Sigui pa e contenido

Kico Bijbel Ta Bisa Tocante Pasco di Nacemento?

Kico Bijbel Ta Bisa Tocante Pasco di Nacemento?

E contesta cu Bijbel ta duna

Bijbel no ta bisa ki dia Hesus a nace ni cu hende mester celebra e dia di su nacemento. Segun e enciclopedia di McClintock y Strong, “no ta Dios a manda hende celebra Pasco ni e no ta den TN [Testament Nobo].”

Un analisis di historia relaciona cu Pasco ta mustra cu su origen mas bien ta den rito religioso pagano. Bijbel ta mustra cu Dios no ta keda contento at all si nos purba di ador’e na un manera cu e no ta aproba.—Exodo 32:5-7.

Origen di tradicion relaciona cu Pasco

  1. Celebracion di Hesus su nacemento: “E cristiannan di prome siglo no tabata celebra [Hesus] su nacemento, pasobra nan tabata considera e fiesta di hacimento di aña un custumber pagano.”—The World Book Encyclopedia.

  2. Dia 25 di december: No tin prueba cu Hesus a nace riba e dia ey. E lidernan religioso probablemente a scoge e dia aki, pasobra e tabata cay pareu cu e fiesta pagano cu ya nan tabatin custumber di celebra rond di e asina yama solsticio di winter. Esaki ta e dia di aña cu tin menos claridad di solo durante di dia.

  3. Dunamento di regalo, bankete y fiesta: Encyclopedia Americana ta bisa: “Saturnalia, un fiesta Romano cu nan tabata celebra meymey di december, a sirbi como modelo pa varios tradicion festivo relaciona cu Pasco. Por ehempel, ta di e fiesta ey a bin e custumber di tene bankete grandi, duna regalo y cende bela.” Ademas, Encyclopædia Britannica ta bisa: “Durante Saturnalia, tur hende tabata haya liber di trabou y no tabatin hacimento di negoshi.”

  4. Luz di Pasco: Segun Encyclopedia of Religion, e famianan na Europa tabata dorna nan cas “cu luz y tur tipo di mata cu semper ta berde” pa celebra e solsticio di winter y pa proteha nan mes contra mal spirito.

  5. Maretak (mistletoe) y otro mata berde: “E Druidenan [un pueblo di Gran Britania di antes] tabata kere cu e mata di maretak tin poder magico. Anto pa loke ta e mata di hulst cu semper ta berde, hende tabata ador’e como un simbolo di renacemento di solo.”—The Encyclopedia Americana.

  6. Palo di Pasco: “E adoracion di palo tabata comun pa hende Europeo pagano, y nan a sigui cu e tradicion ey ora nan a bira cristian.” Un di e practicanan deriva di e tipo di adoracion ey ta e custumber di “pone un palo di Pasco na entrada of den interior di cas durante e fiesta di winter.”—Encyclopædia Britannica.