1, 2. Ken por beneficia di Cantica di Salomon, y dicon? (Wak e prome plachi.)

E BRUID cu e bruidegom tabata blo wak otro y smile. Tur hende por a mira cu nan tabata locamente enamora. E ruman homber cu a caba di duna e discurso di casamento a wak cu cuanto ternura nan tabata tene man y a puntra su mes: Segun tempo ta pasa, nan amor pa otro lo bira cada dia mas profundo? Of pocopoco lo e fria? Ora un homber y un muher ta stima otro di berdad, esey ta algo masha bunita y nan relacion por supera hasta e problemanan di mas dificil. Pero lamentablemente, mas y mas matrimonio ta termina den divorcio. Pues, ta logico cu hopi hende ta puntra nan mes: Amor por dura pa semper?

² For di tempo di Rey Salomon, amor berdadero a bira masha dificil pa haya. Dicon? Salomon a splica: “Mi a haya un homber [recto] entre mil, ma entre tur esakinan mi no a haya un muher. Mira, esaki so mi a haya: Dios a traha hende recto, ma nan a busca hopi plan di maldad.” (Ecl. 7:26-29) E normanan moral di e Israelitanan a bay asina atras cu tabata masha dificil pa Rey Salomon haya un homber of un muher cu tabatin un moralidad halto. Pa gran parti esaki tabata debi na e mal influencia di muhernan stranhero cu tabata adora Baal. * Pero un poema cu e Rey a skirbi un 20 aña prome, Cantica di Salomon, ta mustra cu amor berdadero  entre un homber y un muher ta posibel. E poema ta describi con e amor ey ta y con nos por demostr’e. Tur sirbidor di Jehova, sea casa of soltero, por siña hopi for di e buki di Bijbel aki.

3. Dicon un homber y un muher por stima otro pa semper?

³ Lesa Cantica di Salomon 8:6. Dicon Salomon ta describi amor berdadero como “e vlam di SEÑOR [of, “vlam di Jah”, NW]”? Pasobra e cualidad di mas sobresaliente di Jehova ta amor, y ora el a crea hende den su imagen, el a duna nan e capacidad di imita su amor. (Gen. 1:26, 27) Despues cu Jehova a crea e prome homber, Adam, el a dun’e un bunita casa. Ora Adam a mira Eva pa prome biaha, el a sintie asina feliz cu el a expresa su sintimentonan p’e cu palabranan poetico. Y sin duda, Eva tambe a sinti un laso fuerte cu su esposo, ya cu ta for di Adam Jehova a cre’ele. (Gen. 2:21-23) Pues, como cu ta Jehova a duna hende e capacidad pa stima, ta posibel pa un homber y un muher stima otro pa semper.

4, 5. Conta brevemente e historia di Cantica di Salomon.

⁴ Cantica di Salomon ta describi na un manera masha bunita e amor cu un homber y un muher por tin pa otro. E ta un historia den forma di cantica, manera e canticanan di opera. E ta conta e historia di amor entre un mucha muher di cunucu di e pueblito di Sunem (of Sulem) y un wardador di carne. E mucha muher tabata traha den e cunucunan di wendruif di su ruman hombernan, cerca di e luga caminda Rey Salomon cu su soldaatnan tabata campa. Un dia, Salomon a mira e mucha muher y a keda encanta cu su beyesa. El a manda su soldaatnan trec’e den e campamento. Pero for di cuminsamento tabata bisto cu e mucha muher tabata enamora di un wardador di carne. Segun cu Salomon tabata purba di gana su amor cu palabranan bunita y regalo, e, na su turno, tabata expresa libremente kico e tabata sinti: E tabata kier ta cerca di su wardador di carne. (Cant. 1:4-14) E wardador tabata busc’e y a logra drenta e campamento. Ora el a haya e mucha muher, nan dos a expresa nan amor pa otro cu palabranan masha bunita.—Cant. 1:15-17.

