Sea cu bo ta traha mas tanto cu bo mente, cu bo man of cu un combinacion di nan dos, bo tin cu reconoce cu “for di tur esfuerso hende ta saka probecho.” (Proverbionan 14:23, BPK) Ki probecho? Pa cuminsa, trabou ta yuda bo cubri bo necesidadnan material. Ta berdad cu Dios a priminti di percura pa hende cu ta ador’e di curason. (Mateo 6:31, 32) Pero e ta spera cu nos tambe ta haci nos parti, esta, traha pa gana nos pan di cada dia.—2 Tesalonicensenan 3:10.

Nos por mira trabou anto como un medio pa logra algo, esta, pa cumpli cu nos responsabilidadnan na un manera digno. Joshua, di 25 aña, a bisa: “No tin nada mas mihor cu traha pa bo por percura pa bo mes. Si bo por cubri bo gastonan, bo trabou a logra su meta.”

Ademas, trabou duro ta duna nos respet propio. Nos por bisa asina pasobra no ta facil pa traha duro. Pero si nos tin disciplina, hasta si e trabou ta laf of dificil, nos por tin e satisfaccion di sa cu nos ta cumpliendo cu nos deber. Asina nos ta vence e tendencia di scoge e caminda mas facil. (Proverbionan 26:14) Den e sentido ey, trabou ta duna gran satisfaccion. Aaron, menciona den e articulo anterior, a bisa: “Mi ta sinti mi bon despues di un dia largo di trabou. Aunke mi sa keda morto cansa, y kisas otro hende no a ripara mes con duro mi a traha, mi si sa cu mi a logra algo.”

Bijbel ta papia bon di hende homber cu ta “[habil] den [nan] trabou” y hende muher “cu [ta gusta] ... traha cu [nan] mannan.” (Proverbionan 22:29; 31:13) Ta claro cu no ta di un dia pa otro un hende ta bira habil. Y generalmente hende no ta gusta haci un trabou cu nan no ta bon den dje. Kisas pa e motibo ey hopi hende no ta gusta nan trabou; simplemente nan no ta haci suficiente esfuerso pa bira habil den loke nan ta haci.

En realidad, un hende por siña gusta casi tur tipo di trabou, basta e tin e actitud corecto. Cu otro palabra, e mester pone su mes pa siña con pa haci e trabou bon. William, di 24 aña, a bisa: “Ora bo haci bo best y mira e bon resultado, bo ta sinti bo satisfecho. Pero si bo no ta haci mucho esfuerso of ta bira rond na trabou, nunca lo bo haya e satisfaccion ey.”

No cay den e trampa di pensa solamente riba cuanto placa bo ta gana. Puntra bo mes: Pakico mi tin cu haci e trabou aki? Kico lo sosode si niun hende no haci e trabou aki of no haci esaki bon? Con mi trabou ta beneficia otro hende?

Vooral e ultimo pregunta ey ta importante, pasobra ora nos mira con nos trabou ta beneficia otro hende, nos ta sinti nos mihor. Hesus a bisa: “Tin mas felicidad den duna cu den ricibi.” (Echonan 20:35) Fuera di esnan cu ta beneficia directamente di nos esfuersonan, manera cliente y doño di trabou, tin otro hende tambe cu ta beneficia di nos trabou, manera miembronan di nos famia y esnan den necesidad.

Nos famia. Ora un cabes di cas ta traha duro pa percura pa su famia, e ta yuda nan den por lo menos dos manera. Di prome, e ta percura pa nan tin e cosnan basico di bida manera cuminda, paña y un dak riba nan cabes. Asina e ta cumpli cu e responsabilidad cu Dios a dun’e pa “percura pa esnan cu ta pertenece na dje.” (1 Timoteo 5:8) Di dos, cu su ehempel e ta siña nan e importancia di ser un bon trahador. Shane, menciona den e articulo anterior, a bisa: “Mi tata ta un bon ehempel pasobra e tin un bon actitud pa cu trabou. E ta un hende honesto cu a traha duro henter su bida; mayor parti como carpinte. El a siña mi e balor di uza mi man pa traha cos cu ta util pa otro hende.”

Hende den necesidad. Apostel Pablo a conseha e cristiannan pa “traha duro ... pa [nan] por tin algo di comparti cu esun cu ta den necesidad.” (Efesionan 4:28) Si, ora nos ta traha duro pa percura pa nos famia, nos lo ta den e posicion tambe pa yuda esnan menos afortuna. (Proverbionan 3:27) Pues, mas duro nos traha, mas feliz nos lo sinti nos di por comparti algo cu otro hende.

Den Hesus su famoso Sermon Riba Sero, el a bisa: “Si un hende cu tin autoridad obliga bo bay un kilometer cu ne, bay dos kilometer cu ne.” (Mateo 5:41) Con bo por aplica e principio tras di e palabranan ey na bo trabou? En bes di djis haci lo minimo, haci mas di loke nan ta pidi di bo. Pone meta pa bo mes; wak si bo por logra haci bo trabou mas mihor of mas lihe posibel, hasta den e detayenan di mas chikito.

Ora bo duna algo extra, tin mas chens cu lo bo gusta bo trabou. Dicon? Pasobra ta abo ta dicidi di duna un poco mas. Ta abo mes ta esun cu kier, no pasobra otro hende ta obliga bo pa haci esaki. (Filemon 14) Esey ta laga nos corda e dicho: “Man di e hende balente lo goberna, ma negligencia ta hiba na trabou forsa.” (Proverbionan 12:24) Masha poco hende lo haya nan obliga di traha como catibo of haci trabou forsa. Pero un hende cu ta haci solamente lo minimo por sinti su mes asina, pasobra semper e tin cu sigui ordo di otro hende. Pero, e hende cu ta duna algo extra ta haci esey pasobra ta e mes kier.

Aunke trabou sigur tin su merito, corda cu bida no ta consisti di traha so. Ta berdad cu Bijbel ta anima hende pa ta bon trahador. (Proverbionan 13:4, BPK) Pero e no ta manda nos bira catibo di trabou si. Eclesiastes 4:6 ta bisa: “Un man yen di sosiego ta mihor cu dos mokete yen di trabou y coremento tras di biento.” Kico ta e punto? Un hende cu ta traha manera catibo nunca lo beneficia di e fruta di su esfuersonan si e trabou ta tuma tur su tempo y energia. En realidad, su trabou ta bira manera “coremento tras di biento.”

Bijbel por yuda nos haya un punto di bista balansa di trabou. Aunke e ta urgi nos pa traha, e ta conseha nos tambe pa “haci sigur kico ta e cosnan mas importante.” (Filipensenan 1:10) Kico ta e cosnan mas importante? Esakinan ta encera dedica tempo na nos famia y nos amigonan y, mas importante ainda, na nos actividadnan spiritual manera lesa y medita riba e Palabra di Dios.

Hende cu ta hiba un bida balansa probablemente ta disfruta mas di nan trabou. William, menciona anteriormente, a bisa: “Un di mi ex-doñonan di trabou tabata un hende hopi balansa. E tabata traha duro y pa motibo di e calidad di su trabou su clientenan tabata papia bon di dje. Pero na fin di dia, e tabata sa con pa laga su trabou pa e bay cas y dedica tempo na su famia y su religion. Y bo sa kico? E ta un di e hendenan di mas feliz cu mi conoce.”