Sigui pa e contenido

LOKE HOBENNAN SA PUNTRA

Kico Mi Por Haci pa Mi Drumi Mas Mihor?

Kico Mi Por Haci pa Mi Drumi Mas Mihor?

Si bo ta haya mal punto na scol, bo por pensa cu bo mester studia mas. Si bo ta haci un deporte y bo no a hunga manera custumber, bo por pensa cu bo mester train mas. Pero den ambos caso, kisas loke eigenlijk bo mester ta drumi mas mihor. Laga nos wak dicon.

 Dicon bo mester drumi?

Expertonan ta bisa cu mayoria di hoben mester drumi entre ocho pa dies ora tur anochi. Dicon ta importante pa bo drumi suficiente?

  • Ora bo drumi bon, bo por pensa mas mihor. Drumimento ta ser yama “cuminda pa celebro.” Ora bo drumi bon, esey por yuda bo cu deporte, cu bo habilidad di resolve problema y pa siña bon na scol.

  • Ora bo drumi bon, bo actitud y bo beis ta drecha. Hende cu no ta drumi suficiente por cambia lihe di humor, sinti tristo of deprimi y haya problema cu otro hende.

  • Ora bo drumi bon, bo por ta un mihor chauffeur. Un estudio na Merca a mustra cu chauffeur entre 16 pa 24 aña tabatin “casi dobel mas chens di tabata cabishando ora nan a haya accidente” compara cu chauffeur entre 40 pa 59 aña.

  • Ora bo drumi bon, bo por ta mas saludabel. Drumimento por yuda bo curpa renoba y mantene e celnan, tehidonan y adernan. Y ora bo drumi bon, bo tin menos chens di haya diabetes, atake celebral y sufri di obesidad.

Mescos cu un telefon mester charge pa por sigui funciona, bo mester drumi suficiente pa bo por funciona bon

 Kico por stroba bo di drumi?

Manera nos por a mira ta importante pa drumi bon, pero toch hopi hoben no ta drumi suficiente. Por ehempel, Elaine di 16 aña a bisa:

“Mi juffrouw a puntra nos klas cuant’or nos ta bay drumi. Mayoria a bisa mas o menos 2 or di marduga. Algun a bisa mas o menos 5 or di marduga. Y un alumno so a bisa 9 or y mey di anochi.”

Kico ta algun cos cu por stroba bo di drumi?

Bida social. “Ta masha facil pa keda lanta te laat y perde tempo, y mas ainda ora mi sali anochi cu mi amigonan.”—Pamela.

Responsabilidad. “Mi stima mi soño, pero ta dificil pa drumi suficiente ora mi tin hopi cos di haci.”—Ana.

Tecnologia. “E cos cu mas ta stroba mi di drumi ta mi telefon. Mi no por keda sin wak mi telefon ora mi ta riba mi cama.”—Anisa.

 Kico bo por haci pa drumi mas mihor?

  • Puntra bo mes con importante soño ta pa bo. Bijbel ta bisa: “Un man yen di sosiego ta mihor cu dos mokete yen di trabou y coremento tras di biento.” (Eclesiastes 4:6) Drumimento ta un necesidad, no un luho. Si bo no drumi bon, lo bo no haci bo trabou mes bon ni lo bo no pasa dushi den bo tempo liber.

  • Saca afo e motibo principal cu bo no ta drumi suficiente. Por ehempel, puntra bo mes: Mi ta keda lanta te laat cu mi amigonan? Mi tin mucho hopi huiswerk of trabou di cas? Mi ta laga mi telefon stroba mi di drumi na ora of lanta mi despues cu mi a pega soño?

Algo pa pensa ariba: Bo tin cu haci esfuerso pa bo logra vence bo obstaculo di mas grandi, pero e resultado ta bale la pena. Proverbionan 21:5 ta bisa: “E plannan di hende balente siguramente ta conduci na abundancia [of, “ta resulta sigur den bentaha”, NW].”

Claro, loke por yuda un persona drumi mas mihor, kisas lo no yuda un otro. Por ehempel, algun hende ta bisa cu si nan tira un cabes durante dia, esey ta yuda nan drumi mas mihor anochi. Pero tin otro hende ta bisa cu si nan drumi den dia, nan lo no por drumi bon anochi. Saca afo kico ta mas mihor pa bo. Kisas e siguiente sugerencianan por yuda:

  • Tuma tempo pa bo relax. Si bo relax prome cu bo ora di drumi, bo tin mas chens di pega soño di biaha.

    “Ta bon pa caba trempan cu tur tarea di cas y otro responsabilidadnan, e ora ey bo no tin nodi worry cu nan ora bo mester bay drumi.”—Maria.

  • Tuma accion. En bes di laga bo circunstancia controla bo, ahusta bo schedule di manera cu bo por drumi suficiente.

    “Ami mester drumi por lo menos ocho ora. Si mi mester lanta mas trempan cu normal, mi ta calcula ki ora mi mester bay drumi pa mi drumi ocho ora.”—Vincent.

  • Drumi na e mesun ora. Nos tur tin un holoshi biologico y si bo train e, lo e yuda bo. Expertonan ta sugeri pa drumi y lanta tur dia mesun ora. Purba esey pa un luna y wak si bo lo sinti mihor.

    “Si tur anochi bo bay drumi e mesun ora, bo mente lo funciona mas mihor e siguiente dia. Esaki lo yuda bo pa bo haci cualkier actividad mas mihor.”—Jared.

  • Hiba un bida social balansa. Bijbel ta bisa cu un persona mester ta “modera den su custumbernan” y esey ta inclui kico nos ta haci den nos tempo liber.—1 Timoteo 3:2, 11.

    “Mi mester a siña con pa pone limite na mi actividadnan social parti anochi. Si mi no pone un limite na mi recreo, algo lo ser afecta y esey casi tur ora ta mi soño.”—Rebecca.

  • Laga bo telefon “drumi” tambe. Purba resisti por lo menos un ora prome cu bo bay drumi e tentacion pa bay riba internet of pa manda mensahe na bo amigonan. Eigenlijk, tin experto a adverti cu e tipo di luz cu telefon, television of tablet tin por stroba bo di pega soño.

    “Hende ta exigi pa bo ta disponibel 24 ora pa dia. Pero pa bo por sosega completamente, bo mester pone bo telefon un banda.”—Julissa.