Sigui pa e contenido

Sigui pa e index

 Siña Conoce e Palabra di Dios

Kico Lo Sosode Riba e Dia di Huicio?

Kico Lo Sosode Riba e Dia di Huicio?

E articulo aki ta trata algun pregunta cu kisas bo tin y ta mustra bo unda pa haya e contestanan den bo Bijbel. Si bo ta desea, Testigonan di Jehova gustosamente lo trata e preguntanan aki cu bo.

1. Kico e Dia di Huicio ta encera?

Manera e plachi na man drechi ta mustra, hopi hende ta kere cu riba e Dia di Huicio, miles di miyones di alma lo ser reuni dilanti di e trono di Dios pa ser husga di acuerdo cu nan echonan: Esnan cu a biba bon lo bay cielo, mientras cu esnan cu a biba malo lo ser tormenta den fierno. Pero Bijbel ta mustra cu e proposito di e Dia di Huicio ta pa caba cu tur inhusticia. (Salmo 96:13) Si, Dios a nombra Hesus como e Hues cu lo trece berdadero husticia rond mundo.​—Lesa Isaias 11:1-5; Echonan 17:31.

2. Con e Dia di Huicio lo trece berdadero husticia?

Debi cu e prome homber, Adam, a rebela deliberadamente contra Dios, tur su descendientenan ta peca, sufri y muri. (Romanonan 5:12) Pa corigi e daño cu e inhusticia ey a causa, Hesus lo resucita miles y miyones di hende for di morto. E buki di Revelacion ta mustra cu esaki lo tuma luga durante Cristo su Reinado di Mil Aña.​—Lesa Revelacion 20:4, 11, 12.

Esnan cu resucita lo no ser husga a base di e cosnan cu nan a haci prome cu nan a muri. Nan lo ser husga a base di e manera cu nan a hiba nan bida despues di a siña for di e “bukinan” cu Revelacion capitulo 20 ta papia di dje. (Romanonan 6:7) Anto apostel Pablo a bisa cu “tanto hende husto como inhusto” lo ser resucita y lo haya oportunidad di siña tocante Jehova.​—Lesa Echonan 24:15.

  3. Kico e Dia di Huicio lo logra?

Hende cu a muri sin nunca haya chens di siña conoce Jehova y sirbie lo haya e oportunidad di cambia y haci loke ta bon. Anto si nan haci loke ta bon, nan resureccion lo ta “un resureccion di bida.” Pero algun hende cu haya resureccion lo nenga di obedece Jehova; nan resureccion lo ta “un resureccion di huicio.”​—Lesa Juan 5:28, 29; Isaias 26:10; 65:20.

Na final di e Dia di Huicio, cu lo dura mil aña, humanidad obediente lo ta perfecto, manera tabata e caso na principio. (1 Corintionan 15:24-28) Esta un futuro maraviyoso ta spera hende obediente! Como e ultimo prueba, Jehova lo saca Satanas e Diabel for di abismo, caminda e tabata encarcela pa mil aña. Satanas lo bolbe haci un intento pa pone hende bira infiel na Jehova. Pero esnan cu resisti Satanas lo disfruta di bida riba tera pa semper.​—Lesa Isaias 25:8; Revelacion 20:7-9.

4. Cua otro dia di huicio lo beneficia humanidad?

Bijbel ta uza e expresion “dia di huicio” pa referi tambe na e destruccion cu lo pone un fin na e mundo malbado aki. E dia di huicio aki lo bin diripiente, mescos cu e Diluvio den tempo di Noe cu a caba cu henter un generacion malbado. Pero nos por ta masha contento pasobra e ‘destruccion aki di hende malbado’, cu lo bin sigur, lo habri caminda pa un sociedad nobo di hende den cua “husticia lo biba.”​—Lesa 2 Pedro 3:6, 7, 13.