Sigui pa e contenido

Dios Ta Tur Caminda of Omnipresente?

Dios Ta Tur Caminda of Omnipresente?

E contesta cu Bijbel ta duna

Dios por mira tur cos y e por haci su boluntad unda cu e ta desea. (Proverbionan 15:3; Hebreonan 4:13) Sinembargo, Bijbel no ta siña cu e ta omnipresente, esta, cu e ta tur caminda, den tur cos. Mas bien, Bijbel ta mustra cu e ta un persona y cu e tin su luga di biba.

  • Con Dios ta: Dios ta un persona spiritual. (Juan 4:​24) E ta invisibel pa wowo humano. (Juan 1:​18) Den Bijbel, hende cu a mira Dios den vision semper a splica cu e ta biba den un luga fiho. Nunca Bijbel ta describie como omnipresente.​—Isaias 6:​1, 2; Revelacion 4:​2, 3, 8.

  • Dios su luga di biba: Dios ta biba den e region spiritual, locual ta diferente for di creacion visibel. Dios su “luga di biba” ta den e region spiritual ey. (1 Reynan 8:​30) Bijbel ta menciona un ocasion ora cu criaturanan spiritual “a drenta pa tuma nan puesto dilanti Jehova.” * Den un sentido, esey ta mustra cu Dios ta biba den un luga specifico.​—Job 1:6.

Si Dios no ta omnipresente, e por ta interesa den mi personalmente?

Si. Dios ta profundamente interesa den cada hende, individualmente. Maske Dios ta biba den e region spiritual, e ta wak esnan cu kier agrad’e y e ta actua na nan fabor. (1 Reynan 8:​39; 2 Cronicanan 16:9) Wak con Jehova ta demostra interes den su adoradornan sincero:

  • Ora bo haci oracion: Na momento cu bo resa na Jehova, e por scucha bo.​—2 Cronicanan 18:31.

  • Ora bo ta deprimi: “SEÑOR ta cerca di e hende di curason kibra, y ta salba esnan di spirito abati.”​—Salmo 34:18, Beibel Santu.

  • Ora bo mester di guia: Jehova lo “instrui bo y siña bo” pa medio di su Palabra, Bijbel.​—Salmo 32:8, Beibel Santu.

Ideanan robes

Idea robes: Dios ta tur caminda den creacion.

E berdad: Dios no ta biba ni riba Tera ni niun caminda den nos universo. (1 Reynan 8:​27) Ta berdad cu e streanan y otro obranan di Su man “ta conta di e gloria di Dios.” (Salmo 19:1, Beibel Santu) Sinembargo, Dios no ta biba den su creacion, mescos cu un pintor no ta biba den su pintura. Pero toch un pintura ta bisa nos algo di e pintor. Di igual manera, mundo ta revela e “cualidadnan invisibel” di e Creador, manera su poder, sabiduria y amor.​—Romanonan 1:​20.

Idea robes: Dios no por sa tur cos y ser todopoderoso si e no ta tur caminda of omnipresente.

E berdad: Dios su spirito santo, of forsa activo, ta Dios su poder den accion. Mediante su spirito santo, Dios por sa tur cos y haci tur cos, tur caminda sin cu e mester t’ey presente personalmente.​—Salmo 139:7.

Idea robes: Salmo 139:8 ta siña nos cu Dios t’ey tur caminda pasobra e ta bisa: “Si mi subi na cielo, bo ta eynan; si mi habri mi cama den Seol, mira, eynan tambe bo ta!” (Beibel Santu)

E berdad: E texto ey no ta papia tocante unda Dios ta. Den un manera poetico e ta siña cu no tin niun luga cu ta mucho leu pa Dios yuda nos.

^ par. 5 Bijbel ta bisa cu Dios su nomber ta Jehova.