DOS aña prome cu e incidente ey a tuma luga, ami y Evelyn Trabert, kende tabata mi compañera den e trabou di misionero, a asisti na e di cuater klas di e Scol Biblico di Galaad di Watchtower. E tempo ey, e scol tabata situa cerca di Ithaca, New York. Despues cu nos a gradua, nos a haya asignacion pa sirbi na Santa Ana. Pero prome cu mi sigui conta tocante mi sirbishi di misionero di casi 29 aña, laga mi splica dicon mi a scoge e trabou ey.

Mi a nace na aña 1923 y tabata biba hunto cu mi mayornan, John y Eva Olson, na Spokane, Washington, Merca. Mi mayornan tabata luterano, pero nan no tabata kere den e doctrina di fierno di candela cu nan iglesia tabata siña hende. Nan tabatin dificultad pa kere cu un Dios di amor ta castiga hende di e manera ey. (1 Juan 4:8) Mi tata tabata traha na un panaderia. Y un anochi, un colega di dje a sigur’e cu Bijbel no ta siña cu fierno ta un luga di tormento. Poco tempo despues, mi mayornan a cuminsa studia Bijbel cu testigonan di Jehova, y nan a haya sa kico Bijbel ta siña realmente tocante bida despues di morto.

Aunke e tempo ey mi tabatin solamente nuebe aña di edad, toch mi ta corda te awe con entusiasma  mi mayornan tabata papia tocante e berdadnan biblico cu nan tabata siña. Nan a bira hasta mas entusiasma ainda ora nan a haya sa cu e nomber di e Dios berdadero ta Jehova y cu e no ta parti di un Trinidad. Y manera spons, mi a cuminsa absorba tur e maraviyoso siñansanan biblico aki segun cu mi tabata siña e berdad ‘cu ta haci hende liber.’ (Juan 8:32) Nunca mi a haya studiamento di Bijbel laf; semper mi tabata gusta analisa e Palabra di Dios. Y aunke mi tabata un persona timido, mi tabata compaña mi mayornan den e trabou di predica. Nan a batisa na 1934, y ami a batisa na 1939, tempo cu mi tabatin 16 aña di edad.

Den zomer di aña 1940, mi mayornan a bende nos cas y nos a muda bay Coeur d’Alene, na Idaho, caminda nos tur tres a cuminsa traha como pionero. Nos tabata huur un apartamento cu tabata situa riba un garashi di drecha auto. Nos tabata tene nos reunionnan di congregacion na e apartamento mes. E tempo ey, no tabatin hopi Salon di Reino; mayoria di congregacion tabata reuni na cas di e rumannan of den salanan cu nan tabata huur.

Na 1941, ami cu mi mayornan a asisti na un asamblea na St. Louis, Missouri. Diadomingo tabata “Dia pa Yiunan”, y tur mucha y hoben entre 5 pa 18 aña di edad tabatin cu sinta te dilanti, enfrente di e plataforma. Na final di su discurso, Ruman Joseph F. Rutherford a dirigi atencion na nos tur cu tabata mucha y hoben. El a bisa: “Muchanan ... boso tur ... cu a bay di acuerdo pa obedece Dios y su Rey: Por fabor, lanta para!” Nos tur a lanta. Despues, Ruman Rutherford a bisa cu un bos fuerte: “Wak e mas cu 15.000 proclamadornan nobo di e Reino!” E momento ey, mi a dicidi cu mi kier ta un pionero pa e resto di mi bida.

Un par di luna despues di e asamblea ey na St. Louis, ami cu mi mayornan a muda bay e parti zuid di California. Eynan, na e stad Oxnard, nos a haya e asignacion pa cuminsa un congregacion. Nos tabata biba den un trailer chikito cu tabatin un cama so. Prome cu esey mi tabatin mi mes camber, pero di e momento ey padilanti mi tabatin cu drecha e mesa di comedor tur anochi pa mi drumi riba dje; esey si tabata un cambio grandi!

Dia 7 di december 1941, un poco prome cu nos a yega California, Japon a bombardia Pearl Harbor na Hawai. E siguiente dia, Merca a drenta Segundo Guera Mundial. Como cu submarinonan Japones tabata patruya e costa di California, autoridadnan a duna ordo pa paga tur luz ora anochi cera; pues tabatin un blackout total. Esey tabata pa evita cu e Japonesnan lo a tira misil riba e pais.

