Sigui pa e contenido

Cuanto Nomber Dios Tin?

Cuanto Nomber Dios Tin?

E contesta cu Bijbel ta duna

Dios tin solamente un nomber personal. Na Hebreo ta skirbie יהוה y na Papiamento nos ta pronunci’e “Jehova.” * Mediante su profeta Isaias, Dios a bisa: “Ami ta Jehova. Esey ta mi nomber.” (Isaias 42:8, NW) E nomber aki ta aparece rond di 7.000 biaha den manuscritonan antiguo di Bijbel​—hopi mas biaha cu cualkier otro termino cu a ser uza pa referi na Dios y hopi mas biaha cu cualkier otro nomber personal. *

Dios tin mas nomber?

Aunke Bijbel ta uza solamente un nomber personal pa Dios, tin hopi otro titulo y descripcion cu Bijbel ta uza pa referi na dje. E siguiente lista ta menciona algun titulo y descripcion di Dios y e ta mustra con cada un di nan ta revela un aspecto di Jehova su personalidad.

Titulo

Caminda e ta aparece den Bijbel

Nificacion

Allah

(Ningun caminda)

E palabra “Allah” ta bin di e idioma Arabier. E no ta un nomber personal sino un titulo cu ta nifica “Dios.” Traduccionnan di Bijbel na Arabier y otro idiomanan ta uza “Allah” na luga di “Dios.”

E Alfa y e Omega

Revelacion 1:8; 21:6; 22:13

“E principio y e fin” ta nifica cu nunca no tabatin un Dios Todopoderoso prome cu Jehova y cu nunca lo no tin un despues di dje tampoco. (Isaias 43:10) Alfa y omega ta e prome y ultimo letternan di e alfabet Griego.

Alfarero

Isaias 64:8

E tin autoridad riba hende individual y nacionnan completo, mescos cu un alfarero tin autoridad riba klei.​—Romanonan 9:​20, 21.

Ami Ta Esun Cu Mi Ta

Exodo 3:​14

Hende a yega di traduci e frase aki na diferente manera. Por ehempel, e traduccion di Rotherham ta bis’e asin’aki: “Lo mi bira loke sea mi kier.” Y E Traduccion di Mundo Nobo di e Santo Scritura a traducie como: “Lo mi resulta di ta loke lo mi resulta di ta.” E descripcionnan ey ta yuda nos compronde e nificacion di Dios su nomber personal cu ta aparece den e siguiente versiculo.—Exodo 3:15

Anciano di Dianan

Daniel 7:​9, 13, 22

Dios no tabatin principio; semper e tabat’ey, hasta prome cu hende of cualkier otro cos a existi.​—Salmo 90:2.

Baranca

Salmo 18:​2, 46

E ta un refugio sigur y un fuente di salbacion.

Dios

Genesis 1:1

Algo of un persona cu ta ser adora; un persona fuerte. E palabra Hebreo ʼElohimʹ ta plural, indicando Jehova su mahestad, dignidad y excelencia.

E Dios di diosnan

Deuteronomio 10:17

E Dios supremo, cu ta diferente for di e “dios[nan] cu no bal nada” cu algun hende ta adora.​—Isaias 2:8, NW.

Dios feliz

1 Timoteo 1:​11

Goso y felicidad ta caracteristicanan di Dios.​—Salmo 104:31.

Esun cu ta scucha oracion

Salmo 65:2

Dios mes ta scucha tur oracion di hende cu acerc’e cu fe.

Esun Santo

Proverbionan 9:​10

Mas santo (moralmente limpi y puro) cu cualkier otro ser.

Haltisimo

Salmo 47:2

E tin e posicion di mas halto cu ta existi.

Creador

Isaias 40:28

El a crea tur cos.

Gran Trahador

Salmo 149:2, NW

El a crea tur cos.​—Revelacion 4:​11.

