Dia 6 di juli 2025, e Salon di Asamblea di testigonan di Jehova na Queens, Long Island City, New York, Merca, a tene su ultimo programa. Ora nan a cumpra e salon aki na 1965, el a bira e prome Salon di Asamblea di testigonan di Jehova.

Ruman Claudius Johnson, cu awor tin 102 aña, pa hopi decada tabata encarga cu e Salon di Asamblea na Queens. Despues di asisti na e ultimo programa, el a bisa: “Pa hopi aña, nos tabata tene nos asambleanan den stadion, auditorium di scol of otro luganan cu nos tabata huur. Pero no ta tur e luganan cu nos tabata uza e tempo ey tabata refleha e dignidad di nos adoracion. Nos a wak cu nos tabatin mester di un edificio apropia pa tene programa spiritual pa un publico grandi den un manera confortabel.” Na cuminsamento di 1965, e rumannan a bira masha contento ora cu e organisacion a aproba e compra di un teatro grandi den e bario di Queens, New York. E teatro aki tabata construi na 1930 y tabata keda solamente 11 kilometer for di e Sede Mundial di testigonan di Jehova na Brooklyn, New York. Inmediatamente, e trabounan a cuminsa pa transforma e edificio den un luga digno pa adoracion.

Na final di 1965, e Salon di Asamblea na Queens a habri su portanan y a duna bonbini na esnan cu a asisti na e prome programa. Durante e siguiente seis decadanan, a tene un gran variedad di evento spiritual eynan. Por ehempel, di 1966 te 1984, ta den e Salon aki a tene e programa di graduacion di e Scol Biblico di Galaad di Watchtower. Ademas, Watch Tower Bible and Tract Society of Pennsylvania a tene su reunion anual aki pa varios aña. Mirando atras, ruman Mary Ann Miller, cu tabata presente na e ultimo programa di congreso, a bisa: “Durante e ultimo 60 añanan, e Salon di Asamblea aki a forma un parti importante di mi bida y di hopi otro hende. Aunke kisas e ta solamente un edificio, lo mi keda corda cu amor e hopi bon recuerdonan adorando Jehova cu alegria hunto cu mi rumannan den e salon aki.”

E Salon di Asamblea ta cera su portanan na mesun momento cu ta completa e construccion di e Salon di Asamblea nobo na Long Island, Woodbury, New York, cu un capacidad di 2.100 stoel. Hopi di esnan cu antes tabata reuni na e Salon di Asamblea na Queens, lo uza awor e luga nobo y mas grandi aki. Actualmente, tin mas cu 1.100 Salon di Asamblea na uzo rond di mundo.

Ruman Luis Tellechea, cu tabata encarga cu e Salon di Asamblea na Queens pa mas cu 20 aña, a bisa: “E Salon aki a cumpli cu su meta. Nos lo keda recorda cu amor ‘e dianan di antes.’ Pero, awor ta ora pa cera e capitulo di e historia spiritual rico aki y habri un capitulo nobo y emocionante.”—Deuteronomio 32:7.