Sigui pa e contenido

LOKE HOBENNAN SA PUNTRA

Con Mi Por Deal cu Depresion?

Con Mi Por Deal cu Depresion?

 Kico abo lo haci?

Imagina bo e siguiente escena:

Nada ta haci Jennifer feliz mas. Tur dia e ta yora masha hopi mes, sin motibo. E no kier atende cu ningun hende y casi e no ta come. E ta drumi malo y ta dificil pa e concentra. Jennifer no ta compronde kico ta pasando cu ne y ta puntra su mes si un dia e lo ta su mes atrobe.

Mark tabata un studiante ehemplar, pero awor e tin rabia riba scol y ta haya mal punto. Mark tabata gusta haci deporte, pero awor e no tin gana di haci esey mas. Su amigonan no ta compronde. Y su mayornan ta preocupa. Nan ta puntra nan mes si esaki lo pasa pronto of si ta un problema mas serio.

Abo sa sinti manera Jennifer of Mark? Si ta asina, kico bo por haci? Tin dos opcion:

  1. Purba soluciona e problema riba bo mes

  2. Papia cu un adulto cu bo ta confia

Opcion A kisas ta parce mas facil pa scoge, specialmente si bo no kier papia tocante e asunto. Pero, esey ta e opcion di mas sabi? Bijbel ta bisa: “Dos ta mihor cu un . . . Pasobra si un di nan cay, esun lo lanta su compañero. Ma ay di esun cu cay ora no tin ningun hende pa lant’e.”​—Eclesiastes 4:​9, 10, Beibel Santu

Wak e ehempel aki: Supone cu bo a perde e caminda den un bario peligroso. E ta scur y tin hende straño tur caminda. Kico abo lo haci? Bo por purba haya e caminda riba bo mes. Pero, lo no ta mas sabi si bo puntra un hende cu bo por confia?

Depresion por ta manera e bario peligroso ey. Claro cu tin biaha bo por sinti bo down y e lo pasa di mes. Pero si bo tin e sintimentonan ey pa un periodo mas largo, ta mihor pa bo busca yudansa

PRINCIPIO BIBLICO: “Esun cu isola su mes . . . Ta lanta contra tur sabiduria sano.”​—Proverbio 18:1, Beibel Santu

E bentaha di opcion B (papia cu un di bo mayornan of un adulto cu bo ta confia) ta cu bo ta beneficia di e experencianan di un hende cu a lucha contra sintimentonan parecido.

Kisas bo ta pensa cu bo mayornan no tin niun idea con bo ta sinti. Pero, bo ta sigur di esey? Hasta si nan situacion tabata diferente ora nan tabata hoben, kisas nan tabatin e mesun sintimentonan cu bo. Y kisas nan sa con pa yuda bo.

PRINCIPIO BIBLICO : “Sabiduria ta wordo haya cerca e ancianonan, y den bida largo tin comprondemento.”​—Job 12:12, Beibel Santu

E punto ta cu si bo papia cu bo mayor of un adulto cu bo ta confia, lo bo tin mas chens di haya conseho cu por yuda bo.

Depresion ta manera ora bo perde caminda den un bario peligroso. Pa bo por sali for di dje bo mester di yudansa

 Kico si mi mester di tratamento medico?

Si bo ta sinti bo deprimi tur dia, kisas bo tin depresion severo of un otro problema medico cu mester di tratamento.

Ta facil pa pensa cu e sintomanan di depresion severo ta djis mal beis di teenager. Pero, e sintomanan di depresion severo ta mas intenso y ta dura mas largo. Pues, si bo tristeza ta severo y no kier kita, papia cu bo mayornan pa bo por bay un dokter.

PRINCIPIO BIBLICO: “Hende bon di salud no mester di dokter, ma hende malo si.”​—Mateo 9:​12.

Bo no mester sinti berguensa si bo haya sa cu bo tin depresion severo. Hopi hoben ta sufri di depresion y tin tratamento p’e. Bo por ta sigur cu bo bon amigonan lo no pensa malo di bo.

Tip: Tene pasenshi. Ta tuma tempo pa sali for di depresion y ta normal cu bo por tin dianan bon y dianan malo. *

 Kico mi por haci pa sinti mi mihor?

Sea cu bo mester di yudansa medico of no, tin algun cos cu bo por haci pa trata cu e tristeza cu ta persisti. Por ehempel, come bon, drumi suficiente y haci ehercicio por yuda bo tene bo emocionnan bou di control. (Eclesiastes 4:6; 1 Timoteo 4:8) Loke por yuda bo tambe ta si bo tin un dagboek pa skirbi bo sintimentonan, bo metanan, recaida- y logronan.

Sea cu bo ta sufriendo di depresion severo of bo ta djis pasando den un periodo dificil, no lubida esaki: Si bo acepta yudansa di otro hende y tuma medida pa sinti bo mihor, bo por deal cu depresion.

 Texto di Bijbel cu por yuda.

  • “SEÑOR ta cerca di e hende di curason kibra, y ta salba esnan di spirito abati.”​—Salmo 34:18, Beibel Santu

  • “Tira bo carga riba SEÑOR, y e lo sostene bo; nunca e lo no permiti pa e husto wordo movi.”​—Salmo 55:22, Beibel Santu

  • “Pasobra ami ta SEÑOR bo Dios, Kende ta sostene bo man drechi, Kende ta bisa bo: ‘No tene miedo, lo mi yuda bo.’”​—Isaias 41:13, Beibel Santu

  • “No sea nunca ansha pa e dia di mañan.”​—Mateo 6:​34.

  • “Laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason.”​—Filipensenan 4:​6, 7.

^ par. 28 Si bo ta pensando riba suicidio, papia cu un adulto cu bo ta confia mesora. Den e serie di cuater articulo “Why Go On?” den e revista Awake! di April 2014, bo por haya mas informacion tocante esey.