Redentor

Isaias 41:14

Recupera of cumpra humanidad bek for di pica y morto mediante e sacrificio di rescate di Hesucristo.​—Juan 3:​16.

Rey di eternidad

Revelacion 15:3

Su gobernacion no tabatin principio y lo no tin fin.

Salbador

Isaias 45:21

E ta libra hende di peliger y destruccion.

Señor

Salmo 135:5

Doño; na Hebreo ʼAdhohnʹ y ʼAdhonimʹ.

Señor Soberano

Isaias 1:9, Beibel na papiamentu koriente

E tin autoridad supremo; na Hebreo ʼAdhonaiʹ.

Siñador

Isaias 30:20, 21

E ta ofrece siñansa y guia cu ta beneficia hende.​—Isaias 48:17, 18.

Tata

Mateo 6:9

Esun cu ta duna bida.

Todopoderoso

Genesis 17:1

Su poder ta sin limite. E expresion Hebreo ʼEl Shaddaiʹ, cu ta nifica “Dios Todopoderoso”, ta aparece shete bes den Bijbel.

Wardador

Salmo 23:1

E ta cuida hende cu ta ador’e.

Jaloers

Exodo 34:14

E no kier pa su adoradornan adora niun otro dios. Algun traduccion di Bijbel a yega di traduci esaki como “e no ta tolera rivalidad” y “e ta exigi devocion exclusivo.”​—E Palabra di Dios; Traduccion di Mundo Nobo.

Nomber di luganan den e Scritura Hebreo

Bijbel ta menciona nomber di algun luga cu ta inclui Dios su nomber personal, pero e nombernan ey no ta un substituto pa Dios su nomber personal.

Nomber di luga

Caminda e ta aparece den Bijbel

Nificacion

Jehova-jireh

Genesis 22:13, 14, NW

“Jehova Lo Provee.”

Jehova-nissi

Exodo 17:15, NW

“Jehova Ta Mi Refugio.” (Traduccion di Mundo Nobo di e Santo Scritura) Jehova ta un Dios cu ta percura pa su pueblo por haya proteccion y yudansa cerca dje.​—Exodo 17:13-​16.

Jehova-shalom

Huesnan 6:​23, 24, NW

“Jehova Ta Paz.”

Jehova-shammah

Ezekiel 48:35, NW

“Jehova Ta Eynan.”

Motibonan pa conoce y uza e nomber di Dios

  • Dios su nomber personal mester ta importante p’e, pasobra el a laga skirbie miles di biaha den Bijbel.​—Malakias 1:​11.

  • Hesus, e yiu di Dios, bes tras bes a mustra con importante ta pa uza e nomber di Dios. Por ehempel, el a resa na Jehova bisando: “Bo nomber sea santifica.”​—Mateo 6:9; Juan 17:6.

  • Esnan cu siña conoce e nomber di Dios y uz’e ta cuminsa cultiva un amistad cu Jehova. (Salmo 9:​10; Malakias 3:​16) Un amistad asina ta yuda nan beneficia di e promesa cu Dios a haci: “Pasobra el a stima mi, pesey lo mi libr’e; lo mi proteh’e, pasobra e conoce mi nomber.”​Salmo 91:14.

  • Bijbel mes ta bisa: “Tin esnan cu ta ser yama ‘dios’—sea den cielo of riba Tera, mescos cu tin hopi ‘dios’ y hopi ‘señor.’” (1 Corintionan 8:​5, 6) Pero Bijbel ta identifica e unico Dios berdadero claramente na su nomber, esta, Jehova.​—Salmo 83:18, NW.

^ par. 3 Algun experto di e idioma Hebreo ta prefera e traduccion “Yahweh” pa e nomber di Dios.

^ par. 3 E forma abrevia di e nomber divino “Yah” (of, “Jah”), ta aparece rond di 50 biaha den Bijbel. Esey ta inclui den e palabra “Aleluya” (of, “Haleluya”) cu ta nifica “Alaba Yah.”​—Revelacion 19:1.