⁵ Ora Salomon tabata bay Jerusalem bek, el a bay cu e mucha muher, pero e wardador di carne a sigui tras di su mucha muher. (Cant. 4:1-5, 8, 9) Ni maske kico Salomon a bisa of haci, e no por a gana e amor cu e mucha muher tabata sinti pa e wardador di carne. (Cant. 6:4-7; 7:1-10) Finalmente, e Rey a laga e mucha muher bay su cas bek. Na final di e cantica, e mucha muher Sulamita ta yama su wardador cu e ta stima pa core bin cerca dje lihe, ‘manera un bina jong.’—Cant. 8:14.

6. Dicon no ta facil pa sa ta ken ta papia den Salomon su cantica?

⁶ E cantica cu Salomon a skirbi ta un cantica bunita y yen di nificacion. Pa e motibo ey e ta ser yama “Cantica di Canticanan.” (Cant. 1:1) Pero den e cantica, no ta facil pa identifica e personahenan cu tabata papia. Kisas Salomon tabata kier pa e beyesa poetico di e cantica resalta, y pesey e no a agrega tur e detayenan ey. Aunke e cantica no ta menciona nomber di esun cu ta na palabra, toch ta posibel pa haya sa ta ken ta papia a base di loke ta ser bisa. *

7, 8. Con e wardador y e mucha muher a expresa nan cariño pa otro? Duna algun ehempel

⁷ Den Cantica di Salomon, e mucha muher cu e wardador di carne ta bisa otro  palabranan bunita pa expresa nan amor. Algun di e “expresionnan di cariño” aki por zona straño pa nos, ya cu nan a ser skirbi mas cu 3.000 aña pasa den e cultura di Medio Oriente. (Cant. 1:2) Pero maske nan cultura tabata diferente for di esun di nos, no ta dificil pa compronde loke e pareha tabata sinti pa otro. Por ehempel, como cu e wardador a gusta e mucha muher su wowonan asina hopi, el a compara nan cu wowo di paloma. (Cant. 1:15) Pa e mucha muher, e wowonan scur di e mucha homber, rondona pa e blanco di wowo, tabata mes bunita cu un paloma cu ta baña den lechi.—Lesa Cantica di Salomon 5:12.

⁸ Pero no ta tur nan expresionnan di cariño tabatin di haber cu bunitesa fisico. Por ehempel, e wardador tabata gusta e manera amabel cu e mucha muher tabata papia cu otro hende. (Lesa Cantica di Salomon 4:7, 11.) El a bisa e mucha muher: “Bo lipnan, mi bruid, ta gotia miel; miel y lechi ta bou di bo lenga.” P’e, e palabranan di e mucha muher tabata mes agradabel y dushi cu lechi y miel. Pues, ora e wardador a bisa e mucha muher “tur kos na bo kurpa ta bunita, ... bo no tin defekto [BPK]”, e no tabata referi solamente na su beyesa fisico sino tambe na su bon cualidadnan.

9. (a) Ki clase di amor mester tin den un matrimonio? (b) Dicon ta importante pa pareha casa expresa nan amor pa otro cu palabra?

⁹ Matrimonio mester ta mas cu djis un acuerdo formal of un contract sin amor of cariño. Amor mester ta e cualidad mas importante den matrimonionan cristian. Pero ki clase di amor mester tin den un matrimonio? Ta e amor basa riba principio biblico cu nos mester tin pa tur hende? (1 Juan 4:8) Of ta e cariño cu nos ta sinti pa nos famia? Ta e cariño special cu tin entre bon amigo? (Juan 11:3) Of ta amor romantico? (Prov. 5:15-20) Eigenlijk, amor berdadero ta encera cu tanto e esposo como e esposa mester tin tur e tipo di sintimentonan ey pa otro. Y ta importante pa nan tur dos demostra nan amor pa otro den tur loke nan ta bisa y haci pasobra esey ta yuda nan sinti nan mas feliz y sigur. Nan no mester permiti pa e quehaceres di tur dia stroba nan di expresa nan amor pa otro. Esaki ta conta tambe pa culturanan caminda nan ta regla casamento di antemano. Sa sosode den casonan asina cu e pareha casi no a haya chens di conoce otro prome cu e dia di casamento. Pues, segun cu nan ta siña conoce otro y nan amor ta crece, nan tin cu expresa cu palabra e amor cu nan ta sinti pa otro. Esaki lo haci nan matrimonio mas fuerte y lo hala nan mas cerca di otro.

