Sigui pa e contenido

Sigui pa e index

Dicon Tin Asina Tanto Sufrimento?

Dicon Tin Asina Tanto Sufrimento?

Pa nos por compronde pakico tin asina tanto sufrimento y dicon e esfuersonan humano pa caba cu esaki a fracasa, nos tin cu haya sa kico realmente ta causa sufrimento. Aunke tin varios causa y hopi factor envolvi, nos por ta contento cu Bijbel ta yuda nos identifica nan. Den e articulo aki nos lo analisa cinco motibo basico dicon tin asina tanto sufrimento. Nos ta invita bo pa tuma tempo y examina kico Bijbel ta bisa y mira con e ta yuda nos yega na raiz di e problema aki. —2 Timoteo 3:16.

RESULTADO DI MAL GOBERNACION

Bijbel ta bisa: “Ora cu un malbado ta goberna, pueblo ta suspira.”—Proverbionan 29:2.

Historia ta yen di ehempel di dictador cu a goberna cu man duro y cu a causa hopi sufrimento pa nan pueblo. Claro cu no ta tur dirigente politico ta goberna di tal forma. Algun tin bon intencion. Pero unabes nan yega na poder, hopi biaha nan ta ripara cu conflicto interno y lucha pa poder ta frustra nan esfuersonan. Otronan ta haci mal uzo di nan poder pa saca probecho riba custia di pueblo. Henry Kissinger, ex-minister di asuntonan exterior di Merca, a yega di bisa: “Historia ta un sucesion di esfuersonan cu a fracasa, di aspiracionnan cu no a materialisa.”

Bijbel ta indica tambe cu “no ta keda na hende pa dirigi su pasonan.” (Jeremias 10:23) Hende imperfecto no tin e sabiduria ni e vision necesario pa dirigi nan mes asuntonan cu exito. Si un hende no por dirigi ni su propio pasonan, con lo e por dirigi esnan di henter un nacion? Bo ta compronde awor dicon gobernantenan no por caba cu sufrimento? De echo, den mayoria di caso, ta mal gobernacion ta e causa di sufrimento!

INFLUENCIA DI RELIGION FALSO

Hesus a bisa: “Na esaki tur hende lo sa cu boso ta mi discipelnan, esta, si boso ta stima otro.”—Juan 13:35.

Lidernan religioso di tur denominacion ta predica tocante amor y union. Pero echo ta cu nan no a yuda nan miembronan cultiva un amor suficiente grandi pa vence prehuicio. En bes di yuda nan cultiva amor, hopi bes religion mes ta fomenta division, odio y pleito entre hende y nacion. E teologo Hans Küng a bisa den e parti final di su buki Christianity and the World Religions: “E luchanan politico mas ferviente y cruel ta esnan cu religion a ocasiona, inspira y legalisa.”

 Ademas, lidernan di hopi religion ta aproba relacion sexual pafo di matrimonio y tambe homosexualidad. Esey a hiba na un explosion di enfermedad, abortus, embaraso no desea y matrimonio y famia kibra, loke a resulta den hopi dolor y angustia.

IMPERFECCION HUMANO Y DESEONAN EGOISTA

“Cada hende ta ser poni na prueba ora e ser atrai y seduci pa su mes deseo. Anto ora nutri e deseo, e ta duna luz na pica.”—Santiago 1:14, 15.

Debi na e imperfeccion cu nos a hereda, nos tur tin e tendencia di faya, y tambe nos tin cu lucha contra e impulso di ‘haci loke nos carni ta desea.’ (Efesionan 2:3) Pero ora nos haya un mal deseo y un oportunidad presenta pa cumpli cu ne, e lucha ta bira mas duro ainda. Si nos entrega na deseonan robes, e consecuencianan por ta fatal.

E autor P. D. Mehta a skirbi: “Gran parti di nos sufrimento ta debi na nos mes mal deseonan, nos coremento tras di placer desenfrena y egoista, nos cudishi y nos ambicion.” Mal deseo y tur tipo di adiccion—na alcohol, droga, wega di placa, sex y otro cosnan—a hiba hopi “hende respeta den comunidad” na ruina y a causa hopi sufrimento na nan famia, amigo y otro hende. En bista di imperfeccion humano, nos ta di acuerdo cu loke Bijbel ta bisa: “Henter creacion hunto ta sigui keha y ta keda den dolor.”—Romanonan 8:22.

PODER DI SPIRITONAN MALBADO

Bijbel ta mustra cu ta Satanas ta “e dios di e mundo aki” y cu otro spiritonan malbado y poderoso, esta, e demoñonan, a uni cu ne.—2 Corintionan 4:4; Revelacion 12:9.

Mescos cu Satanas, e demoñonan aki tambe ta controla y gaña hende. Apostel Pablo a admiti esaki ora el a bisa: “Nos lucha no ta contra carni y [weso], sino contra gobierno, contra autoridad, contra gobernante di mundo di e scuridad aki, contra forsanan spiritual di maldad den luganan celestial.”—Efesionan 6:12.

Aunke e demoñonan gusta tormenta hende, esey toch no ta nan meta principal. Loke ta interesa nan mas ta pa aleha hende for di Jehova, e Dios Haltisimo. (Salmo 83:18; Revelacion 4:11) Astrologia, magia, hacimento di bruha y miramento di destino ta djis algun di e practicanan cu e demoñonan ta uza pa gaña y controla hende. Ta pesey Jehova ta spierta nos di e peligernan ey y ta proteha tur esnan cu kier opone Satanas y e demoñonan.—Santiago 4:7.

NOS TA “DEN E ULTIMO DIANAN”

Un dos mil aña pasa, Bijbel a bisa: “Sa esaki: den e ultimo dianan lo bin temponan critico, dificil pa trata cu ne.”

Pa mustra dicon tempo ta critico, Bijbel ta sigui bisa: “Pasobra hende lo stima nan mes, stima placa; nan lo ta bromado, arogante, ... sin cariño; nan lo no ta dispuesto pa cera ningun acuerdo; nan lo ta calumniador, sin dominio propio, feroz, sin amor pa loke ta bon, traidor, cabesura, hincha di orguyo, cu ta stima placer en bes di stima Dios.” Pues, un di e motibonan principal pakico tin asina tanto sufrimento aworaki ta pasobra nos ta bibando “den e ultimo dianan.”—2 Timoteo 3:1-4.

En bista di loke nos a caba di considera, no ta bisto awor dicon hende, a pesar di tur nan bon intencionnan, no por caba cu sufrimento? Pero unda nos por haya yudansa? Nos tin cu acudi na nos Creador, kende a priminti di “destrui e obranan di Diabel” y su siguidornan. (1 Juan 3:8) E siguiente articulo lo bay mustra kico Dios lo haci pa caba cu tur causa di sufrimento.