Sigui pa e contenido

Ki Dia Hesus A Nace?

Ki Dia Hesus A Nace?

E contesta cu Bijbel ta duna

Bijbel no ta bisa exactamente ki dia Hesucristo a nace, y e siguiente obranan di referencia ta confirma esaki:

  • E fecha exacto di Cristo su nacemento no ta conoci.”—New Catholic Encyclopedia.

  • Ningun hende no sa exactamente ki dia Cristo a nace.”—Encyclopedia of Early Christianity.

Aunke Bijbel no ta duna e fecha exacto di Hesus su nacemento, e ta menciona si dos suceso rond di su nacemento cu ta laga hopi hende yega na e conclusion cu e no a nace dia 25 di december.

Hesus no a nace den winter

  1. E registracion. Den e dianan prome cu Hesus a nace, Cesar Augusto a saca un decreto cu “tur hende mester a registra nan mes.” Henter e pueblo tabata obliga pa bay registra “cada un na su mes stad”, loke a nifica cu Jose y Maria mester a biaha un siman of mas pa yega Betlehem. (Lucas 2:1-3) E hendenan lo no a gusta e idea cu nan mester a cumpli cu e decreto ey cu probablemente tabatin e meta pa cobra belasting y recluta hende pa servicio militar. En bista di esey, no ta logico cu Augusto lo a provoca hende di e nacion ey mas ainda, obligando nan pa haci un biahe largo asina den pleno winter.

  2. E carnenan. Tabatin wardador di carne cu tabata “biba pafo den cunucu ... [vigilando] nan tounan henter anochi.” (Lucas 2:8) E buki Daily Life in the Time of Jesus a splica cu e carnenan tabata keda pafo den aire liber for di “e siman prome cu Pasco Hudiu [na cabamento di maart] te meymey di november.” E buki ta sigui bisa: “Durante winter e carnenan tabata keda bou di dak pa haya proteccion contra e friu di winter.” Pues, esey so caba ta un motibo pa conclui cu e fecha tradicional di Pasco di nacemento cu ta cay den winter cu tur probabilidad no ta corecto, pasobra e Evangelio di Lucas ta bisa cu e wardadornan di carne tabata pafo den cunucu cu nan bestianan.

Na comienso di herfst

Pa calcula mas o menos na ki tempo Hesus a nace, nos mester conta for di e dia cu el a muri bay bek den tempo. El a muri dia 14 di Nisan durante Pasco Hudiu den lente di aña 33 di nos era. (Juan 19:14-16) Como cu Hesus tabatin mas o menos 30 aña di edad ora el a cuminsa su ministerio cu a dura tres aña y mei, nos por conclui cu el a nace na comienso di herfst di aña 2 prome cu nos era.—Lucas 3:23.

Dicon hende ta celebra Pasco dia 25 di december?

Siendo cu no tin prueba cu Hesus a nace dia 25 di december, dicon hende ta celebra Pasco riba e dia ey anto? E Encyclopædia Britannica ta bisa cu lidernan religioso probablemente a scoge e fecha ey, pasobra “e tabata cay pareu cu e fiesta Romano relaciona cu ‘e renacemento di e solo invencibel’”, riba e dia di solsticio di winter. Segun Encyclopedia Americana, hopi erudito ta di opinion cu lidernan religioso a haci esey “pa asina hende pagano cu a comberti por a acepta cristianismo mas facil.