SPLICACION DI TEXTO DI BIJBEL
Genesis 1:1—“Na Principio Dios A Crea e Cielonan y Tera”
“Na principio Dios a crea e cielonan y Tera.”—Genesis 1:1, Beibel Santu.
“Na kuminsamentu Dios a krea shelu i tera.”—Genesis 1:1, Beibel na papiamentu koriente.
Splicacion di Genesis 1:1
E prome versiculo di Bijbel ta menciona dos berdad importante. Prome, e “cielonan y Tera”, of e universo, tabatin un cuminsamento. Di dos, Dios a crea nan.—Revelacion 4:11.
Bijbel no ta bisa cuanto tempo pasa Dios a crea e universo ni con el a cre’e. Loke si Bijbel ta splica ta cu Dios a crea e universo cu “su forsa y su poder.”—Isaias 40:26.
E palabra “crea” ta bin di un verbo Hebreo cu ta ser uza solamente pa describi algo cu Dios ta haci. a Bijbel ta yama Jehova b Dios e Creador.—Isaias 42:5; 45:18.
Contexto di Genesis 1:1
E prome versiculo di e buki Genesis ta introduci e relato di creacion cu nos ta haya na Genesis capitulo 1 y 2. For di Genesis 1:1 pa 2:4, Bijbel ta conta na un manera simpel con Dios a crea Tera y tur ser bibo, incluso e prome hende homber y muher. Despues di e splicacion cortico aki, Bijbel ta duna mas detaye tocante con e homber y muher a ser crea.—Genesis 2:7-25.
Genesis ta bisa cu a tuma Dios seis “dia” pa crea tur e cosnan ey. E dianan aki no tabata dianan literal di 24 ora, sino un periodo di tempo indetermina. De echo, tin biaha Bijbel sa uza e palabra “dia” pa referi na periodo di tempo cu no ta 24 ora. Por ehempel, e palabra “dia” na Genesis 2:4 ta sinonimo cu e palabra “tempo.” Den e texto ey, tur e seis dianan di creacion hunto ta ser yama un “dia.”
Idea Robes Tocante Genesis 1:1
Idea Robes: Dios a crea universo algun mil aña pasa.
E Berdad: Bijbel no ta indica na ki momento universo a ser crea. E palabranan na Genesis 1:1 no ta contradeci loke e cientificonan ta kere, esta, cu universo ta existi miles di miyones di aña. c
Idea Robes: Genesis 1:1 ta mustra cu Dios ta un Trinidad pasobra e palabra Hebreo cu ta ser uza pa “Dios” ta plural.
E Berdad: E titulo “Dios” ta un traduccion di e palabra Hebreo Elohim, cu ta e forma plural. Pero e palabra no ta indica cantidad of un cantidad di persona, sino grandeza of excelencia. New Catholic Encyclopedia ta confirma cu e forma plural Elohim cu ta ser uza na Genesis 1:1 “semper ta uza un verbo singular pa indica cu, mescos cu e pronomber nos, e forma plural ta indica excelencia y no un cantidad.”—Segundo Edicion, Volumen 6, pagina 272.
Lesa Genesis capitulo 1.
a Relaciona cu e palabra aki, HCSB Study Bible ta bisa: “E verbo Hebreo bara, den su forma activo, ta nifica ‘crea’ y nunca ta referi na algo cu hende ta haci. Pues, bara ta nifica un trabou cu Dios so ta haci.”—Pagina 7.
b Segun Bijbel, e nomber di Dios ta Jehova (Yehova).—Wak e nota na Exodo 3:14 den Beibel na papiamentu koriente.
c Papiando tocante e periodo di tempo cu e palabra Hebreo traduci como “na cuminsamento” ta abarca, The Expositor’s Bible Commentary ta bisa: “E palabra traduci como “na cuminsamento” no ta indica con largo e periodo di tempo tabata.”—Edicion Revisa, Volumen 1, pagina 51.
You May Also Like
PREGUNTA CU BIJBEL TA CONTESTA
Dios A Uza Evolucion pa Crea Diferente Sorto di Bida?
Bijbel no ta contradeci observacionnan cientifico cu tin variacion denter di cada sorto.
LOKE BIJBEL TA SIÑA
Material pa Studia Bijbel
Scoge material pa studia Bijbel cu lo yuda bo disfruta di bo estudio di Bijbel.
