Sigui pa e contenido

Kico Bijbel Ta Bisa di e Origen di Halloween?

Kico Bijbel Ta Bisa di e Origen di Halloween?

E contesta cu Bijbel ta duna

Bijbel no ta haci mencion di Halloween. Pero, un analisis di e origen di e fiesta aki y custumber relaciona cu ne ta mustra cu e ta estrechamente liga cu creencia falso tocante hende morto, spirito malbado of demoño.—Wak  “Origen y custumber di Halloween.”

Bijbel ta duna e siguiente advertencia: “Entre boso no mag wordo haya ningun hende cu ta ... montado of spiritista, of cu ta consulta cu e mortonan.” (Deuteronomio 18:10-12, Beibel Santu). Aunke tin hende no ta mira nada malo den Halloween, Bijbel si ta mustra cu e practicanan relaciona cu ne ta malo. Na 1 Corintionan 10:20 y 21, Bijbel ta bisa: “Mi no kier pa boso tin comunion cu demoño. Boso no por bebe e copa di Señor y e copa di demoñonan.”—Beibel Santu.

 Origen y custumber di Halloween

  1. Samhain: “Pa sa e origen di Halloween, nos mester bay bek mas cu 2.000 aña pasa te den tempo cu e pueblo Kelta tabata celebra e fiesta di Samhain”, segun The World Book Encyclopedia. “Segun e creencia di e Keltanan, durante Samhain spirito di e mortonan por a cana meymey di e bibonan, y hende bibo por a bishita e mortonan.” Sinembargo, Bijbel ta bisa claramente cu “e mortonan no sa nada.” (Eclesiastes 9:5, Beibel Santu) Pues, e mortonan no por tin contacto cu hende bibo.

  2. Trahe di Halloween, mangel y trick or treat: Segun e buki Halloween—An American Holiday, An American History, algun di e Keltanan tabata bisti trahe straño y spantoso pa laga e mal spiritonan kere cu nan, esta e Keltanan aki, tambe ta criatura sobrenatural pa asina e spiritonan ey laga nan na paz. Otro hende tabata ofrece e spiritonan mangel pa calma nan. Durante Edad Medio na Europa, clero di iglesia catolico a adopta custumber pagano y tabata laga nan miembronan disfrasa nan mes y cana di cas pa cas pa pidi hende regalo. Di otro banda, Bijbel no ta permiti pa hende mescla custumber religioso falso cu adoracion di Dios.—2 Corintionan 6:17.

  3. Spirito, vampiro, homber lobo, heks y zombi: Esakinan pa hopi tempo caba ta liga cu e mundo di mal spirito. (Halloween Trivia) Bijbel ta bisa bon cla cu nos mester lucha contra e forsanan spiritual di maldad y no gosa hunto cu nan.—Efesionan 6:12.

  4. Lampi traha di pampuna of jack-o’-lantern: Durante Edad Medio na Gran Britania, “hende tabatin e custumber di bay di cas pa cas pa pidi cuminda a cambio di un oracion na fabor di e mortonan.” Nan tabata “carga lampi traha di rabi (un tipo di berdura) cu un bela aden cu a representa un alma den purgatorio.” (Halloween​—From Pagan Ritual to Party Night) Otro hende ta bisa cu nan tabata uza e lampinan aki pa core cu mal spirito. Durante siglo 19 na Merca, hende a cuminsa uza pampuna en bes di rabi pasobra tabata facil pa haya pampuna y pa saca su contenido afo y hinca bela aden. E creencianan tras di e custumber ey, esta, alma inmortal, purgatorio y oracion pa e mortonan, no ta basa riba Bijbel.—Ezekiel 18:4.