1-3. Kico ta e dificultadnan cu parehanan casa ta enfrenta? (Wak e prome plachi.)

“SI DI berdad bo ta haci esfuerso y ta demostra cu bo kier pa bo matrimonio bay bon, Jehova lo bendicion’e.” Esey ta loke un esposo cu tin 38 aña felizmente casa a bisa. Si, esposo- y esposanan por tin un bida casa hopi feliz, y den tempo dificil nan por apoya otro.—Prov. 18:22.

² Ta normal cu de bes en cuando parehanan casa ta haya nan cu dificultad den bida. Bijbel ta yama esey “tribulacion den carni.” (1 Cor. 7:28; wak nota) Dicon esey ta sosode? Tin varios motibo. Pa cuminsa, problema- y preocupacionnan diario por causa tension den un matrimonio. Ademas, tanto e esposo como e esposa ta imperfecto y tin biaha nan por bisa of haci algo cu ta hurt sintimento di otro, of nan no ta comunica bon cu otro y esaki por hiba na mal comprondemento. (Sant. 3:2, 5, 8) Banda di esey, hopi pareha tin problema pa haya un balansa entre trabou cu ta exigi hopi di nan y e debernan cu nan tin cu cumpli cu ne como mayor. Tambe hopi di nan tin cu trata cu problema financiero, maleza of otro dificultad. Stress y cansancio ta acumula y tur esey ta pone cu no ta facil pa nan saca tempo necesario pa fortalece nan matrimonio. Pocopoco, nan amor por cuminsa fria y nan por cuminsa perde respet  pa otro. Pero no esey so, personanan casa ta enfrenta un otro peliger. Ta trata aki di loke Bijbel ta yama “e obranan di carni”, y esey ta encera inmoralidad sexual, conducta sinberguensa, hostilidad, bringamento, jaloersheid, atake di rabia y pleitamento. E cosnan ey por kibra e fundeshi di hasta un matrimonio cu ta parce fuerte.—Gal. 5:19-21.

³ Loke ta empeora e asunto ta cu nos ta biba den “e ultimo dianan” y e hendenan rond di nos hopi biaha ta egoista y tin otro mal actitud cu por perhudica un matrimonio. (2 Tim. 3:1-4) Por ultimo, parehanan casa tin cu resisti atake di un enemigo malicioso cu ta determina pa kibra nan matrimonio. Apostel Pedro a spierta nos: “Boso adversario, Diabel, ta cana rond manera un leon cu ta [brul], buscando ken e por habraca.”—1 Ped. 5:8; Rev. 12:12.

4. Con un pareha por tin un matrimonio solido y feliz?

⁴ Un ruman homber na Japon a admiti: “Mi tabata bou di hopi tension pa motibo di nos situacion economico. Anto como cu ami cu mi casa no tabata echt comunica cu otro, e tambe a haya hopi stress. Pa colmo, el a bira hopi malo poco tempo pasa. Nos tabatin asina hopi stress cu tin biaha nos tabata clash cu otro.” Ta bisto cu den matrimonio tin algun problema cu nos no por evita, pero cu Jehova su yudansa, nos por supera nan y disfruta di un matrimonio solido y feliz. (Lesa Salmo 127:1.) Laga nos analisa cinco factor cu, mescos cu bloki pa traha cas, por yuda nos construi of edifica un matrimonio fuerte y duradero. Tambe nos lo wak con amor ta e cement cu ta pega e blokinan ey na otro.

5, 6. Kico esposo y esposa por haci pa inclui Jehova den nan matrimonio?

