1. Dicon ta asina importante pa fortalece nos fe? (Wak e prome plachi.)

BO A yega di puntra bo mes: Ami ta e tipo di persona cu Jehova lo kier salba durante e tribulacion grandi, y permiti drenta den e mundo nobo? Naturalmente, tin varios factor importante cu nos tin cu tene cuenta cu ne si nos kier sobrevivi. Pablo a enfatisa esun di mas importante: “Sin fe ta imposibel pa agrada Dios.” (Heb. 11:6) Esaki ta parce algo simpel, pero e realidad ta cu “no ta tur hende tin fe.” (2 Tes. 3:2) E textonan aki ta yuda nos mira con importante ta pa fortalece nos fe.

2, 3. (a) Kico nos por siña for di apostel Pedro tocante fe? (b) Ki preguntanan nos lo bay considera?

² Apostel Pedro a enfatisa e importancia di fe ora el a bisa cu fe mester wordo poni na prueba pa e “por ta un motibo pa boso ricibi alabanza, gloria y honor na e revelacion di Hesucristo.” (Lesa 1 Pedro 1:7.) Mirando cu e tribulacion grandi ta asina cerca, nos mester haci sigur cu nos tin e clase di fe pa nos por ta entre esnan cu Hesus lo recompensa ora e wordo revela. Nos kier ta “e tipo di hende cu tin fe, locual ta conserva nos alma na bida.” (Heb. 10:39) Cu esey na mente, nos lo por roga Dios mescos cu e homber cu a bisa: “Yuda mi caminda mi falta fe!” (Mar. 9:24) Of nos lo por bisa mescos cu e  apostelnan di Hesus: “Duna nos mas fe.”—Luc. 17:5.

³ Den e articulo aki nos lo considera e siguiente preguntanan: Con nos por edifica nos fe? Con nos por mustra cu nos tin fe? Y ki siguransa nos tin cu Jehova lo duna nos mas fe si nos pidie?

4. Cua ehempelnan por motiva nos pa edifica nos fe?

⁴ Ya cu “tur loke a ser skirbi anteriormente a ser skirbi pa nos instruccion”, nos por siña di e ehempelnan di fe cu tin den Bijbel. (Rom. 15:4) Ora nos lesa tocante hendenan manera Abraham, Sara, Isaak, Jacob, Moises, Rahab, Gideon, Barak y otronan, esey lo motiva nos pa analisa nos propio fe. (Heb. 11:32-35) Ademas, experencia di rumannan den nos tempo cu tin fe sobresaliente lo por motiva nos pa haci esfuerso pa edifica nos fe. *

5. (a) Con Elias a mustra cu e tabatin un fe fuerte den Jehova? (b) Y kico Elias su ehempel ta motiva nos pa haci?

⁵ Un bunita ehempel den Bijbel ta esun di profeta Elias. Na varios ocasion Elias a mustra un confianza completo den Jehova. Laga nos wak cinco di nan. (1) Ora cu Elias a informa Rey Acab cu Jehova lo trece un secura, el a bisa cu curashi: “Manera SEÑOR ... ta biba, ... lo no tin ni serena ni awasero e añanan aki, si no ta pa medio di mi palabra.” (1 Rey. 17:1) (2) Elias a confia cu Jehova lo percura tur loke ta necesario p’e y pa otronan durante e secura. (1 Rey. 17:4, 5, 13, 14) (3) E tabata convenci cu Jehova lo por a lanta un mucha for di morto. (1 Rey. 17:21) (4) Riba Sero Carmelo, Elias no tabatin duda cu Jehova lo cende su sacrificio na candela. (1 Rey. 18:24, 37) (5) Ora a yega tempo pa Jehova caba cu e secura, Elias a bisa Acab hasta prome cu tabatin cualkier indicacion cu awa lo yobe: “Bay, come y bebe, pasobra tin zonido di un awasero pisa.” (1 Rey. 18:41) No ta berdad cu relatonan asina ta pone nos examina nos mes pa wak si nos fe ta fuerte?

6. Kico ta necesario pa nos por tin un fe fuerte?

⁶ Fe ta un cualidad di e fruta di spirito. Pesey nos no por tin un fe fuerte sin Dios su yudansa. (Gal. 5:22) Pues lo ta sabi pa sigui Hesus su conseho y pidi Jehova pa duna nos spirito santo. Hesus ta sigura nos cu e Tata “lo duna spirito santo na esnan cu pidie.”—Luc. 11:13.

