Sigui pa e contenido

LOKE HOBENNAN SA PUNTRA

Con Mi Por Splica Mi Punto di Bista Tocante Sex?

Con Mi Por Splica Mi Punto di Bista Tocante Sex?

“Kico? Ainda bo ta birgen?”

Si bo kier contesta nan cu si, lo bo kier bisa esey cu confianza? E articulo aki lo yuda bo.

 Kico ta un birgen?

Un birgen ta un hende cu nunca a yega di tene relacion sexual.

Pero di mes no ta penetracion so ta cay bou di relacion sexual. Algun hende ta pensa cu ainda nan ta birgen pasobra nan no a yega te na penetracion aunke nan a haci tur otro cos.

Sex ta encera tambe, por ehempel, sex oral, sex anal of masturbacion di un otro persona.

E punto ta: Esun cu haci sex, sea cu ta oral, anal of masturbacion di un otro persona, no por bisa cu e ta birgen.

 Kico Bijbel ta bisa tocante sex?

Bijbel ta bisa cu un homber y un muher por tene relacion sexual solamente si nan ta casa. (Proverbionan 5:18) Pesey, un persona cu kier agrada Dios lo warda te dia e casa pa tene relacion sexual.​—1 Tesalonicensenan 4:3-5.

Tin hende ta bisa cu e punto di bista di Bijbel ta ouderwets y no ta pas den e mundo moderno aki. Pero corda cu nos mundo moderno ta yen di divorcio, embaraso no desea y maleza transmiti sexualmente. Pues, nos mundo moderno no ta den niun posicion pa duna conseho tocante moralidad.​—1 Juan 2:15-17.

Si bo pensa bon, Bijbel su normanan moral tin sentido. Por ehempel, imagina bo cu un hende ta regala bo 1.000 florin cash. Lo bo tira e placa ey for di un edificio pa ken cu ta piki nan?

Ora ta trata di sex ta casi mescos. Sierra di 14 aña ta bisa: “Mi no ta bay entrega mi birginidad na un hende cu lo mi no bay corda su nomber aki un par di aña.” Tammy di 17 aña ta di acuerdo. El a bisa: “Sex ta un regalo mucho special pa duna ken cu ta.”

E punto ta: Bijbel ta bisa cu hende soltero mester keda birgen y mantene un conducta limpi.​—1 Corintionan 6:18; 7:8, 9.

 Kico abo ta kere?

  • Bo ta kere cu Bijbel su punto di bista tocante sex ta rasonabel of mucho streng?

  • Bo ta kere cu ta oke pa dos hende cu no ta casa tene relacion sexual basta nan bisa cu nan ta stima otro?

Hopi hoben a pensa bon riba e asunto aki y a yega na e conclusion cu keda birgen y mantene un conducta limpi ta e mihor cos pa haci. Nan no ta lamenta e decision ey ni no ta sinti cu nan a perde algo. Wak kico algun di nan ta bisa:

  • “Mi ta contento cu mi ta birgen! Mi no ta carga e consecuencianan cu otronan a haya nan mes cu ne debi cu nan a tene relacion sexual prome cu matrimonio manera, dolor emocional, mental of fisico.”​—Emily.

  • “Mi ta contento cu mi no tin un lista di hende cu mi a tene relacion sexual cu ne. Y ta un alivio pa sa cu mi no tin ni e minimo chens di tin un maleza transmiti sexualmente.”​—Elaine.

  • “Mi a tende hopi mucha muher di mi edad of mas grandi cu mi lamenta cu nan a tene relacion sexual y cu ta bisa mihor nan a warda. Mi no kier haci e mesun fout ey.”​—Vera.

  • “Mi sa di hopi hende cu a keda cu problemanan emocional despues cu nan no tabata birgen mas of pasobra nan tabatin hopi partner sexual. Ami ta haya esey hopi tristo.”​—Deanne.

E punto ta: Bo mester sa precies kico bo ta kere aden prome cu bo haya bo cu presion of tentacion pa haci sex.​—Santiago 1:14, 15.

 Con bo por splica otronan loke bo ta kere aden?

Kico bo mester bisa si un hende puntra kico ta bo punto di bista tocante sex? Tur cos ta depende di e circunstancianan.

“Si nan ta haci mi pregunta tocante sex djis pa tenta mi, lo mi no djis keda eynan sin bisa nada. Lo mi bisa: ‘Esey no ta bo asunto.’ Anto lo mi cana bay laga nan.”​—Corinne.

“Tin mucha na scol cu ta haci bo e pregunta ey djis pa ter y pasa pret. Si esey ta nan intencion, lo mi no contesta nan mes.”​—David.

Bo tabata sa? Tabatin biaha cu Hesus a uza silencio pa “contesta” esnan cu tabata haci bofon di dje.​—Mateo 26:62, 63.

Pero kico si e persona cu ta haci e pregunta di berdad kier sa e contesta? Si bo ta pensa cu e tin respet pa Bijbel, bo por referi na un texto manera 1 Corintionan 6:18. E texto ey ta mustra cu hende cu haci sex prome cu casa ta peca contra su mes curpa of ta haci su mes dolor.

Sea cu bo ta haci uzo di Bijbel of no, ta importante pa bo papia cu conviccion. Corda, bo tin tur derecho pa ta orguyoso di e decision cu bo a tuma pa keda moralmente limpi.​—1 Pedro 3:16.

“Ora bo contesta cu confianza, esey ta mustra cu bo no ta duda den loke bo ta kere pero cu bo kier haci loke ta corecto; no djis pasobra otro hende a bisa bo hacie.”​—Jill.

E punto ta: Si bo ta sigur di bo punto di bista tocante sex, bo por splica otronan mas mihor. Nan contesta por sorprende bo. Melinda di 21 aña ta bisa: “Mi coleganan di trabou a elogia mi pasobra mi ta birgen ainda. Nan no ta haya esey nada straño. Pa nan esey ta un señal cu mi tin dominio propio y normanan halto.”

Tip: Si bo mester di yudansa pa dicidi kico ta bo punto di bista tocante sex, download e blachi di tarea “Con pa Splica Bo Punto di Bista Tocante Sex.” Wak tambe e buki Loke Hobennan Sa Puntra—Contesta Practico na Ingles.

  • Capitulo 24 di Volumen 1 tin e tema: “Sex Lo Drecha Nos Relacion?”

  • Capitulo 5 di Volumen 2 tin e tema: “Dicon Ta Bon pa Keda Birgen?”

“Mi ta gusta e manera cu e buki ‘Hobennan Sa Puntra’ ta splica cierto topico. Por ehempel, na pagina 187 di Volumen 1 e ta splica cu tene relacion sexual prome cu casa ta manera bo ta duna un hende un cadena caro pornada. Bo ta rebaha bo mes. Pagina 177 ta mustra con sex prome cu matrimonio ta manera bo ta uza un cuadro masha bunita como tapijt pa limpia pia. Pero e ilustracion cu mas mi ta gusta ta esun na pagina 54 di Volumen 2. E plachi ta mustra cu ‘haci sex prome cu matrimonio ta manera ora bo ta habri un regalo prome cu nan a duna bo e.’ Ta manera bo ta horta algo cu ta pa un otro hende: bo futuro casa.”​—Victoria.