⁵ Si un esposo y esposa ta leal y sumiso na Jehova, Esun cu a crea matrimonio, nan relacion lo tin un fundeshi solido. (Lesa Eclesiastes 4:12.) Con nan por inclui Jehova den nan matrimonio? Nan por haci esey siguiendo su guia y conseho. Bijbel a bisa di e pueblo di Dios di antiguedad: “Bo horea lo tende un palabra tras di bo ta bisa: ‘Esaki ta e caminda, cana den dje’, ki ora cu boso bira na man drechi of na man robes.” (Isa. 30:20, 21) Awe, parehanan ta “tende” loke Jehova ta bisa ora nan ta lesa su Palabra hunto. (Sal. 1:1-3) Tambe nan por fortalece nan matrimonio si nan percura pa nan programa di Adoracion Como Famia ta agradabel y edificante. Un otro factor importante ta pa nan dos haci oracion hunto tur dia. Asina nan por resisti e atakenan di e mundo aki cu ta di Satanas.

⁶ Gerhard, di Alemania, a bisa: “Ki ora cu nos tin un problema cu otro of un mal comprondemento cu ta kita nos goso, e consehonan cu nos ta haya den e Palabra di Dios ta yuda nos tene pasenshi y pordona. E dos cualidadnan aki ta indispensabel pa un matrimonio bay bon.” Ora tanto e esposo como e esposa ta haci tur lo posibel pa inclui Dios den nan matrimonio y ta participa hunto den actividadnan spiritual, nan relacion cu Dios y cu otro ta bira mas fuerte, y nan lo ta mas feliz.

7. Con un esposo mester eherce su autoridad como cabes?

⁷ E manera cu un esposo ta dirigi su famia por yuda contribui na un matrimonio fuerte y feliz. Bijbel ta bisa: “Cabes di tur homber ta Cristo; cabes di muher ta homber.” (1 Cor. 11:3) Den e contexto aki, Pablo a splica con esposonan mester eherce nan autoridad como cabes: Nan mester trata nan esposa mescos cu Cristo a trata su discipelnan. Hesus nunca tabata cruel ni bruto. Al contrario, semper e tabata  amoroso, amabel, rasonabel, di genio suave y humilde.—Mat. 11:28-30.

8. Con un esposo por gana e respet y amor di su esposa?

⁸ Un esposo cristian no tin nodi corda su casa cada bes cu e mester respet’e. Mas bien, e esposo ta trata su esposa cu “conocemento”, es decir, cu consideracion y comprension. E ta duna e esposa “honor manera na un purun mas fragil, esun femenino.” (1 Ped. 3:7, wak nota) Tanto den publico como den priva, un esposo mester papia cu respet cu su esposa y tene consideracion cu ne. Na e manera cu e ta trata y papia cu su esposa, e homber ta mustra cu su casa ta precioso p’e. (Prov. 31:28) Ora un esposo ta trata su esposa na e manera ey, e ta gana e respet y amor di su casa, y Jehova lo bendiciona nan matrimonio.

9. Con un esposa ta demostra cu e ta humilde y sumiso?

⁹ Algo cu por yuda nos humilia nos mes “bou di e man poderoso di Dios” ta si nos tin amor sin egoismo p’e cu ta basa riba su principionan. (1 Ped. 5:6) Con un esposa por demostra cu e ta respeta e autoridad di Jehova? Un manera ta door di apoya su esposo y coopera cu ne. Bijbel ta bisa: “Esposanan, sea sumiso na boso esposo, ya cu esey ta apropia den bista di Señor.” (Col. 3:18) Claro cu no ta tur decision di un esposo ta cay na agrado di su casa. Pero tanten cu e decisionnan ey no ta bay contra e leynan di Dios, un esposa sumiso ta dispuesto pa apoya su casa.—1 Ped. 3:1.

10. Dicon ta asina importante pa amor motiva un esposa pa ta sumiso?

¹⁰ Jehova a duna esposanan un papel masha valioso den e matrimonio. E ta e “compañera [of, partner]” di su esposo. (Mal. 2:14) Ora e pareha tin cu tuma un decision, e esposa por expresa cu respet kico e ta pensa y con e ta sinti, sin impone su opinion. Aunke e ta sumiso, su aporte ta valioso, y pesey un esposo sabi ta scuch’e cu atencion. (Prov. 31:10-31) Ora amor ta motiva un esposa pa ta sumiso, esey ta contribui na felicidad, paz y harmonia  den e famia. Di e manera ey, tanto e esposo como e esposa lo tin e satisfaccion di sa cu nan matrimonio ta agrada Jehova.—Efe. 5:22.

