Sigui pa e contenido

Dicon e Holocaust A Tuma Luga? Dicon Dios No A Par’e?

Dicon e Holocaust A Tuma Luga? Dicon Dios No A Par’e?

Hopi hende cu a perde nan sernan keri ta haci e preguntanan ey pa nan haya no solamente contesta, sino tambe consuelo. Otronan ta considera e Holocaust como un di e cosnan di mas horibel cu por a pasa humanidad, y pesey nan tin hopi problema pa kere den Dios.

Ideanan robes encuanto Dios y e Holocaust

Mito: No ta bon pa puntra pakico Dios a permiti Holocaust.

Echo: Hende cu tin hopi fe a yega di puntra pakico Dios ta permiti maldad. Por ehempel, profeta Habacuk a puntra Dios: “Pakiko pasa tur e mizeria aki? Kon Abo mes ta tolerá e inhustisia ei? Unda ku mi bira, destrukshon i violensia mi ta mira, pleitu y desunion.” (Habacuk 1:3, Beibel na papiamentu koriente) En bes di reprende Habacuk, Dios a laga skirbi e preguntanan ey den Bijbel pa tur hende lesa.

Mito: Dios no ta preocupa cu sufrimento di hende.

Echo: Dios ta odia maldad y e sufrimento cu esey ta trece cu ne. (Proverbionan 6:16-19) Den tempo di Noe Dios “tabata tristo” pa motibo di e violencia cu a plama riba Tera. (Genesis 6:5, 6, Beibel Santu) Sin duda, e Holocaust tambe a pone Dios sufri hopi.—Malakias 3:6.

Mito: Dios a uza e Holocaust pa castiga e Hudiunan.

Echo: Dios a laga e Romanonan destrui Jerusalem den prome siglo. (Mateo 23:37–24:2) Sinembargo, for di e tempo ey padilanti, Dios no a faborece ni castiga ningun pueblo of nacion particular. Den bista di Dios “no tin diferensha entre hudiu i no hudiu.”—Romanonan 10:12, Beibel na papiamentu koriente.

Mito: Si ta existi un Dios amoroso y todopoderoso, lo el a preveni e Holocaust.

Echo: Aunke Dios mes no ta causa sufrimento, tin biaha e ta permitie pa un tempo.—Santiago 1:13; 5:11.

Dicon Dios a permiti e Holocaust tuma luga?

Dios a permiti e Holocaust tuma luga pa e mesun motibo cu el a permiti sufrimento a traves di historia, esta, pa resolve cierto cuestion moral cu a surgi den pasado. Bijbel ta mustra bon cla cu ta Diabel ta goberna mundo actualmente y no Dios. (Lucas 4:1, 2, 6; Juan 12:31) Un otro articulo cu ta conecta cu esaki ta bay den mas detaye dicon Dios ta permiti sufrimento. Pero e dos siguiente puntonan basa riba Bijbel por yuda splica pakico Dios a permiti e Holocaust tuma luga.

  1. Mal uzo di boluntad liber a causa e Holocaust. Dios a bisa e prome sernan humano, Adam y Eva, kico el a spera di nan, pero e no a obliga nan pa obedec’e. Nan a dicidi pa nan mes loke ta bon y malo, y nan mal escogencia a trece consecuencianan teribel pa humanidad. Anto for di e tempo ey padilanti, hopi hende a sufri pa motibo di mal decision cu nan a tuma. (Genesis 2:17; 3:6; Romanonan 5:12) Manera e buki Statement of Principles of Conservative Judaism a bisa: “Hopi sufrimento di hende rond mundo ta resultado directo di mal uzo di e boluntad liber cu nos a ricibi.” En bes di kita hende su boluntad liber, Dios a duna nan tempo pa purba dirigi nan asuntonan na nan mes manera.

  2. Dios por y lo drecha tur e daño cu e Holocaust a causa. Dios ta priminti pa lanta miyones di hende for di morto, incluso e victimanan di Holocaust. Lo e elimina tambe tur recuerdo doloroso y horibel cu e sobrevivientenan a keda cu ne. (Isaias 65:17; Echonan 24:15) E amor cu Dios tin pa hende ta un garantia cu lo e cumpli cu e promesanan aki.—Juan 3:16.

Hopi victima y sobreviviente di e Holocaust por a mantene nan fe y haya un proposito den bida, pasobra nan a compronde dicon Dios a permiti maldad y con lo e elimina su efecto.