Dia 30 di juli 2025, Corte di e Districto di Yevlax na Azerbeidjan a condena ruman Elgiz Ibrahimov di 19 aña y a impone un castigo di un aña di prizon pa a nenga di tuma parti den servicio militar pa motibo di su consenshi. Despues cu corte a duna su sentencia, nan a hiba Elgiz di biaha pa un prizon di maximo siguridad unda lo e sinta su castigo. Esaki ta e prome biaha den casi tres aña cu un di nos rumannan a wordo condena y encarcela pa a nenga di drenta servicio militar a base di consenshi.

Dia 7 di mei 2024, nan a yama Elgiz pa presenta na un oficina militar den e ciudad di Yevlax, cu ta localisa un 265 kilometer pabou di e capital, Baku. Den e reunion ey, Elgiz a splica cu masha respet pakico su conviccion personal no ta permitie sirbi den ehercito. Ademas, Elgiz a expresa cu e ta dispuesto pa cumpli cu servicio civil alternativo. Pero, su peticion a wordo nenga y el a ser acusa oficialmente di ta rechasa pa cumpli cu deber militar.

For di 2019, Corte Europeo di Derechonan Humano a dicta dos fayo contra Azerbeidjan basa riba Articulo 9 di e Tratado di Derechonan Humano pa a encarcela nos rumannan cu ta nenga servicio militar pa motibo di nan consenshi. Ademas, ora cu Azerbeidjan a bira parti di Conseho Europeo na 2001, e gobierno a compromete su mes pa implementa un programa di servicio civil alternativo pa esnan cu ta nenga servicio militar. Awe, casi 25 aña despues, e programa aki ainda no a wordo implementa na Azerbeidjan.

Despues di su sentencia, nan a pone e hoben Elgiz den un cel hunto cu 40 otro prizonero y 10 cama so. A pesar di e circunstancia dificil, e ta sigui confia den Jehova y ta reflexiona regularmente riba e palabranan consolador na Josue 1:9: “Tene curashi y sea fuerte. No tene miedo ni drenta panico, pasobra Jehova, bo Dios, ta cu bo unda cu bo bay.”

Den nos oracionnan nos ta pidi pa Jehova sigui fortalece y consola Elgiz y tambe tur esnan cu ta dicidido pa “obedece Dios na prome luga, y no hende.”—Echonan 5:29.