7. Con nos por mantene un fe fuerte? Duna un ehempel.

⁷ Una bes nos tin un fe fuerte, nos tin cu sigui fortalec’e. Nos por compara nos fe cu un candela. Ora bo cende un candela, e por bira hopi grandi. Sinembargo, si bo no haci nada pa tene e candela cendi, pocopoco e lo paga y bira sas. Pero, tanten cu bo sigui pone palo riba e candela e lo sigui kima. Esey ta conta tambe pa nos fe. Door di lesa y studia Bijbel regularmente nos amor pa Jehova y su Palabra lo sigui crece. Como resultado, nos lo mantene y fortalece nos fe.

8. Kico lo yuda nos sigui mantene y fortalece nos fe?

⁸ Pues, no ta suficiente pa djis depende riba loke bo a siña prome cu bo a batisa. (Heb. 6:1, 2) Por ehempel, si nos  analisa profecianan di Bijbel cu a cumpli caba, nan por yuda fortalece nos fe. Ademas, nos por uza e Palabra di Dios pa analisa nos mes pa wak si nos tin un fe fuerte.—Lesa Santiago 1:25; 2:24, 26.

9, 10. Con nos por fortalece nos fe door di: (a) tin bon asociacion? (b) asisti na nos reunionnan? (c) predica?

⁹ Apostel Pablo a encurasha cristiannan pa nan “por tin un intercambio di estimulo” y anima otro pa medio di nan fe. (Rom. 1:12) Door di asocia cu nos rumannan, nos por yuda otro haya mas fe. Principalmente ora cu nos asocia cu esnan cu ya a demostra cu nan tin un fe fuerte. (Sant. 1:3) Mal asociacion por caba cu nos fe, pero bon asociacion por fortalec’e. (1 Cor. 15:33) Esaki ta un motibo pakico Bijbel ta anima nos pa “no keda sin bay e reunionnan”, mas bien pa sigui “anima otro.” (Lesa Hebreonan 10:24, 25.) Un otro motibo ta cu na nos reunionnan nos ta haya instruccion cu por yuda fortalece nos fe. Esey ta na harmonia cu e palabranan di apostel Pablo: “Fe ta bin despues cu un hende tende e palabra.” (Rom. 10:17) Nos ta haci esfuerso pa bay reunion y asocia cu nos rumannan?

¹⁰ Ora nos participa den e trabou di predica, nos lo yuda fortalece tanto nos mes fe como e fe di esnan cu nos ta topa den sirbishi. Esaki lo yuda nos confia plenamente den Jehova y papia cu curashi, manera tabata e caso cu e cristiannan di prome siglo.—Echo. 4:17-20; 13:46.

11. Dicon nos por bisa cu Caleb y Josue tabatin un fe fuerte, y con nos por imita nan?

¹¹ Segun cu nos ta mira con Jehova ta yuda nos y contesta nos oracionnan, nos fe ta sigui crece. Esey ta loke a sosode cu Caleb y Josue. Nan a mustra fe den Jehova ora nan a bay spiona e Tera Priminti. Sinembargo, nan fe a sigui crece mientras cu nan tabata mira con Jehova tabata guia y yuda nan bes tras bes. Pesey, Josue por a bisa e Israelitanan cu conviccion: “Ni un palabra di tur e bon palabranan cu SEÑOR boso Dios a papia tocante di boso no a faya.” El a agrega: “Pesey anto, teme SEÑOR y sirbie cu sinceridad y den berdad ... Pa loke ta ami y mi cas, nos lo sirbi SEÑOR.” (Josue 23:14; 24:14, 15) Nos fe lo sigui crece ora nos confia den Jehova y mira con e ta yuda nos personalmente.—Sal. 34:8.

12. Con nos por demostra cu nos tin un fe fuerte?

¹² Con nos por demostra cu nos tin un fe fuerte? E discipel Santiago a bisa: “Ami lo mustra bo mi fe pa medio di mi obranan.” (Sant. 2:18) Nos obranan lo mustra cu nos tin berdadero fe. Laga nos wak algun ehempel.

13. Dicon e trabou di predica ta un manera pa mustra cu nos tin fe?

¹³ Un bon manera pa mustra cu nos tin fe ta door di participa den e trabou di predica. Dicon? Pasobra ora nos ta predica, nos ta mustra cu nos tin fe cu e fin ta cerca y cu “e lo no tarda.” (Hab. 2:3) Con nos por haya sa con fuerte nos fe ta? Wel, lo ta bon pa nos puntra nos mes: Con importante e trabou di predica ta pa mi? Mi ta haci tur loke mi por pa papia cu otro hende tocante Dios? Mi ta purba di haci mas den mi sirbishi? (2 Cor. 13:5) Bo por mustra cu bo tin un fe fuerte door di “haci declaracion publico di bo fe pa haya salbacion.”—Lesa Romanonan 10:10.