11. Dicon ta hopi importante pa pordona?

¹¹ Un otro bloki cu ta necesario pa un matrimonio por ta duradero ta pordon. Ora un pareha ta “sigui soporta otro y pordona otro libremente”, nan relacion como pareha ta bira mas fuerte. (Col. 3:13) Di otro banda, si nan ta keda corda e fayonan di pasado y ta uza esakinan pa ataca otro, nan matrimonio no ta bay bon. Mescos cu scheur den un muraya ta zwak e, asina rabia y rencor ta afecta un matrimonio, y cada bes ta bira mas dificil pa un pareha pordona otro. Pero si nan ta dispuesto pa pordona otro libremente, mescos cu Jehova ta pordona nan, nan matrimonio ta bira hopi mas fuerte.—Mik. 7:18, 19.

12. Con amor ta tapa “un multitud di pica”?

¹² Amor berdadero “no ta keda corda e malo cu hende a hacie”; mas bien, e “ta tapa un multitud di pica.” (1 Cor. 13:4, 5; lesa 1 Pedro 4:8.) Cu otro palabra, ora nos ta stima un hende, nos lo no pone un limite na e cantidad di biaha cu nos ta pordon’e. Ora apostel Pedro a puntra cuanto biaha e mester pordona un hende, Hesus a contest’e: “Te cu 77 biaha.” (Mat. 18:21, 22) Kico Hesus tabata kiermen? Wel, e kier a mustra cu no tin un limite na e cantidad di biaha cu un cristian mester pordona otro.—Prov. 10:12. *

13. Kico nos por haci si ta dificil pa nos pordona?

¹³ Annette, di Alemania, a bisa: “Si un pareha no ta dispuesto pa pordona otro, rencor y desconfianza ta crece, y esey ta veneno pa un matrimonio. Pero ora nan ta dispuesto pa pordona otro, esey ta haci e laso matrimonial mas fuerte y ta hala nan mas cerca di otro.” Kico nos por haci si ta dificil pa nos pordona? Loke por yuda nos ta cultiva un actitud positivo y apreciativo. Concentra riba e cosnan bon di otro, y elogia otro pa eseynan. (Col. 3:15) Como resultado, nos lo tin paz mental, nos lo ta mas uni y Jehova lo bendiciona nos.—Rom. 14:19.

14, 15. (a) Kico ta e Regla di Oro? (b) Con e Regla di Oro por yuda un matrimonio?

¹⁴ Nos tur gusta pa hende trata nos cu dignidad y respet. Nos ta aprecia ora hende ta scucha nos y ta tene cuenta cu nos sintimentonan. Pero casi sigur bo a yega di tende un persona bisa: “Mi ta bay pag’e pa e daño cu el a haci mi.” Tin biaha nos por compronde dicon hende ta reacciona asina, pero Bijbel ta bisa nos: “No bisa: ‘Lo mi haci cu ne mescos cu el a haci cu mi.’” (Prov. 24:29) Hesus a siña nos con ta e mihor manera pa reacciona ora cu un hende trata nos malo. El a bisa: “Manera boso kier pa hende haci cu boso, boso mester haci mescos cu nan.” (Luc. 6:31) Hopi hende conoce e principio aki cu Hesus a duna como e Regla di Oro. Loke Hesus tabata kiermen ta cu nos mester trata hende manera nos lo desea pa nan trata nos, y no paga malo cu malo. Den matrimonio, esaki ta nifica cu nos tin cu hinca den e relacion loke nos lo kier saca for di dje.