Algun luna despues, na september di aña 1942, nos a asisti na e Asamblea Teocratico di Mundo Nobo na Cleveland, Ohio. Ey, nos a scucha Ruman Nathan H. Knorr duna e discurso “Paz Por Dura?” El a analisa Revelacion capitulo 17, cu ta papia di un “bestia salbahe” cu ‘tabat’ey pero cu awor no t’ey mas y cu pronto lo sali for di abismo.’ (Rev. 17:8, 11) Ruman Knorr a splica cu “e bestia salbahe” tabata e Sociedad di Nacion (Volkenbond), cu a stop di funciona na 1939. Bijbel a profetisa cu e Sociedad di Nacion lo a ser reemplasa y cu esey lo a hiba na un periodo di supuesto paz. Y esey ta loke a sosode despues cu Segundo Guera Mundial a termina na aña 1945. E “bestia” a bolbe aparece, pero e biaha aki como Nacionnan Uni. Di e tempo ey padilanti, testigonan di Jehova a cuminsa predica rond mundo, y esaki a hiba na un aumento grandi.

 E profecia ey a yuda mi mira cuanto trabou tabatin pa haci. Pesey, ora nan a anuncia cu e Scol di Galaad lo a cuminsa e siguiente aña, mi a haya gana di bira misionero. Na 1943, mi a haya e asignacion pa bay traha como pionero na Portland, Oregon. E tempo ey, nos tabata uza tocadisco pa predica na e hendenan. Nos tabata laga nan scucha un sermon y despues nos tabata ofrece nan literatura biblico tocante e Reino di Dios. Henter e aña ey, mi no por a stop di pensa riba sirbishi di misionero.

Pesey, mi a bira masha contento na aña 1944 ora ami cu mi amiga stima Evelyn Trabert a haya invitacion pa bay Galaad. Cinco luna largo, nos instructornan a siña nos con pa disfruta di nos estudio di Bijbel. Nan humildad a impresiona nos masha hopi mes. E mesun rumannan aki tabata sirbi de bes en cuando como waiter ora nos tabata come. Nos a gradua dia 22 di januari 1945.

Ami y Evelyn, hunto cu Leo y Esther Mahan, a yega El Salvador, caminda nos a ser asigna, na juni 1946. Nos a haya e cunucunan “cla pa cosecha.” (Juan 4:35) Un siman prome cu e incidente cu mi a menciona na comienso, nos tabatin nos prome asamblea di circuito na Santa Ana. Nos a invita tur hende cu nos por a haya pa e discurso publico, y nos tabata sumamente contento cu casi 500 hende a asisti na e asamblea. Esaki a pone e lidernan religioso, cu nos a menciona na comienso, bira asina furioso cu nan a bin purba di intimida nos pa nos bandona e pueblo. Pero nan no a logra. Al contrario, esey a haci nos aun mas determina pa keda y yuda hende sincero. Hopi hende tabatin hamber pa e berdad; pastoornan tabata spierta hende pa no lesa Bijbel y masha poco hende por a cumpra un Bijbel. Pero e hendenan tabata aprecia e esfuerso cu nos tabata haci pa siña Spaño y pa papia cu nan tocante e Dios berdadero y tocante su promesa di haci Tera un paradijs.

Rosa Ascencio tabata un di mi prome studiantenan na El Salvador. Despues cu el a cuminsa studia Bijbel, el a separa di e homber cu e tabata biba cu ne. Cu tempo, e homber tambe a cuminsa studia Bijbel. Nan a casa, batisa y bira testigo di Jehova, y nan a bira Testigonan masha celoso. Rosa tabata e prome persona na Santa Ana cu a bira pionero. *

Rosa tabata doño di un tienda chikito. Ora e tabatin cu bay sirbishi, e tabata cera su tienda y confia cu Jehova lo percura pa su necesidadnan. Ora e regresa despues di algun ora y habri su tienda, hopi cliente tabata bin cumpra cos. El a experencia personalmente e berdad registra na Mateo 6:33 y a keda fiel te na su morto.

Un biaha, e pastoor den nos area a bishita e meneer cu tabata huur ami y e otro seis misionero un cas y a menas’e cu si e no stop di huur nos su cas, nan lo a expulsa e cu su esposa for di iglesia. E doño di e cas, kende tabata un homber di negoshi bon conoci, no a haci caso di e pastoor pasobra pa hopi  tempo caba e tabata fada di nan conducta. El a hasta bisa e pastoor cu e no ta worry si nan expuls’e for di iglesia. El a sigura nos cu nos por a keda biba cuanto tempo cu nos kier den e cas.

Den e stad capital, San Salvador, un otro misionero tabata studia Bijbel cu esposa di un ingeniero cu yama Baltasar Perla. Baltasar tin un bon curason, pero e hipocresia di e lidernan religioso a pon’e perde fe den Dios. Ora nos tabata bay traha nos sucursal, Baltasar a ofrece pa diseña y construi e facilidad sin cobra nada pa su trabou maske e no tabata Testigo e tempo ey.

