Sigui pa e contenido

Bijbel a Cambia a Traves di Añanan?

Bijbel a Cambia a Traves di Añanan?

No. Un comparacion di manuscritonan antiguo ta mustra cu Bijbel no a cambia maske nan a copi’e pa miles di aña uzando material cu ta caba na nada.

Esaki kiermen cu nunca nan no a haci fout ora di copi’e?

A haya miles di manuscritonan antiguo di Bijbel. Algun di esakinan tabatin varios diferencia, mustrando cu foutnan a wordo haci ora di copia. Mayoria di e diferencianan aki ta chikito y no ta cambia e nificacion di e texto. Sinembargo, a descubri algun cambionan importante. Ta parce cu algun di e cambionan aki a wordo haci hopi tempo pasa cu e intencion pa cambia e mensahe di Bijbel. Laga nos wak dos ehempel:

  1. Algun traduccion bieu di Bijbel ta bisa na 1 Juan 5:7: “den cielo, e Tata, e Palabra, y e Spirito Santo: y nan tres ta un.” Sinembargo, manuscritonan confiabel ta confirma cu e palabranan aki no ta den e texto original. Nan a wordo agrega despues.  * Traduccionnan moderno di Bijbel confiabel a laga nan afo.

  2. Dios su nomber personal ta aparece miles di biaha den manuscritonan antiguo di Bijbel. Sinembargo, hopi traduccion di Bijbel a reemplas’e cu titulonan manera “Señor” of “Dios.”

Con nos por ta sigur cu no tin hopi mas fout?

Awe, ta mas facil cu nunca pa haya foutnan pasobra nan a descubri hopi manuscrito. * Kico un comparacion di e manuscritonan aki a revela tocante exactitud dje Bijbel awe?

  • Tocante e Scritura Hebreo of e “Testament Bieu”, experto William H. Green a bisa: “Cu tur siguransa por bisa cu ningun otro obra di antiguedad a wordo transmiti cu tanto exactitud.”

  • Tocante e Scritura Griego Cristian of e “Testament Nobo”, F. F. Bruce, un experto riba tereno di Bijbel, a skirbi: “Tin hopi mas evidencia pa loke tin skirbi den e Testament Nobo cu pa e obranan skirbi di autornan clasico. Y toch ningun hende ta cuestiona e autenticidad di e obranan aki.”

  • Sir Frederic Kenyon, un experto renombra di manuscritonan di Bijbel, a bisa cu un hende “por wanta henter Bijbel den su man y bisa sin miedo of duda cu e tin e Palabra di Dios, transmiti di generacion pa generacion a traves di siglonan sin foutnan importante.”

Ki motibonan mas nos tin pa confia cu Bijbel a wordo transmiti cu exactitud?

  • Copistanan hudiu y cristian a conserva relatonan cu ta saca na cla e foutnan grandi di e pueblo di Dios. * (Numbernan 20:12; 2 Samuel 11:​2-4; Galationan 2:​11-​14) Tambe, nan a conserva relatonan cu ta condena e desobediencia di e nacion Hudiu y relatonan cu ta saca na cla doctrinanan di hende. (Oseas 4:2; Malakias 2:​8, 9; Mateo 23:​8, 9; 1 Juan 5:​21) Cu exactitud nan a copia e relatonan aki y a mustra cu nan ta honesto y cu nan tin respet profundo pa Dios su Palabra sagrado.

  • No ta rasonabel pa kere cu Dios, kende a inspira Bijbel, a haci sigur tambe pa conserva su mensahe? * (Isaias 40:8; 1 Pedro 1:​24, 25) Al fin y al cabo, su intencion no tabata pa hendenan di antiguedad so beneficia di dje pero anos tambe awe. (1 Corintionan 10:11) En realidad, “tur loke a ser skirbi anteriormente a ser skirbi pa nos instruccion, pa asina mediante nos perseverancia y e consuelo for di e Scritura nos por tin speransa.”​—Romanonan 15:4.

  • Hesus y su siguidornan a cita for di copianan di e Scritura Hebreo. Nan no a expresa ni un tiki preocupacion pa cu e exactitud di e textonan antiguo ey.​—Lucas 4:​16-​21; Echonan 17:​1-3.

^ par. 3 E palabranan aki no ta den e Codex Sinaitico, e Codex Alejandrino, e Manuscrito Vaticano 1209, e Vulgata original Latin, e Version Siriaco Filoxeniano-Harclense of e Peshitta Siriaco.

^ par. 5 Por ehempel, a descubri mas cu 5.000 manuscrito Griego di e Testament Nobo of Scritura nan Griego Cristian.

^ par. 9 Bijbel ta siña cu Dios su representantenan humano por faya. E ta bisa cu “no tin ningun hende ku no ta peka.”​—1 Reynan 8:​46.

^ par. 10 Dios no a bisa e escritornan humano kico pa skirbi palabra pa palabra. Pero Bijbel ta bisa cu el a guia nan pensamentonan.​—2 Timoteo 3:​16, 17; 2 Pedro 1:​21.