Sigui pa e contenido

Sigui pa e index

 BIJBEL TA CAMBIA BIDA DI HENDE

Tres Pregunta Cu A Cambia Mi Bida

Tres Pregunta Cu A Cambia Mi Bida
  • NACI NA AÑA: 1949

  • PAIS NATAL: MERCA

  • SU PASADO: TABATA BUSCA UN PROPOSITO DEN BIDA

MI PASADO:

Mi a lanta na Ancram, un pueblito den e estado di New York. Den gran parti di e pueblo tabatin boerderij cu ta procesa producto di lechi. Y tabatin mas baca cu hende.

Mi famia tabata bay na e unico misa cu tabatin den e pueblo. Diadomingo mainta mi welo tabata polish mi sapatonan, y despues mi tabata bay zondagsschool cu un Bijbel blanco chikito cu mi wela a regala mi. Mi famia a siña ami cu mi rumannan pa traha duro, respeta nos bisiñanan y yuda nan y pa ta agradecido pa tur loke nos tin.

Ora mi a bira grandi, mi a bay biba otro caminda y mi a bira juffrouw di scol. Mi tabatin yen di pregunta tocante Dios y bida. Algun di mi alumnonan tabatin hopi talento. Otronan no tabatin e mesun talentonan ey, pero nan tabata haci nan best si. Tin di nan ta destaca den sport mientras otronan no. Pa ami, e situacion aki tabata inhusto. Tin biaha e mayornan di e alumnonan cu no ta destaca den algo tabata bisa cosnan manera: “Ta asina Dios kier pa mi yiu ta.” Mi tabata puntra mi mes dicon Dios ta laga algun baby nace cu un limitacion asina. Con cu bay bin, e baby no a haci nada malo.

Tambe mi tabata puntra mi mes: Kico mi tin cu haci pa mi tin un proposito den bida? Mi tabata sinti cu añanan tabata pasa y mi no a haci nada cu ta bale la pena. Mi a lanta den un bon famia, mi a bay bon scol y mi tabatin un trabou cu mi tabata gusta. Pero mi tabata sinti un bashi grandi den mi bida. Mi tabata spera cu un dia lo mi por a casa, tin un cas bunita, haya yiu, sigui traha te ora mi baha cu pensioen y finalmente bay den un cas di cuido pa hende grandi. Mi tabata puntra mi mes si tabatin algo mas den bida.

BIJBEL A CAMBIA MI BIDA:

Un biaha, den zomer, ami cu algun colega a bay keiro rond Europa. Nos a bishita e Monasterio di Westminster, Catedral di Notre-Dame, Vaticano y tambe hopi otro misa mas chikito. Tur caminda cu mi a bay, mi a haci e preguntanan cu mi tabatin. Ora cu mi a bay cas bek na Sloatsburg, New York, mi a bishita  varios misa. Pero nan no por a duna mi contesta satisfactorio.

Riba un dia, un di mi alumnonan di 12 aña di edad a acerca mi y a haci mi tres pregunta. Prome, el a puntra mi si mi tabata sa cu e ta un testigo di Jehova. Mi a bis’e cu si. Despues, el a puntra mi si mi kier a sa mas tocante testigonan di Jehova. Atrobe mi a bis’e si. Por ultimo, el a puntra mi unda mi tabata biba. Ora mi a dun’e mi adres, nos a ripara cu mi tabata biba djis na skina di e caya caminda e cu su famia tabata biba. Na e momento ey mi no por a imagina con e tres preguntanan di e mucha muher aki lo a cambia mi bida pa semper.

Poco tempo despues, el a bin riba bais pa studia Bijbel cu mi. Mi a hacie e mesun preguntanan cu mi a haci varios lider religioso. Na contraste cu nan, e mucha muher aki si a duna mi contesta cla y satisfactorio for di mi mes Bijbel—contestanan cu nunca mi a yega di haya.