Despues di a traha cu e rumannan riba e proyecto di construccion, Baltasar tabata convenci cu el a haya e religion berdadero. El a batisa dia 22 di juli 1955, y un poco tempo despues su esposa, Paulina, tambe a batisa. E dos yiunan cu nan tin tambe ta sirbiendo Jehova fielmente. E yiu homber, Baltasar, Jr., tin 49 aña ta sirbi na Betel di Brooklyn, unda e ta sostene nos predicacion mundial. Actualmente, e ta miembro di e Comite di Sucursal na Merca. *

Ora nos a cuminsa organisa congreso na San Salvador, Ruman Perla a yuda nos haya un sala di gimnasio grandi pa nos por a reuni. Na principio, nos tabatin mester di un par di seccion di stoel so, pero cada aña, cu Jehova su bendicion, nos a sigui aumenta te cu e sala di gimnasio a bira chikito pa nos. Na e ocasionnan gososo ey, mi tabata topa cu personanan cu mi a yega di studia Bijbel cu ne. Y algun di mi ex-studiantenan tabata laga mi cera conoci cu, na moda di papia, mi nietonan, esta, personanan cu nan a studia cu ne y cu a caba di batisa. Bo por imagina bo con mi tabata sinti mi na momentonan asina?

Na un asamblea, un ruman homber a acerca mi y bisa mi cu e kier a confesa algo. El a haci mi curioso, pasobra mi no a reconoc’e. El a bisa mi: “Ami tabata un di e mucha hombernan cu a tira boso cu piedra na Santa Ana.” Esta contento mi ta cu awor e tambe ta un sirbidor di Jehova! E combersacion ey a convence mi mas ainda cu sirbishi di tempo completo ta e mihor carera cu un hende por scoge den bida.

Mi a haci e trabou di misionero pa casi 29 aña na El Salvador. Prome, mi a sirbi na Santa Ana, despues na Sonsonate, despues na Santa Tecla y finalmente na San Salvador. Pero na 1975, despues di haci hopi oracion, mi a dicidi di stop cu e trabou di misionero y bolbe Spokane. Mi mayornan, kendenan tabata sirbi Jehova fielmente, a bira grandi y tabatin mester di mi yudansa.

Despues cu mi tata a muri na 1979, mi a sigui cuida mi mama, kende dia pa dia tabata bira mas debil. El a muri cu 94 aña di edad, ocho aña despues di mi tata. Durante e periodo dificil ey, mi tabata fisicamente y emocionalmente agota. Stress a pone cu mi a haya un maleza doloroso cu yama colibri (herpes zoster). Pero cu oracion y yudansa di Jehova, mi a logra surpasa e prueba ey. Ta comosifuera Jehova a bisa mi: ‘Te na bo añanan di cabey blanco lo mi carga bo y libra bo.’—Isa. 46:4.

Na 1990, mi a muda bay Omak, Washington, caminda mi por a predica atrobe na hende di habla Spaño. Esey a laga mi sinti mi util atrobe, y varios di mi studiantenan di Bijbel a batisa. Pero cu tempo, mi no tabatin e forsa pa mantene mi cas na Omak mas. Pesey, na november di aña 2007, mi a muda bay un apartamento den e pueblo Chelan, Washington. Akinan, e congregacion Spaño ta percura bon pa mi. Mi ta e unico testigo di edad den e congregacion, pesey e rumannan a adopta mi como nan “abuela.” Mi ta masha contento cu loke nan ta haci pa mi.

Pa mi por a sirbi Jehova “sin distraccion”, mi a scoge pa no casa ni haya yiu. (1 Cor. 7:34, 35) Pero mi tin masha hopi yiu spiritual. Hende no por tin tur cos den e bida aki. Pesey, mi ta enfoca riba loke ta mas importante: sirbishi na Jehova di henter mi curason. Den e mundo nobo lo mi tin tur tempo pa disfruta di otro actividad saludabel. Mi texto preferi ta Salmo 145:16, cu ta sigura nos cu Jehova lo “satisface e deseo di tur ser bibo.”

Aworaki mi tin 91 aña di edad, y ainda mi salud ta basta bon. Pues, mi ta sigui traha pionero. Sirbishi di pionero ta laga mi sinti mi jong y ta duna mi bida proposito. Tempo cu mi a yega El Salvador pa prome biaha, e trabou di predica a caba di cuminsa. Awe, a pesar di oposicion fuerte di Satanas, tin mas cu 39.000 publicador den e pais ey. Esaki sigur a haci mi fe mas fuerte. No tin duda, Jehova ta sostene su pueblo!