña y 11 grupo na tur parti di Colombia. Nan ta contento di tin e traduccion completo di Bijbel pa uza den sirbishi, durante estudio personal, y na reunionnan di congregacion.