Loke mi a siña for di Bijbel a yena mi cu goso y satisfaccion. E texto di 1 Juan 5:19 a conmove mi. E ta bisa: “Henter mundo ta den poder di e Malbado.” Mi a sinti un alivio ora mi a siña cu no ta Dios ta causa tur e tristeza y dolor cu nos ta mira rond di nos, sino Satanas, y cu Dios ta bay drecha e situacion. (Revelacion 21:3, 4) Mi a realisa cu e siñansanan di Bijbel ta logico basta nan ta bon splica. Aunke e Testigo cu a studia cu mi tabatin apenas 12 aña di edad, mi a yega na e conclusion cu e berdad ta keda e berdad sin importa ken trec’e padilanti.

Toch mi tabata kier a wak si e Testigonan ta practica loke nan ta predica. Por ehempel, e mucha muher tabata pone enfasis riba cualidadnan manera pasenshi y amabilidad cu cristiannan berdadero mester demostra. (Galationan 5:22, 23) Pues mi a dicidi di wak si di berdad e mes tabata demostra e cualidadnan aki. Un dia, pa malo mi a yega laat pa mi estudio. Mi a hacie djis pa mi wak si e lo a keda warda riba mi, y no rabia pa esey. Wel, ora mi a core drenta mi cura di cas, mi a mir’e ta warda dilanti di mi porta di cas. El a core bin na mi auto y bisa: “Mi a hera bay cas pa bisa mi mama pa yama polis y hospital pa wak si juffrouw ta bon pasobra juffrouw no sa yega laat nunca. Mi tabata hopi preocupa.”

Un otro biaha mi a hacie un pregunta cu mi a pensa cu lo ta dificil pa un mucha di 12 aña contesta. Mi kier a wak si e lo a djis inventa un contesta. Ora mi a puntr’e, el a wak mi cu un cara serio y bisa mi: “Esey si ta un pregunta dificil. Mi ta bay skirbie pa mi puntra mi mayornan.” Manera el a priminti, e siguiente biaha cu el a bin pa nos studia, el a trece un Toren di Vigilancia cu tabatin e contesta pa mi pregunta. Esey ta loke a atrae mi na e testigonan di Jehova: nan publicacionnan ta duna contesta basa riba Bijbel pa tur mi preguntanan. Mi a sigui studia cu e mucha muher y despues di un aña mi a batisa como testigo di Jehova. *

E BENEFICIONAN:

Ora cu porfin mi a haya contesta satisfactorio pa mi preguntanan, mi kier a comparti nan cu tur hende. (Mateo 12:35) Na principio mi famia no tabata di acuerdo cu mi creencianan. Pero cu tempo nan actitud a cambia. Mi mama a cuminsa studia Bijbel poco prome cu el a fayece. Maske e no a logra batisa, mi ta sigur cu el a dicidi di sirbi Jehova.

Na 1978, mi a casa cu un Testigo cu yama Elias Kazan. Na 1981 nos a haya invitacion pa bira miembro di e famia di Betel na Merca. * Lamentablemente, Elias a fayece despues di apenas cuater aña cu nos a sirbi eynan. Maske mi tabata viuda, mi a keda sirbi na Betel. Esaki a yuda mi keda ocupa y esey tabata un consuelo pa mi.

Na aña 2006, mi a casa cu Richard Eldred, un miembro di e famia di Betel. Ami cu Richard ta sigui disfruta di nos privilegio di sirbi eynan. Awor cu mi a haya e berdad tocante Dios, mi ta echt sinti cu mi a haya no solamente contesta pa mi preguntanan sino tambe un bida cu berdadero proposito. Y tur esaki a cuminsa cu tres pregunta di un mucha muher.

^ par. 16 E mucha muher aki y su rumannan a yuda cinco di nan maestronan studia Bijbel y bira testigo di Jehova.

^ par. 18 “Betel” ta nifica “Cas di Dios.” Asina testigonan di Jehova ta yama nan sucursalnan rond mundo. (Genesis 28:17, 19) E miembronan di e famia di Betel ta cumpli cu varios tarea pa apoya e trabou educativo di testigonan di Jehova.