Sigui pa e contenido

Ken of Kico Ta “e Alfa y e Omega”?

Ken of Kico Ta “e Alfa y e Omega”?

E contesta cu Bijbel ta duna

“E Alfa y e Omega” ta referi na Jehova, e Dios Todopoderoso. E expresion aki ta aparece tres biaha den Bijbel.—Revelacion 1:8; 21:6; 22:13. *

Dicon Dios ta yama su mes “e Alfa y e Omega”?

Alfa y omega ta e prome y ultimo letter di e alfabet Griego. Esaki ta e idioma cu a ser uza pa skirbi e parti di Bijbel cu ta conoci como e Testament Nobo, locual ta inclui e buki di Revelacion. Ta uza e posicion di e letternan dje alfabet Griego pa ilustra cu Jehova so ta e principio y e fin. (Revelacion 21:6) E semper tabata y semper lo ta e Dios Todopoderoso. E ta e unico cu ta existi “for di eternidad te na eternidad.”—Salmo 90:2, Beibel Santu.

Ken ta “e prome y e ultimo”?

Bijbel ta uza e titulo aki tanto pa Jehova Dios y pasu Yiu, Hesus, pero cu diferente nificacion. Wak dos ehempel.

  • Na Isaias 44:6 Jehova ta bisa: “Ami ta e prome y Ami ta e ultimo, y no tin Dios fuera di Mi.” (Beibel Santu) Aki Jehova ta mustra bon cla cu pa semper e ta e Dios Berdadero, no tin niun otro. (Deuteronomio 4:35, 39) Den e caso aki, e expresion “e prome y e ultimo” tin e mesun nificacion cu “e Alfa y e Omega.”

  • Ademas, na Revelacion 1:17, 18 y 2:8 ta aparece e expresion “e Prome [protos, no alfa] y e Ultimo [eskhatos, no omega]”. E contexto di e versiculonan aki ta mustra cu ta trata di un persona cu a muri y despues a bolbe biba. Pues, e versiculonan aki no por ta referi na Dios pasobra Dios nunca a muri. (Habacuk 1:12) No obstante, Hesus si a muri y a ser resucita. (Echonan 3:13-15) E tabata e prome hende cu a ser resucita como un spirito inmortal den cielo, caminda awor e ta biba “pa tur eternidad.” (Revelacion 1:18; Colosensenan 1:18) Despues di esey, ta pa medio di Hesus tur otro resureccion pa bay cielo lo tuma luga. (Juan 6:40, 44) Pesey, e tabata e ultimo persona cu Jehova a resucita directamente. (Echonan 10:40) Den e sentido aki, Hesus por ser yama “e Prome y e Ultimo.”

Revelacion 22:13 ta proba cu Hesus ta “e Alfa y e Omega”?

No. Na capitulo 22 di Revelacion tin varios persona na palabra, pero Bijbel no ta identifica specificamente ken ta papia na versiculo 13. Un profesor universitario, William Barclay a skirbi lo siguiente tocante e parti aki: “E ta skirbi sin ningun secuencia logico; ... y hopi biaha ta dificil pa sa precies ken ta papia.” (The Revelation of John, Volumen 2, Edicion Revisa, pagina 223) Pues, “e Alfa y e Omega” cu Revelacion 22:13 ta menciona ta referi na Jehova Dios, e mesun persona cu a haya e titulo ey otro caminda den e buki di Revelacion.

^ par. 3 Un di cuater biaha cu e ta ser menciona den Bijbel ta na Revelacion 1:11 den e version di King James. Sinembargo, mayoria di e traduccion mas nobo no ta uza e expresion aki pasobra e no ta aparece den e manuscritonan Griego di mas antiguo. Aparentemente el a ser agrega mas despues na e copianan di e Scritura.