Sigui pa e contenido

Kico Ta Bautismo?

Kico Ta Bautismo?

E contesta cu Bijbel ta duna

Bautismo ta encera cu un hende ta bay completamente bou di awa y sali bek for di dje. * Pesey Hesus a batisa den un riu suficiente hundo. (Mateo 3:13, 16) Mescos tambe, un homber di Etiopia a puntra pa e ser batisa ora el a yega na “un luga cu tabatin awa.”—Echonan 8:36-40.

Nificacion di bautismo

Bijbel ta compara bautismo cu un entiero. (Romanonan 6:4; Colosensenan 2:12) Bautismo den awa ta nifica cu un persona ta muri pa cu su manera di biba anterior y ta cuminsa un manera di biba nobo como un cristian dedica na Dios. Tanto e pasonan cu ta hiba na bautismo como e bautismo mes ta habri caminda pa un hende por haya un consenshi limpi basa riba su fe den e sacrificio di Hesucristo. (1 Pedro 3:21) Pesey Hesus a bisa cu su siguidornan mester batisa.​—Mateo 28:19, 20.

Bautismo ta kita pica?

No. Bijbel ta bisa cu ta solamente pa medio di e sanger drama di Hesus nos por ta limpi di pica. (Romanonan 5:8, 9; 1 Juan 1:7) Pero pa un persona por beneficia di Hesus su sacrificio, e mester tin fe den Hesus, cambia su manera di biba pa e ta na harmonia cu e siñansanan di Hesus y batisa.​—Echonan 2:38; 3:19.

Bijbel ta apoya bautismo di baby?

No. Niun caminda den Bijbel ta menciona bautismo di baby. Cierto religionnan ta haci un ceremonia caminda nan ta “batisa” un baby (nan ta sprengo of basha awa riba su cabes) y dun’e un nomber. Pero, bautismo cristian ta pa esnan cu tin suficiente edad pa compronde “e bon noticia tocante e Reino di Dios” y kere den loke nan ta siña. (Echonan 8:12) Pa bo por yega na e bautismo ey, bo mester scucha e palabra di Dios, acept’e y arepenti. Un baby no por tuma e pasonan aki.​—Echonan 2:22, 38, 41.

Ademas, Bijbel ta bisa cu Dios ta mira yiunan di mayornan cristian como santo of limpi den su bista pa motibo cu e mayornan mes ta fiel na dje. (1 Corintionan 7:14) Si un baby mester batisa, lo e no tin nodi depende di e fieldad di su mayornan. *

Ideanan robes tocante bautismo cristian

Idea robes: Pa un hende batisa, por sprengo of basha awa riba dje en bes di bay completamente bou di awa.

Echo ta cu tur bautismo menciona den Bijbel ta encera bay completamente bou di awa. Por ehempel, ora discipel Felipe a batisa e homber di Etiopia, nan a “baha den e awa” pa e bautismo. Despues nan a “sali for di awa.”—Echonan 8:36-39. *

Idea robes: Bijbel ta duna di compronde cu famianan completo, incluso baby, tabata batisa. Por ehempel, e ta bisa tocante un wardador di preso na Filipo: “E cu henter su famia a ser batisa.”—Echonan 16:31-34.

Echo ta cu e famianan di e wardador di preso cu a comberti y batisa a compronde “e palabra di Jehova” y a “keda masha contento”, segun e relato di Bijbel. (Echonan 16:32, 34) E echonan ey ta indica cu si tabatin baby den e famia di e wardador di preso, nan lo no tabata inclui den e bautismo pasobra nan lo no por a compronde e palabra di Jehova.

Idea robes: Pa Hesus, baby tambe mester a batisa pasobra el a bisa cu e Reino ta pertenece na mucha.​—Mateo 19:13-15; Marco 10:13-16.

Echo ta cu Hesus no tabata papia di bautismo ora el a bisa e palabra nan ey. E tabata mustra mas bien cu esnan cu ta cualifica pa e Reino di Dios mester ta manera mucha, es decir, humilde y dispuesto pa siña.​—Mateo 18:4; Lucas 18:16, 17.

^ par. 3 E traduccion Griego pa e palabra “bautismo” ta bin for di un palabra cu ta nifica “bay completamente bou di awa.” Wak e Theological Dictionary of the New Testament, Volumen 1, pagina 529.

^ par. 10 Segun The International Standard Bible Encyclopedia, “niun caminda den e Testament Nobo tin luga pa bautismo di baby.” Tambe tin skirbi cu bautismo di baby a bin for di “un calculacion robes y exagera di e balor di bautismo”, esta, cu bautismo mes ta laba kita pica.​—Volumen 1, pagina 416-417.

^ par. 13 E New Catholic Encyclopedia ta bisa, bou di e subtema “Bautismo (den Bijbel)”: “Ta bisto cu bautismo den religionnan di prome tabata pa medio di bay completamente bou di awa.”—Volumen 2, pagina 59.