Bijbel ta describi suceso y situacion cu lo identifica e temporada net prome cu e “conclusion di e era [actual]”, loke algun traduccion di Bijbel ta referi na dje como “e fin di tempo.” (Mateo 24:3; Beibel Santu) Bijbel ta yama e tempo aki “e ultimo dianan” y “e tempo stipula di e fin.” (2 Timoteo 3:1; Daniel 8:​19, Beibel Santu) E siguiente profecianan ta algun di e caracteristicanan principal di e ultimo dianan:

•   Guera na gran escala.​—Mateo 24:7; Revelacion 6:4.

•   Scarsedad di cuminda.​—Mateo 24:7; Revelacion 6:​5, 6.

•   Temblor grandi.​—Lucas 21:11.

•   Pest, esta pestilencia.​—Lucas 21:11.

•   Aumento di maldad.​—Mateo 24:12.

•   Hende cu ta caba cu planeta Tera.​—Revelacion 11:18.

•   Actitud di hende cu ta bay di malo pa pio. Hopi ta “[malagradec ido], desleal, ... nan lo no ta dispuesto pa cera ningun acuerdo, nan lo ta calumniador, sin dominio propio, feroz, sin amor pa loke ta bon, traidor, cabesura, hincha di orguyo.”​—2 Timoteo 3:​1-4.

•   Famia ta kibra. Hende ta “sin cariño” y mucha ta “desobediente na mayornan.”​—2 Timoteo 3:​2, 3.

•   Amor di mayoria di hende ta fria.​—Mateo 24:12.

•   Hipocresia religioso ta bisto tur caminda.​—2 Timoteo 3:5.

•   Conocemento tocante profecia di Bijbel ta aumenta. Esey ta inclui profecianan cu tin di haber cu e tempo di e fin.​—Daniel 12:4.

•   Mundialmente ta predica e bon noticia di e Reino.​—Mateo 24:14.

•   Tur caminda hende ta indiferente y ta haci cherche di e evidencianan cu e fin ta yegando cerca.​—Mateo 24:37-​39; 2 Pedro 3:​3, 4.

•   Tur e profecianan aki ta cumpli pareu; no djis un par so of mayoria.​—Mateo 24:33.

Nos ta bibando den “e ultimo dianan”?

 Si. Tanto situacion mundial como conteo di tempo a base di Bijbel ta mustra cu e ultimo dianan a cuminsa na aña 1914. Na e aña ey, e Reino di Dios a cuminsa reina den cielo. E prome cos cu e Reino a haci ta saca Satanas e Diabel y su demoñonan for di cielo anto benta nan abou na Tera. (Revelacion 12:​7-​12) E actitud y mal comportacion di hopi hende awe ta mustra cuanto influencia Satanas tin riba humanidad y cu nos ta bibando den “temponan critico, dificil pa trata cu ne.”​—2 Timoteo 3:1.