Sigui pa e contenido

E Relato Tocante Noe y e Diluvio Ta Djis un Cuenta?

E Relato Tocante Noe y e Diluvio Ta Djis un Cuenta?

Loke Bijbel ta bisa

 E Diluvio den tempo di Noe ta algo cu a sosode di berdad. Dios a trece un diluvio pa asina caba cu mal hende, pero Dios a bisa Noe pa traha un arca pa salba bon hende y bestia. (Genesis 6:11-20) Nos por kere cu e Diluvio a sosode di berdad pasobra e ta registra den Bijbel, cu “ta inspira di Dios.”—2 Timoteo 3:16.

 Realidad of fabula?

 Bijbel ta mustra cu Noe tabata un persona cu a existi di berdad y cu e Diluvio tabata un suceso real, no un fabula of mito.

  •   E escritornan di Bijbel no tabatin duda cu Noe tabata un persona real. Por ehempel, e escritornan di Bijbel, Esdras y Lucas, a haci bon investigacion y a inclui Noe den e genealogia di e nacion di Israel. (1 Cronicanan 1:4; Lucas 3:36) E escritornan di e Evangelionan, Mateo y Lucas, a skirbi loke Hesus a bisa tocante Noe y e Diluvio.—Mateo 24:37-39; Lucas 17:26, 27.

     Ademas, Profeta Ezekiel y Apostel Pablo a papia di Noe como un ehempel di fe y husticia. (Ezekiel 14:14, 20; Hebreonan 11:7) Lo tabata logico pa e escritornan aki papia di un persona cu nunca a yega di existi como un ehempel pa nos imita? Ta claro cu Noe y otro homber y muher di fe ta ehempel pa nos imita, pasobra nan tabata hende cu a yega di existi di berdad.—Hebreonan 12:1; Santiago 5:17.

  •   Bijbel ta duna detaye specifico tocante e Diluvio. E relato biblico tocante e Diluvio no ta cuminsa di e manera aki: “Un dia tabatin”, comosifuera ta un cuenta di fantasia e ta. Mas bien, Bijbel ta menciona e aña, luna y dia cu e sucesonan relaciona cu e Diluvio a tuma luga. (Genesis 7:11; 8:4, 13, 14) Ademas, Bijbel ta duna e midinan di e arca cu Noe a traha. (Genesis 6:15) E detayenan aki ta demostra cu Bijbel ta papia di e Diluvio como un realidad, y no como un fabula.

 Dicon Dios a trece e Diluvio?

 Segun Bijbel, prome cu e Diluvio hende tabata haci hopi maldad. (Genesis 6:5) Bijbel ta bisa tambe cu “Tera tabata corumpi den bista di Dios” pasobra tabatin hopi violencia y inmoralidad sexual riba Tera.—Genesis 6:11; Judas 6, 7.

 Bijbel ta splica cu angelnan malbado cu a bandona cielo y cu a tene relacion sexual cu hende muher a causa hopi di e problemanan aki. E angelnan ey a haya yiu gigante cu tabata yama Nefilim, kendenan a trece hopi sufrimento pa hende. (Genesis 6:1, 2, 4, NW) Dios a dicidi pa caba cu maldad riba Tera y duna bon hende oportunidad pa cuminsa di nobo.—Genesis 6:6, 7, 17.

 E hendenan tabata sa cu e Diluvio tabata na caminda?

 Si. Dios a bisa Noe kico lo a bay pasa y el a bis’e traha un arca pa salba su famia y e bestianan. (Genesis 6:13, 14; 7:1-4) Noe a spierta hende tocante e destruccion cu lo a bin pronto, pero nan no kier a scucha su spiertamento. (2 Pedro 2:5) Bijbel ta bisa: “Nan no a haci caso te ora e Diluvio a bin y a lastra nan tur bay cu ne.”—Mateo 24:37-39.

 Con e arca di Noe tabata?

 E arca tabata un caha largo grandi, di mas o menos 133 meter largo, 22 meter hancho y 13 meter halto. * E arca tabata traha di palo di gofer y cubri di paden y pafo cu breu. E arca tabatin tres piso, of dek, y varios compartimento. Tabatin un porta den banda di e arca y aparentemente un bentana parti ariba. Probablemente, e arca tabatin un dak poco schuin pa awa no keda para riba dje.—Genesis 6:14-16.

 Cuanto tempo a tuma Noe pa traha e arca?

 Bijbel no ta bisa cuanto tempo a tuma Noe pa traha e arca, pero ta parce cu el a tuma varios decada pa construye. Noe tabatin mas cu 500 aña di edad ora su prome yiu a nace y e tabatin 600 aña di edad ora e Diluvio a bin. *Genesis 5:32; 7:6.

 Dios a bisa Noe pa traha e arca despues cu su tres yiunan tabata adulto y casa, loke por a tuma un 50 pa 60 aña. (Genesis 6:14, 18) Si ta asina, ta parce rasonabel pa conclui cu a tuma un 40 pa 50 aña pa traha e arca.

^ Bijbel ta duna e midinan di e arca den codo. E codo hebreo comun tabata 44,45 centimeter.”—The Illustrated Bible Dictionary, edicion revisa, parti 3, pagina 1635.

^ Pa loke ta e cantidad di aña di bida di hende manera Noe, wak e articulo “Los personajes bíblicos: ¿de veras vivieron tanto?” den La Atalaya di 1 di december 2010.