Sigui pa e contenido

Kico e Arca di Pacto Ta?

Kico e Arca di Pacto Ta?

E contesta cu Bijbel ta duna

E arca di pacto tabata un caha sagrado cu e Israelitanan di antiguedad a traha segun e mandamento y diseño cu Dios a duna nan. Den dje tabatin “e testimonio”, es decir, e Dies Mandamento skirbi riba dos tabla di piedra.—Exodo 25:8-10, 16; 31:18, Beibel Santu.

  • Construccion di e arca. E arca tabata dos codo y mei largo, un codo y mei hancho y un codo y mei halto (111 x 67 x 67 cm). E tabata traha di palo di acacia y tabata fura cu oro di paden y pafo y tabatin un rand decorativo. Su tapa tabata traha di oro puro y tabatin dos kerubin riba dje, un na cada banda. E kerubinnan tabata dilanti di otro cu nan cara pa e tapa y nan halanan habri manda ariba, asina cubriendo e tapa. E arca tabatin cuater renchi di oro na cada skina net riba su pianan. Nan a pasa bara di palo di acacia fura cu oro door di e renchinan y a uza e baranan aki pa carga e arca.​—Exodo 25:10-21; 37:6-9.

  • Sitio di e arca. Na prome instante, e arca tabata den un parti di e tabernakel cu yama e Luga Santisimo. E tabernakel tabata un tent di adoracion cu nan por a transporta y nan a trah’e na e mesun tempo cu nan a traha e arca. Un cortina a separa e Luga Santisimo for di bista di e sacerdotenan y e pueblo. (Exodo 40:3, 21) Solamente e sumo sacerdote por a drenta den e Luga Santisimo y wak e arca un bes pa aña, riba e Dia di Expiacion. (Levitico 16:2; Hebreonan 9:7) Despues, nan a hiba e arca den e Luga Santisimo di e tempel di Salomon.​—1 Reynan 6:14, 19.

  • Proposito di e arca. Den e arca tabatin cierto articulonan sagrado cu a corda e Israelitanan di e pacto, of acuerdo, cu Jehova a cera cu nan riba Sero Sinai. Tambe e arca tabatin un funcion importante den e ceremonia di e Dia di Expiacion.​—Levitico 16:3, 13-17.

  • Contenido di e arca. E prome cosnan cu tabatin den e arca tabata e tablanan di piedra cu e Dies Mandamentonan skirbi riba nan. (Exodo 40:20) Despues nan a pone tambe un pochi di oro cu mana aden y “e garoti di Aaron cu a saca conopi di flor.” (Hebreonan 9:4; Exodo 16:33, 34; Numbernan 17:10) Aparentemente, na un dado momento, nan a saca e pochi y e garoti, pasobra nan no tabata den e arca ora el a bay den e tempel.​—1 Reynan 8:9.

  • Transporta e arca. E levitanan mester a carga e arca poniendo e baranan di palo di acacia riba nan schouder. (Numbernan 7:9; 1 Cronicanan 15:15) E baranan tabata pega na e arca na tur momento, pues e levitanan no tabatin nodi mishi cu e arca. (Exodo 25:12-16) Ora nan tabata transporta e arca, “cortina” cu tabata separa e Luga Santo for di e Luga Santisimo a ser uza pa tapa e arca.—Numbernan 4:5, 6, BPK. *

  • Loke e arca a simbolisa. E arca tabata un simbolo di e presencia di Dios. Por ehempel, e nubia cu a aparece riba e arca den e Luga Santisimo y na e campamento di e Israelitanan tabata un señal di e presencia di Jehova y su bendicion. (Levitico 16:2; Numbernan 10:33-36) Tambe Bijbel ta bisa cu Jehova “ta sinta ariba di e kerubinnan”, referiendo na e dos kerubinnan cu tabatin riba e arca. (1 Samuel 4:4; Salmo 80:1, Beibel Santu) Pues, e kerubinnan aki tabata un representacion di “e garoshi” di Jehova. (1 Cronicanan 28:18, Beibel Santu) Despues cu e arca, como simbolo di e presencia di Dios, a ser hiba Sion, Rey David por a skirbi cu Jehova tabata “biba na Sion.”—Salmo 9:11, Beibel Santu.