¹⁵ Parehanan casa ta fortalece nan  relacion ora nan ta mustra cu nan ta interesa den e sintimentonan di e otro persona. Un esposo na Sur Africa a bisa: “Nos ta purba di trata otro segun e Regla di Oro. Claro cu tin biaha cu nos ta rabia cu otro, pero nos ta haci nos best pa trata otro manera nos lo kier ser trata, esta, cu respet y dignidad.”

16. Kico un pareha casa no mester haci nunca cu otro?

¹⁶ No ta bon pa nos papia cu otro hende tocante e defectonan di nos casa ni keda keha tocante e cosnan di nos casa cu nos no gusta; no haci esey ni sikiera den wega. Corda cu matrimonio no ta un competencia pa mira ken ta mas fuerte, ken por grita mas duro ni ken por bisa e cosnan cu ta causa mas dolor. Claro cu tin biaha nos casa por haci algo cu ta irita nos, ya cu nos tur ta imperfecto. Pero esey no ta duna nos e derecho di haci bofon di dje, brongos’e ni bis’e cosnan pa hacie dolor of, pio ainda, push’e of dal e.—Lesa Proverbionan 17:27; 31:26.

17. Con un esposo por aplica e Regla di Oro?

¹⁷ Den algun cultura un esposo mester maltrata su casa pa nan consider’e un homber, pero Bijbel ta bisa bon cla: “Esun cu no ta rabia lihe ta mihor cu e poderoso, y esun cu ta goberna su spirito ta mihor cu esun cu ta captura un stad.” (Prov. 16:32) Un persona mester tin hopi forsa moral p’e “goberna su spirito”, esta, p’e domina su mes. Si bo tin e forsa ey, bo ta imitando Hesucristo, e homber di mas importante cu a yega di biba riba Tera. Un esposo cu ta maltrata su casa cu palabra of cu ta dal e no ta demostra cu e ta echt un homber. Y ta mas cu claro cu lo e perde su relacion cu Jehova. Salmista David, kende tabata un homber fuerte y cu curashi, a bisa: “Rabia, ma no haci pica; medita den bo curason riba bo cama y keda keto.”—Sal. 4:4.

18. Dicon ta asina importante pa sigui cultiva amor?

¹⁸ Lesa 1 Corintionan 13:4 pa 7. Amor ta e cualidad di mas importante den un matrimonio. “Bisti tierno compasion, bondad, humildad, suavidad y pasenshi. Pero, ademas di tur e cosnan aki, bisti amor, pasobra e ta e laso perfecto di union.” (Col. 3:12, 14) Nos tur mester imita e amor di sacrificio propio cu Hesus a demostra. E tipo di amor ey ta manera cement cu ta pega e blokinan cu ta wordo uza pa traha un matrimonio solido y fuerte. Ora tin amor, e matrimonio por bay bon a pesar di cualkier problema, sea ta defectonan di personalidad, maleza grave, problema cu placa of friccionnan cu por surgi cu famianan di bo casa.

19, 20. (a) Con parehanan por edifica un matrimonio fuerte y feliz? (b) Kico nos lo analisa den e siguiente articulo?

¹⁹ Pues, pa boso tin un bon matrimonio, boso mester stima otro hopi, keda fiel na otro y realmente haci esfuerso pa boso matrimonio tin exito. En bes di divorcia of separa asina cu surgi un problema, e pareha mester ta dicidido pa lucha pa mehora nan relacion y hala mas cerca otro y no djis keda soporta otro. Parehanan casa cu ta stima otro y ta stima Jehova ta resolve nan problemanan cu amor, pasobra “amor no ta caba nunca.”—1 Cor. 13:8; Mat. 19:5, 6; Heb. 13:4.

²⁰ Den e “temponan critico” aki cu nos ta biba aden ta masha dificil pa edifica un matrimonio fuerte y feliz. (2 Tim. 3:1) Pero cu Jehova su yudansa, esey ta posibel. Asina mes, parehanan tin cu lucha contra un problema mas: e presion di un mundo obsesiona cu sex. Den e siguiente articulo nos lo analisa con esposo y esposa por proteha nan matrimonio contra inmoralidad.