14, 15. (a) Con nos por mustra den nos bida diario cu nos tin fe? (b) Conta un experencia di un famia cu a mustra cu nan tin un fe fuerte.

 ¹⁴ Tambe nos por mustra cu nos tin fe ora nos ta lucha cu e dificultadnan di bida. Sea cu nos ta enfrenta maleza, desanimacion, depresion, pobreza, of otro problemanan, nos tin confianza cu Jehova y su Yiu lo “yuda nos na e momento apropia.” (Heb. 4:16) Nos por mustra e tipo di confianza ey door di pidi Jehova pa yuda nos no solamente cu cosnan spiritual, sino tambe cu cosnan material. Hesus a bisa cu nos por pidi Dios pa “e pan cu nos mester pa e dia ey.” (Luc. 11:3) Relatonan di Bijbel ta convence nos cu Jehova por percura pa nos. Por ehempel, durante un secura severo cu tabatin na Israel, Jehova a percura cuminda y awa pa Elias. Manera Jehova a ordena: “E raafnan tabata trece pan cu carni p’e mainta y pan cu carni atardi; y e tabata bebe for di e rooi.” (1 Rey. 17:3-6) Nos tin fe cu Jehova tin e capacidad pa percura pa nos necesidadnan tambe.

¹⁵ Nos tin confianza cu ora nos aplica principio di Bijbel, nos lo no falta nada. Rebecca, un ruman muher casa, cu ta biba na Asia, a experencia esaki cu su famia. Nan a aplica Mateo 6:33 door di pone e Reino na prome luga den nan bida y Proverbionan 10:4 door di traha duro. Rebecca a splica cu na un dado momento su esposo a kita for di trabou. El a haci esaki pasobra el a sinti cu e presion cu e tabata haya di su trabou secular por a pone e spiritualidad di su famia na peliger. Sinembargo, nan tabatin cuater yiu pa cria. Rebecca ta conta kico a sosode: “Nos a cuminsa traha cos dushi y bende nan. Durante tur e añanan cu nos a gana nos pan di e manera ey, nos a sinti cu Jehova nunca a bandona nos. Semper nos tabatin algo di come.” Nan a confia cu Bijbel su conseho ta esun mihor. Abo tambe a yega di pasa den un situacion unda cu bo mester a mustra cu bo tin e mesun confianza ey?

16. Kico lo ta e resultado si nos ta confia den Dios?

¹⁶ Si nos sigui Dios su guia, nos por ta  sigur cu semper lo e duna bon resultado. Pablo a cita e palabranan di Habacuk ora el a bisa: “E husto lo biba pa motibo di su fe.” (Gal. 3:11; Hab. 2:4) Pesey, ta importante pa nos pone fe den Esun cu realmente por yuda nos. Pablo ta recorda nos cu Dios ta “esun cu, segun su poder cu ta obra den nos, por haci infinitamente mas di tur loke nos ta pidi of por imagina.” (Efe. 3:20) Como sirbidornan di Jehova nos ta haci tur loke nos por pa haci Dios su boluntad, pero como cu nos tin limitacion, nos ta confia den Jehova pa bendiciona nos esfuerso. Esta agradecido nos ta cu Jehova ta cu nos!

17. (a) Con e apostelnan a haya contesta pa nan peticion pa mas fe? (b) Dicon nos por confia cu Jehova lo contesta nos peticion pa mas fe?

¹⁷ Despues di loke nos a caba di considera, nos por sinti manera e apostelnan cu a bisa Hesus: “Duna nos mas fe.” (Luc. 17:5) Na Pentecoste di aña 33 di prome siglo, e apostelnan a haya un contesta pa nan peticion ora nan a ricibi spirito santo cu a yuda nan compronde Dios su proposito mas mihor. Esaki a fortalece nan fe. Como resultado, nan a cuminsa cu e campaña di predica di mas grandi cu a yega di tuma luga te cu e tempo ey. (Col. 1:23) Nos por confia cu Jehova lo contesta nos peticion pa mas fe? Si, pasobra Bijbel ta sigura nos cu si nos pidie “di acuerdo cu su boluntad” e lo tende nos.—1 Juan 5:14.

18. Con Jehova ta bendiciona esnan cu ta sigui traha riba nan fe?

¹⁸ Ora nos pone tur nos confianza den Jehova, esey ta agrad’e. Jehova lo contesta nos peticion pa mas fe, e lo yuda nos fe crece mas y mas pa asina nos “ser considera digno di ricibi e Reino di Dios.”—2 Tes. 1:3, 5.