Bijbel ta bisa nos claramente kico Jehova y su Yiu, Hesus, lo bay haci cu e sufrimento cu Satanas e Diabel a causa. Bijbel ta declara: “Pa e motibo aki e Yiu di Dios [Hesus] a keda manifesta: pa destrui e obranan di Diabel.” (1 Juan 3:8) E mundo malbado aki, yen di golosidad, odio y actonan malbado, lo ser destrui. Ademas, Hesus ta priminti cu e “lo bay saca e gobernante di e mundo aki [Satanas e Diabel] afo.” (Juan 12:31) Sin e influencia di Satanas, Dios lo trece un husto mundo nobo y e Tera aki lo bira un luga pacifico.—2 Pedro 3:13.

Awor, kico lo pasa cu hende cabesura cu ta nenga di cambia y cu ta sigui insisti pa haci loke ta malo? Wel, Bijbel ta bisa bon cla: “E rectonan lo biba den e Tera, y e perfectonan lo keda den dje; ma e malbadonan lo wordo corta kita for di Tera, y e traidornan lo wordo ranca for di dje cu raiz cu tur.” (Proverbionan 2:21, 22) E influencia di e malbadonan lo no t’ey mas. Bou di e condicionnan pacifico aki, hende obediente gradualmente lo ser libra di e imperfeccion hereda.—Romanonan 6:17, 18; 8:21.

Con Dios lo elimina maldad den e mundo nobo ey? E no ta bay kita hende su boluntad liber y haci nan robot. Mas bien, e ta bay siña hende obediente su mandamentonan y yuda nan cambia nan mal pensamento- y accionnan.

Kico Dios ta bay haci cu sucesonan imprevisto? El a priminti cu pronto su Reino lo tuma control di Tera. Dios a nombra Hesucristo como Rey di e Reino ey y e tin poder pa cura hende enfermo. (Mateo 14:14) Hesus tin poder pa controla e forsanan di naturaleza tambe. (Marco 4:35-41) Pues, sufrimento causa pa cosnan malo lo no “bin [mas] diripiente riba” hende. (Eclesiastes 9:12) Bou di Cristo su reinado, calamidad lo no asota humanidad mas.—Proverbionan 1:33.

Kico di e miyones di hende inocente cu a muri un morto tragico? Poco prome cu Hesus a resucita su amigo Lazaro, el a bisa: “Ami ta e resureccion y e bida.” (Juan 11:25) Asina mes, Hesus tin e poder pa resucita esnan cu a muri!

Si e idea di biba den un mundo sin maldad ta atrae bo, pakico bo no ta analisa Bijbel mas a fondo y siña mas tocante e Dios berdadero y su proposito? Gustosamente, testigonan di Jehova den bo area lo yuda bo haya e conocemento ey. Bo por tuma contacto cu nan of skirbi e editornan di e revista aki.