10. Ki otro bon efecto expresionnan di cariño por tin riba un matrimonio?

¹⁰ Tin un bon motibo mas pa parehanan casa expresa nan cariño na otro. Den e cantica, Rey Salomon a ofrece e mucha muher Sulamita ‘adornonan di oro, cu cuenta di plata.’ Tambe Salomon a bis’e tur tipo di piropo: cu e ta “mes bunita cu luna yen, mes puro cu solo.” (Cant. 1:9-11; 6:10) Pero e mucha muher no a haci caso di dje y a keda fiel na su wardador stima, aunke nan dos no por tabata hunto. Kico a yud’e cu e no a cay pa Salomon? (Lesa Cantica di Salomon 1:2, 3. *) Wel, esey tabata e grato recuerdo di e “expresionnan di cariño” di su wardador. Pa e mucha muher, su palabranan di amor tabata “mihor cu biña” cu ta haci curason di hende contento. Y, e nomber di e mucha homber a consol’e manera “azeta di holo dushi” riba su cabes. (Sal. 23:5; 104:15) Pues, ta masha importante pa esposo y esposa expresa nan cariño pa otro cu frecuencia, ya cu esey ta yuda nan amor crece. Anto  e dushi recuerdonan ey por fortalece nan amor pa otro.

11. Kico cristiannan soltero por siña for di loke e Sulamita a bisa e muhernan den e palacio di Salomon?

¹¹ Cristiannan soltero cu ta busca un casa por siña algun les for di Cantica di Salomon. E Sulamita no tabata sinti nada pa Rey Salomon. Pesey el a bisa e muhernan den e palacio di Salomon firmemente: “No lanta mi amor, no strob’é, ku n’ ta te ora e mes ke.” (Cant. 2:7; 3:5, BPK, nota) Dicon e no tabata kier pa nan lanta su amor? Pasobra no ta corecto pa cuminsa un relacion romantico cu ken cu ta. Pues, ta sabi pa un cristian cu ta desea di casa warda cu pasenshi te ora cu e topa un persona cu di berdad e por stima.

12. Dicon e Sulamita tabata stima e wardador di carne?

¹² Dicon e Sulamita tabata stima e wardador di carne? Wel, ta berdad cu e mucha homber tabata nechi, manera e Sulamita a describi. E mucha muher a bisa cu su mannan tabata fuerte manera ‘bara di oro’ y su pianan tabata fuerte manera ‘pilar di alabaster.’ Pero e tabata mas cu simplemente un homber fuerte y nechi. E mucha muher tabata sa cu e wardador tabata un persona spiritual cu bon cualidad. Ta pesey e mucha homber tabata special den su bista, “manera un palo di appel meymey di e palonan di mondi cera”, si, stima “meymey di e yoncumannan.”—Cant. 2:3, 9; 5:14, 15.

13. Dicon e wardador di carne tabata stima e Sulamita?

¹³ Anto dicon e wardador di carne tabata stima e Sulamita? No tin duda cu e Sulamita tabata masha bunita mes. El a capta hasta e atencion di Rey Salomon, cu e tempo ey tabatin “sesenta reina y ochenta concubina, y mucha muhernan, mucho hopi pa conta.” Pero ta djis pa su bunitesa e wardador di carne tabata stim’e? No. Por ehempel, e tabata un mucha muher remarcablemente humilde y modesto y a compara su mes cu un simpel “leli di e vayenan”, un flor comun y coriente. E tambe tabata stima Jehova y tabatin bon cualidad. Pesey no ta un sorpresa cu den bista di e mucha homber e tabata unico, “manera un leli meymey di sumpiña.”—Cant. 2:1, 2; 6:8.

