Tin biaha, Bijbel ta uza e palabra aki pa referi na un homber cu a ser castra. Den tempo di Bijbel, nan tabata castra algun hende homber ora nan a captura nan, of a haci nan esclavo of pa castiga nan. Algun di e hombernan aki cu tabatin bon reputacion por a supervisa e casnan caminda e esposa- y concubinanan di rey tabata biba. Por ehempel, Hegai y Saasgaz tabata sirbi como guardia di e esposa- y concubinanan di Rey Asuero, kende segun hopi hende tabata Herhes I di Persia.—Ester 2:3, 14.

Sinembargo, no ta tur e eunuconan cu Bijbel ta papia di dje tabata hende castra. Algun experto riba tereno di Bijbel ta bisa cu nan tabata uza e palabra ey pa referi tambe na cualkier funcionario cu tabata traha pa un rey. Ta parce cu esey tabata e caso cu Ebed-melek, un amigo di Jeremias, y e oficial di Etiopia cu Felipe a predica na dje. Probablemente, Ebed-melek tabata un funcionario di alto rango pasobra e tabatin contacto directo cu Rey Sedekias. (Jeremias 38:7, 8) Y Bijbel ta bisa cu e oficial di Etiopia cu tabata na encargo di tur e tesoronan di e reina di Etiopia “a bay Jerusalem pa adora Dios.”—Echonan 8:27.

Ora Hesus tabata papia di un huicio cu lo tuma luga den futuro, el a conta un ilustracion basa riba un custumber cu wardadornan di su epoca tabatin. El a bisa: “Ora e Yiu di hende yega den su gloria ... lo e separa hende for di otro, mescos cu un wardador ta separa carne for di cabrito.” (Mateo 25:31, 32) Dicon wardadornan den tempo biblico tabata separa carne for di cabrito?

Normalmente, carne y cabrito tabata come yerba hunto durante dia. Pero anochi, ora e wardador tabata hinca nan den cura pa proteha nan contra friu, bestia feroz y ladron, e tabata separa nan y pone nan den un cura apart. (Genesis 30:32, 33; 31:38-40) Nan tabata haci esaki pa proteha e carnenan, specialmente e embra- y e lamchinan, pa e cabritonan, cu ta bestianan mas bruto, no haci nan daño. Ademas, segun e buki All Things in the Bible, nan tabata separa carne for di cabrito ora cu “e bestianan aki mester a dek, ora di chica lechi y ora di pela nan.” Pues, den su ilustracion, Hesus a referi na un custumber cu tabata bon conoci den Israel di antiguedad, pasobra mayoria di su oyentenan tabata biba den cunucu.