Sigui pa e contenido

HOBENNAN SA PUNTRA

Dicon Mi No Tin Amigo?

Dicon Mi No Tin Amigo?

Bo ta riba internet y bo ta wak potret di un fiesta. Tur bo amigonan tabata eynan y bo por mira cu nan a pasa bon. Pero falta algo, of eigenlijk falta un hende: abo!

Bo ta cuminsa pensa: Dicon nan no a invita mi?

Bo ta bira full frustra. Bo ta sinti bo traiciona! Ta manera cos cu henter bo mundo a bin abou manera un cas di carta. Diripiente bo ta sinti bo bo so y ta puntra bo mes: Dicon mi no tin amigo?

 Kico lo bo contesta

Cierto of Falso

  1. Si bo tin hopi amigo, nunca lo bo sinti bo bo so.

  2. Si bo join rednan social, nunca lo bo sinti bo bo so.

  3. Si bo ta manda hopi mensahe, nunca lo bo sinti bo bo so.

  4. Si bo yuda otro hende, nunca lo bo sinti bo bo so.

E contesta pa tur cuater opcion ta falso.

Dicon?

 E berdad tocante amistad y soledad

  • Ora bo tin hopi amigo, esey no ta un garantia cu nunca lo bo sinti bo bo so.

    “Mi ta stima mi amigonan, pero tin biaha mi ta sinti cu nan no ta interesa den mi. Bo por sinti bo hopi malo ora bo ta rondona pa amigonan pero nan no ta mustra cu nan ta stima bo of ta interesa den bo.”​—Anne.

  • Ora bo join un red social, esey no ta un garantia cu nunca lo bo sinti bo bo so.

    “Tin hende ta colecta amigo manera otro hende ta colecciona estatuanan chikito. Pero un coleccion asina no ta duna bo e cariño cu bo tin mester. Si bo no tin un relacion significativo, amigonan online lo ta mescos cu un coleccion di estatuanan chikito sin bida. Tur e contactonan online ey no ta bal nada, si bo no tin berdadero amigonan.”​—Elaine.

  • Manda mensahe henter dia no ta un garantia cu nunca lo bo sinti bo bo so.

    “Tin biaha, ora bo ta sinti bo bo so, bo ta keda wak bo telefon cada rato pa wak si un amigo a manda bo un mensahe. Y ora bo ripara cu bo no a haya niun mensahe, bo ta sinti bo pio.”​—Serena.

  • Haci cos pa otro hende no ta un garantia cu nunca lo bo sinti bo bo so.

    “Semper mi ta purba di ta generoso cu mi amigonan, pero mi ta ripara cu nan no ta trata mi manera mi ta trata nan. Mi gusta ta generoso, pero mi ta haya straño cu nunca nan ta haci algo bek pa mi.”​—Richard.

Conclusion: En realidad, soledad ta un actitud of manera di pensa. “E tin di haber cu loke bo ta pensa y no cu loke ta pasa rond di bo.” Esey ta loke un hoben cu yama Jeanette a bisa.

Kico bo por haci si bo ta sinti bo bo so y sin amigo?

 Con pa gana e bataya

Purba di ta mas sigur di bo mes

“Ora bo no ta sigur di bo mes, bo por sinti bo bo so. Ta dificil pa tuma iniciativa y ta habri pa amistad nobo si bo ta sinti cu bo no ta bal nada.”​—Jeanette

Bijbel ta bisa: “Stima bo prohimo mescos cu bo mes.” (Galationan 5:14) Pa disfruta di bon amistad, nos mester stima nos mes prome sin bira egoista.​—Galationan 6:3, 4.

Evita di sinti duele di bo mes

“Soledad ta manera quicksand (drijfzand). Mas bo move den dje, mas dificil e ta pa sali for di dje. Si bo ta laga soledad domina bo pensamentonan, esey lo laga bo bira amarga y niun hende lo kier ta cu bo.” ​—Erin.

Bijbel ta bisa: “Amor ... no ta busca su mes interes.” (1 Corintionan 13:4, 5) Ora nos ta enfoca mucho riba nos mes, nos ta bira menos compasivo y pesey tin menos chens cu nos ta atrae amigonan nobo. (2 Corintionan 12:15) Ademas, si bo ta depende di otro hende pa haci bo feliz, lo bo keda desapunta. Si semper bo ta bisa “Niun hende nunca ta yama mi” of “Nunca nan ta invita mi”, bo ta poniendo bo felicidad den man di otro hende. Esey ta loke bo kier?

No scoge cualkier hende como amigo

“Ta normal cu hende cu ta sinti nan nan so kier atencion, y ta yega un momento cu nan no ta worry di ken e atencion ey ta bin. Nan kier sinti cu un hende ta interesa den nan. Pero tin hende cu ta uza e deseo ey cu bo tin pa probecha di bo. E ora bo ta sinti mas pio cu prome.”​—Brianne.

Bijbel ta bisa: “Esun cu anda cu hende sabi lo ta sabi, ma un compañero di hende bobo lo sufri daño.” (Proverbionan 13:20) No ta berdad cu un hende cu ta muri hamber ta dispuesto pa come casi tur cos? Asina tambe, un hende cu tin hamber pa amistad por busca amigo na luganan robes. Nan por hasta bira victima di hendenan cu kier probecha di nan. Esaki por pone nan pensa cu e tipo di amistadnan ey ta normal y cu no tin nada mihor toch.

Conclusion: Nos tur por sinti nos mes nos so tin biaha, pero e sintimento ey ta afecta algun hende mas cu otro. Aunke soledad ta un sintimento doloroso, bo mester corda cu e ta djis un sintimento. Nos sintimentonan ta cuminsa cu loke nos ta pensa, y nos por controla nos pensamentonan.

Sea realistico den loke bo ta spera di otro hende. Jeanette a bisa: “No ta tur hende lo bira bo mihor amigo, pero bo por haya un hende cu ta stima bo. Y esey ta importante. Esey ta loke lo yuda bo pa bo no sinti bo bo so.”

Bo mester mas ayudo? Lesa e cuadro “ Vence Bo Miedo di Cera Amistad.” Download e PDF “Loke Bo Por Haci si Bo Ta Sinti Bo Bo So.”