Sigui pa e contenido

Kico Tora Ta?

Kico Tora Ta?

E contesta cu Bijbel ta duna

E palabra “Tora” ta bin for di e palabra Hebreo to·rá, cu por ser traduci como “instruccion”, “siñansa” of “ley.” * (Proverbionan 1:8; 3:1; 28:4, Beibel Santu) E siguiente ehempelnan ta mustra con e palabra Hebreo aki ta ser uza den Bijbel.

  • To·rá hopi biaha ta referi na e prome cinco bukinan di Bijbel: Genesis, Exodo, Levitico, Numbernan y Deuteronomio. Nan ta ser yama tambe e Pentateuco, cu ta bin for di un palabra Griego cu ta nifica “volumen di cinco pida.” Ta Moises a skirbi Tora, pesey e ta ser yama “e buki di ley di Moises.” (Josue 8:31; Nehemias 8:1, Beibel Santu) Aparentemente Tora a ser skirbi originalmente como un buki, pero despues el a ser parti den cinco buki cu ta mas facil pa uza.

  • To·rá por referi tambe na e leynan cu e Israelitanan a haya tocante topiconan specifico, manera “e ley [to·rá] di ofrenda pa pica”, “e ley di lepra” y “e ley pa e Nazareo.”—Levitico 6:25; 14:57; Numbernan 6:13, Beibel santu.

  • To·rá tin biaha ta referi na instruccion y siñansa, sea di mayornan, hendenan sabi of di Dios mes.​—Proverbionan 1:8; 3:1; 13:14; Isaias 2:3, nota.

Kico tin skirbi den Tora, of Pentateuco?

  • Dios su trato cu hende for di creacion te na e morto di Moises.​—Genesis 1:27, 28; Deuteronomio 34:5.

  • E reglanan di e Ley di Moises. (Exodo 24:3) E Ley aki ta contene mas di 600 mandamento. Un di esnan di mas importante ta e Shema, of e declaracion di fe Hudiu. Un parti di e Shema ta bisa: “Stima SEÑOR bo Dios cu henter bo curason, cu henter bo alma y cu tur bo forsa.” (Deuteronomio 6:4-9, Beibel Santu) Hesus a bisa cu esaki ta “e mandamento di mas grandi y esun di prome.”—Mateo 22:36-38.

  • E nomber divino, Jehova, cu ta aparece mas o menos 1.800 biaha. En bes di prohibi e uzo di e nomber di Dios, Tora ta contene mandamento cu a pone e pueblo di Dios pronuncia su nomber.​—Numbernan 6:22-27; Deuteronomio 6:13; 10:8; 21:5.

Ideanan robes tocante Tora

Idea robes: E leynan cu tin den Tora ta pa semper y nunca lo no ser reemplasa.

E berdad: Ta berdad cu algun traduccion di Bijbel ta referi na cierto mandamento specifico di Tora, por ehempel, esnan relaciona cu sabbat, e sacerdocio y e Dia di Expiacion, como algo “pa semper” of “eterno.” (Exodo 31:16; 40:15, Beibel na papiamentu koriente; Levitico 16:33, 34, Beibel Santu) Sinembargo, e palabra Hebreo cu a ser uza den e textonan aki por nifica tambe un periodo di tempo indefini, no necesariamente pa semper. * Despues cu e pacto di Ley di Moises tabata na vigor pa mas o menos 900 aña, Dios a bisa di antemano cu lo el a reemplas’e cu “un alianza [of pacto] nobo.” (Jeremias 31:31-33, Beibel Santu) “Ora [Dios] a bisa ‘un pacto nobo’, el a haci esun anterior anticua.” (Hebreonan 8:7-13) Mas o menos 2.000 aña pasa e morto di Hesucristo a pone e base pa e pacto nobo cu a reemplasa esun prome.​—Efesionan 2:15.

Idea robes: Tradicion Hudiu oral y Talmud tin mesun autoridad cu Tora.

E berdad: No tin prueba biblico cu Dios a duna Moises un ley oral hunto cu e Tora. Al contrario, Bijbel ta bisa: “SEÑOR a bisa Moises: ‘Skirbi e palabranan aki.’” (Exodo 34:27, Beibel Santu) E ley oral, cu despues a ser skirbi y tabata conoci como e Mishna y cu finalmente a bira e Talmud, ta consisti di tradicionnan Hudiu cu a cuminsa cerca e fariseonan. E tradicionnan aki hopi biaha a contradeci Tora. Pa e motibo aki, Hesus a bisa e fariseonan: “Boso a pone e palabra di Dios perde su balor pa motibo di boso tradicionnan.”—Mateo 15:1-9.

Idea robes: No tin mag di siña hende muher Tora.

E berdad: E Ley di Moises a manda henter e pueblo di Israel, incluso hende muher y mucha, scucha lesamento di henter e ley. Dicon? “Pa nan tende y siña y teme SEÑOR [nan] Dios, y percura di cumpli cu tur e palabranan di e ley aki.”—Deuteronomio 31:10-12, Beibel Santu. *

Idea robes: Tora tin mensahenan scondi.

E berdad: Moises, kende a skirbi Tora, a bisa cu no ta necesario descifra su mensahe, pasobra e ta comprendibel y disponibel pa tur hende. (Deuteronomio 30:11-14) E teoria cu tin mensahe scondi den Tora a origina for di Kabbalah, un tradicion mistico Hudiu, cu ta uza metodonan “ingeniosamente inventa” pa interpreta Bijbel. *​—2 Pedro 1:16.

^ par. 3 Wak e edicion revisa di The Strongest Strong’s Exhaustive Concordance of the Bible, number 8451 den e seccion “Hebrew-Aramaic Dictionary-Index to the Old Testament.”

^ par. 13 Wak e Theological Wordbook of the Old Testament, Volumen 2, pagina 672-673.

^ par. 17 Na contraste cu loke Tora mes ta siña, tradicion Hudiu legal hopi biaha a prohibi hende muher di studia Tora. Por ehempel, Mishna ta cita Rabi Eliezer ben Hyrcanus, kende a bisa: “Si un homber siña su yiu muher Tora, ta comosifuera el a siñ’e cosnan vulgar.” (Sotah 3:4) E Talmud di Jerusalem ta bisa: “Ta mihor kima e palabranan di Tora cu siña nan na hende muher.”​—Sotah 3:​19a.

^ par. 19 Por ehempel, e Encyclopaedia Judaica ta describi e idea cu Kabbalah ta duna di e Tora: “Tora no ta nifica nada specifico. Sin embargo, e ta nifica diferente cos, na diferente nivel.”—Di dos edicion, Volumen 11, pagina 659.