Sigui pa e contenido

Mi Mester Tene Relacion Sexual?

Mi Mester Tene Relacion Sexual?

Kisas bo ta pensa cu ta mihor pa bo entrega numa, pasobra toch tur hende ta haci esey.

Para keto y pensa!

E berdad ta cu no ta tur hende ta haciendo esey.

Ta berdad cu segun estadisticanan hopi hoben ta tene relacion sexual. Por ehempel, un estudio cu nan a haci na Merca a mustra cu 2 di cada 3 hoben ya ta sexualmente activo prome cu nan caba scol secundario. Pero esey kiermen tambe cu 1 di cada 3 hoben no ta activo sexualmente, y esey ta un cantidad basta grandi.

Pero, kico di e hobennan cu si ta sexualmente activo? Expertonan a conclui cu hopi di e hobennan ey ta haya nan cu un of mas di e siguiente consecuencianan desagradabel aki:

Angustia. Mayoria di e hobennan cu a tene relacion sexual caba ta bisa cu awor esey ta duel nan.

Relacion sexual prome cu casa ta manera ora bo coy un cuadro bunita y uz’e como tapijt

Desconfianza. Despues di tene relacion sexual, cada un di e partnernan ta cuminsa puntra nan mes: Cuanto hende mas el a yega di tene relacion cu ne?

Decepcion. Hopi mucha muher lo prefera di tin un yoncuman cu lo proteha nan, no djis uza nan. Y hopi mucha homber ta sinti nan menos atrai na un mucha muher cu lo cay lihe pa nan.

Conclusion: Bo curpa tin mucho balor pa bo djis regal’e na ken cu ta. Ora bo obedec’e Dios su ley pa no tene relacion sexual prome cu bo casa, bo ta mustra cu bo ta fuerte. Y si bo casa un dia, lo bo por tene relacion sexual. E ora ey lo bo por disfruta di dje sin e preocupacion, angustia y dudanan cu casi semper ta bin como consecuencia di tene relacion sexual prome cu casa.—Proverbionan 7:22, 23; 1 Corintionan 7:3.