Sigui pa e contenido

LOKE HOBENNAN SA PUNTRA

Dicon Mi Mester Haci Oracion?

Dicon Mi Mester Haci Oracion?

Segun un encuesta, 80 porciento di hobennan na Merca ta haci oracion, pero solamente mitar di nan ta haci oracion tur dia. Sin duda, algun di nan ta puntra nan mes: Oracion ta djis un terapia pa mi sinti mi mihor?

 Kico ta oracion?

Ora bo ta haci oracion, bo ta papia cu e Creador di tur cos. Djis pensa riba loke esey ta nifica. Maske Jehova ta superior na hende den tur sentido, toch “e no ta masha leu for di cada un di nos.” (Echonan 17:27) Bijbel ta haci un invitacion special: “Hala cerca Dios, y lo e hala cerca boso.”​—Santiago 4:8.

Kico bo mester haci pa hala cerca Dios?

  • Bo mester papia cu Dios mediante oracion.

  • Un otro manera pa hala cerca Dios ta ora bo ta studia Bijbel. Asina Dios ta “papia” cu bo.

Como cu e comunicacion ta bin di ambos banda, esta, via oracion y estudio di Bijbel, esey lo yuda bo bira un bon amigo di Dios.

“Papia cu Jehova, esta, comunica cu e Haltisimo, ta un di e privilegionan di mas grandi cu un hende por tin.”​—Jeremy.

“Ora mi comparti mi sintimentonan di mas profundo cu Jehova den oracion, mi ta sinti mi mas cerca di dje.”​—Miranda.

 Dios ta scucha bo?

Hasta si bo ta kere den Dios y ta resa na dje, kisas toch por ta dificil pa bo acepta cu Dios ta scucha bo. Sinembargo, Bijbel ta bisa cu Jehova ta “Scuchado di oracion.” (Salmo 65:2, Beibel na Papiamentu Koriente) Bijbel ta hasta invita bo pa “tira tur [bo] inkietud riba dje.” Dicon? “Pasobra e ta interesa den [bo].”​1 Pedro 5:7.

Pensa riba esaki: Bo ta dedica tempo pa papia cu bo mihor amigonan riba un base regular? Bo por haci mescos cu Dios. Papia cu ne regularmente y uza su nomber, Jehova. (Salmo 86:​5-7; 88:9) Si, Bijbel ta invita bo pa “haci oracion constantemente.”​—1 Tesalonicensenan 5:​17.

“Oracion ta un combersacion entre ami y mi Tata den cielo; mi ta habri mi curason completo na dje.”​—Moises.

“Mi ta papia cu Jehova tocante cosnan profundo, mescos cu lo mi papia cu mi mama of un bon amigo.”​—Karen.

 Kico mi por menciona den oracion?

Bijbel ta bisa: “Den tur cos, pa medio di oracion y suplica hunto cu gradicimento, laga Dios sa kico ta boso peticionnan.”​—Filipensenan 4:6.

Esey kiermen cu bo mag di papia tocante bo problemanan den oracion? Si! Bijbel mes ta anima nos pa haci esey. E ta bisa: “Tira bo carga riba SEÑOR, y e lo sostene bo.”​—Salmo 55:22, Beibel Santu.

Pero, ora bo ta haci oracion, no papia di bo problemanan so. Chantelle ta bisa: “Si ta yudansa so mi ta keda pidi Jehova, esey lo no ta echt un bon amistad. Ami ta haya cu mi mester gradici Dios prome cu tur cos, y e lista di cosnan cu mi ta agradecido p’e mester ta largo.”

Pensa riba esaki: Kico bo ta agradecido p’e? Bo por pensa di tres cos cu lo bo por gradici Jehova p’e awe?

“Hasta algo simpel, manera ora bo mira un flor, por anima bo pa haci oracion y gradici Jehova.”​—Anita.

“Medita riba algo den creacion cu ta impresiona bo of medita riba un texto di Bijbel cu bo gusta. Despues, gradici Jehova p’e.”​—Brian.