  • Nomber pa e arca. Bijbel ta uza diferente nomber pa e caha sagrado ey, incluso “e arca di testimonio”, “e arca di alianza”, “e arca di SEÑOR” y “e arca di [Jehova su] fortaleza.”—Numbernan 7:89; Josue 3:6, 13; 2 Cronicanan 6:41, Beibel Santu.

    E tapa di e arca tabata ser yama “e propiciatorio.” (1 Cronicanan 28:11, Beibel Santu) E nomber ey ta referi na e funcion special di e tapa riba e Dia di Expiacion, ora cu e sumo sacerdote di Israel sprengo sanger di e bestia di sacrificio riba y dilanti di e tapa. Loke cu e sumo sacerdote a haci, ta cubri pica di “su mes”, “e hendenan di su cas” y di “henter e congregacion di Israel.”—Levitico 16:14-17, Beibel Santu.

E arca di pacto ta existi ainda?

No tin niun prueba cu e ta existi ainda. Bijbel ta mustra cu e arca no ta necesario mas pasobra e pacto cu ta asocia cu ne a ser reemplasa cu “un pacto nobo” cu ta basa riba e sacrificio di Hesus. (Jeremias 31:31-33, Beibel Santu; Hebreonan 8:13; 12:24) Tambe Bijbel a profetisa di un tempo den cua e arca di pacto lo no t’ey mas y e pueblo di Dios lo no sinti su falta.​—Jeremias 3:16.

Den un vision cu apostel Juan a haya despues cu e pacto nobo a ser estableci, e arca di pacto a aparece den cielo. (Revelacion 11:15, 19) E arca simbolico aki ta representa e presencia di Dios y su bendicion riba e pacto nobo.

E arca tabatin poder sobrenatural?

No. Presencia di e arca di pacto no tabata un garantia pa exito. Por ehempel, e Israelitanan tabatin e arca den nan campamento ora cu nan a bay bringa contra e stad di Ay, pero toch nan a perde pasobra un di e Israelitanan no tabata fiel. (Josue 7:1-6) Despues e Filisteonan a derota e Israelitanan aunke cu nan a bay cu e arca di pacto den bataya. E derota ey tabata pa motibo di e maldad di e sacerdotenan Israelita, Ofni cu Finees. (1 Samuel 2:12; 4:1-11) E Filisteonan a captura e arca den e bataya ey, pero Dios a dal nan cu plaga te ora cu nan a hiba e arca bek na Israel.​—1 Samuel 5:11–6:5.

Historia di e arca di pacto

Aña (P.C.)

Suceso

1513

Bezaleel cu su assistentnan a traha e arca uzando material cu e Israelitanan a contribui.​—Exodo 25:1, 2; 37:1.

1512

Moises a dirigi e ceremonia di inauguracion di e arca hunto cu e tabernakel y e sacerdocio.​—Exodo 40:1-3, 9, 20, 21.

1512​—Despues di 1070

Nan a hiba e arca varios luga.​—Josue 18:1; Huesnan 20:26, 27; 1 Samuel 1:24; 3:3; 6:11-14; 7:1, 2.

Despues di 1070

Rey David a hiba e arca Jerusalem.​—2 Samuel 6:12.

1026

E arca a bay den e tempel di Salomon na Jerusalem.​—1 Reynan 8:1, 6.

642

Rey Josias ta hiba e arca bek na e tempel.​—2 Cronicanan 35:3. *

Prome cu 607

Aparentemente, un hende a saca e arca for di e tempel. E no tabata den e lista di obheto cu a ser hiba Babilonia ora e tempel a ser destrui na aña 607 P.C. ni tampoco den e lista di obheto cu despues a ser hiba bek Jerusalem.​—2 Reynan 25:13-17; Esdras 1:7-11.

63

Despues cu general Romano Pompei a conkista Jerusalem, el a declara cu e arca no tabata den e Luga Santisimo di e tempel. *

^ par. 8 E Israelitanan a sufri consecuencianan grave ora nan a desobedece e ley di Dios tocante transportacion y tapamento di e arca.​—1 Samuel 6:19; 2 Samuel 6:2-7.

^ par. 31 Bijbel no ta bisa na ki tempo, dicon of ta ken a saca e arca for di e tempel.

^ par. 35 Wak The Histories, di Tacitus, buki 5, paragraf 9.