14. Kico cristiannan soltero cu kier casa por siña for di e wardador di carne y e Sulamita?

¹⁴ Bijbel ta bisa bon cla cu cristiannan mester casa “den Señor.” (1 Cor. 7:39) Esaki ta nifica cu un persona soltero cu kier casa lo  no cuminsa un relacion romantico cu un hende cu no ta comparti su fe; mas bien lo e casa solamente cu un persona cu ta batisa y cu ta stima Jehova. Dicon esaki ta importante pa un bon matrimonio? Wel, tur pareha casa ta haya nan confronta cu e presionnan di bida diario. Pero si nan tur dos tin un bon relacion cu Jehova, nan por tin paz y felicidad den nan matrimonio. Pues, si bo ta desea di casa, haci mescos cu e wardador di carne y e Sulamita: Busca un persona cu tin bon cualidad y cu realmente ta stima Jehova.

15. Con parehanan cu ta enamora por imita e ehempel di e Sulamita?

¹⁵ Lesa Cantica di Salomon 4:12. Dicon e wardador di carne a bisa cu e Sulamita, kende tabata su mucha muher, tabata manera “un hofi cera”? Un hofi cera cu muraya of waya no ta habri pa publico. Normalmente, ta via un porta cu mayoria di biaha ta na candal so bo por drenta. E Sulamita tabata manera e hofi ey pasobra su amor y cariño tabata disponibel solamente pa su futuro esposo: e wardador di carne. E tabatin pensa di casa cu e mucha homber ey, y pesey e no a haci caso di Rey Salomon. Anto e no kier a cambia di idea tampoco. El a demostra cu e tabata manera “un muraya” y no manera “un porta” cu ta habri facilmente. (Cant. 8:8-10) Di mes manera, un pareha cristian cu tin pensa di casa mester ta leal na otro y no duna atencion romantico na niun otro persona; nan amor y cariño ta reserva exclusivamente pa nan futuro casa.

16. Kico Cantica di Salomon ta siña nos tocante namoramento?

¹⁶ Un dia, e wardador di carne a pidi e Sulamita pa bay dal un keiro cu ne, pero e ruman hombernan di e mucha muher no a lag’e bay. Na luga di esey, nan a mand’e bay cuida e cunucunan di wendruif. Dicon? Acaso nan no tabata confia nan ruman muher? Acaso nan a pensa cu nan ruman muher lo kier a haci algo inmoral cu e wardador? No, simplemente nan kier a proteha nan ruman muher y a tuma precaucion pa e no haya su mes den un situacion cu lo por a pon’e cay den tentacion. (Cant. 1:6; 2:10-15) Ki les cristiannan soltero por saca for di esaki? Nan mester tuma e precaucionnan necesario pa tene nan namoramento limpi. Esaki ta encera cu nan lo evita situacionnan cu por hiba na inmoralidad sexual, manera bay luganan isola nan dos so. Y aunke no tin nada malo den expresa cariño pa otro, nan mester percura pa esey ta na un manera apropia.

17, 18. Kico abo a siña for di Cantica di Salomon?

¹⁷ Jehova a establece matrimonio pa e dura pa semper, y e tabata kier pa e homber y e muher stima otro. Normalmente, ora un pareha caba di casa, nan ta stima otro hopi. Pero pa nan matrimonio dura, nan mester haci esfuerso pa nan amor no fria. E mester ta manera un vlam di candela cu no ta paga nunca.—Mar. 10:6-9.

¹⁸ Si bo kier casa, busca un persona cu di berdad bo por stima. Ora bo hay’e, traha hunto pa boso amor pa otro no fria y pa e keda manera un vlam cu no ta paga nunca. Manera nos a siña for di Cantica di Salomon, amor berdadero, esta, amor cu ta dura pa semper, ta existi. E ta ‘e vlam di Jah.’—Cant. 8:6.