1, 2. Kico e Reino di Dios lo haci, y dicon nos por tin sigur cu e Reino ey lo bin?

NA AÑA 31, riba un sero cerca di Capernaum, Hesucristo a siña su discipelnan pa pidi den oracion: “Laga bo Reino bin.” (Mat. 6:10) Awe, hopi hende ta duda cu e Reino ey lo bin. Pero nos si tin sigur cu Jehova lo contesta nos oracion sincero pa su Reino bin.

² Jehova lo uza e Reino pa uni su famia den cielo y riba tera. E proposito aki di Dios lo cumpli sigur. (Isa. 55:10, 11) E sucesonan emocionante di e ultimo 100 añanan ta duna prueba cu Jehova a bira Rey caba y cu e ta haciendo cosnan maraviyoso pa miyones di su sirbidornan. (Zac. 14:9; Rev. 15:3) Pues, no ta ora e Reino di Dios bin, manera Hesus a siña nos pidi p’e den oracion, Jehova ta bira Rey. Ta trata aki di dos suceso diferente. Kico ta e diferencia entre e sucesonan aki, y ki efecto cada un tin riba nos bida?

3. (a) Na ki tempo Hesus a keda corona como Rey, y na unda? (b) Con lo bo proba un hende cu Hesus a cuminsa goberna na aña 1914? (Wak e nota.)

³ Rond di fin di siglo 19, un profecia cu Daniel a skirbi mas cu 2.500 aña prome a cuminsa bira mas cla pa e sirbidornan di Dios. Segun e profecia, “den e dianan di e reynan ey e Dios di cielo lo lanta un reino cu nunca lo no wordo destrui.” (Dan. 2:44) Pa varios decada, e Studiantenan di Bijbel a  proclama cu aña 1914 lo a bira un aña masha importante. Hopi hende den e tempo ey tabata optimista tocante futuro. Un escritor a declara: “E mundo di 1914 tabata yen di speransa y promesa.” Pero mas laat den e aña ey, Prome Guera Mundial a cuminsa y profecia di Bijbel a cumpli. Despues di esey, cosnan manera hamber, temblor, pest y tambe cumplimento di otro profecianan di Bijbel a proba definitivamente cu Hesucristo a cuminsa goberna den cielo como Rey di e Reino di Dios na 1914. * Pues, Jehova a bira Rey den un otro sentido ora el a corona su Yiu como e Rey Mesianico.

4. Kico tabata e prome cos cu Hesus a haci ora el a bira Rey, y kico el a haci despues di esey?

⁴ E prome cos cu Dios su Rey nobo a haci tabata bringa contra Satanas, e enemigo principal di su Tata. Hesus cu su angelnan a saca Diabel cu su demoñonan for di cielo. Esaki a causa gran alegria den cielo. Pero riba tera esaki a causa un tempo di calamidad nunca bisto. (Lesa Revelacion 12:7-9, 12.) Despues di esey, e Rey a dirigi su atencion na su siguidornan riba tera pa refina, educa y organisa nan pa haci e boluntad di Dios. Laga nos ban wak con e manera positivo cu nan a reacciona riba e tres accionnan aki di e gobernacion di e Reino ta un bon ehempel pa nos awe.

5. Ki purificacion a tuma luga entre 1914 y e prome parti di 1919?

⁵ Despues cu Hesus a elimina e mal influencia di Satanas cu su demoñonan for di den cielo, Jehova a dun’e instruccion pa inspecciona y refina e condicion spiritual di su siguidornan riba tera. Profeta Malakias a describi esaki como un purificacion spiritual. (Mal. 3:1-3) Historia ta mustra cu e purificacion aki a tuma luga entre 1914 y e prome parti di 1919. * Si nos kier forma parti di e famia universal di Jehova, nos mester ta limpi, of santo. (1 Ped. 1:15, 16) Nos adoracion no mester ta contamina cu nada di religion falso ni di politica.

6. Ken ta percura pa nos haya cuminda spiritual, y dicon e cuminda aki ta asina importante?

⁶ Siguientemente, Hesus a uza su autoridad como Rey pa nombra un “esclavo fiel y prudente.” E esclavo aki lo a percura bon cuminda spiritual regularmente pa tur esnan cu ta parti di e “un tou” bou di cuido di Hesus. (Mat. 24:45-47; Juan 10:16) Desde 1919, e esclavo fiel y prudente ey a cumpli fielmente cu e responsabilidad importante di alimenta e “sirbidornan di cas.” E cuminda spiritual na abundancia cu nan ta duna nos ta nutri nos bon pa asina nos por crece den fe. Tambe e ta haci nos mas determina pa keda limpi, tanto den sentido spiritual, moral, mental como fisico. Ademas, e cuminda spiritual aki ta educa nos y ta prepara nos pa participa plenamente den e trabou di mas importante cu ta tumando luga riba tera awe: e trabou di predica. Abo ta probecha plenamente di e cuminda spiritual aki?

7. Ki obra importante Hesus a cuminsa cu ne ora e tabata riba tera, y te na ki tempo esey lo a sigui?

⁷ Ora Hesus a cuminsa cu su sirbishi riba tera, el a anuncia: “Mi tin cu declara e bon noticia di e Reino di Dios na e otro stadnan tambe, pasobra ta pa esaki Dios a manda mi.” (Luc. 4:43) Durante tres aña y mei, e sirbishi aki tabata e obra di mas importante den e bida di Hesus. El a instrui su discipelnan: “Segun cu boso ta bay, predica y bisa:  ‘E Reino di cielo a yega cerca.’” (Mat. 10:7) Despues di su resureccion, el a profetisa cu su siguidornan lo plama e mensahe aki “te na e parti mas leu di tera.” (Echo. 1:8) Y el a priminti nan cu e mes lo apoya e obra importante aki te na fin di e sistema aki.—Mat. 28:19, 20.

8. Con e Rey a stimula su siguidornan riba tera pa predica?

⁸ Di aña 1919 en adelante, e ‘bon noticia di e Reino’ a haya mas nificacion. (Mat. 24:14) E Rey tabata goberna den cielo, y el a reuni un grupo chikito di siguidor purifica riba tera. E grupo aki cu entusiasmo a obedece Hesus su mandato: Predica den henter e tera e bon noticia cu e Reino di Dios ta gobernando den cielo! (Echo. 10:42) Por ehempel, casi 20.000 hende cu tabata apoya e Reino a asisti na un congreso internacional na Cedar Point (Ohio, Merca) na september 1922. Nos por imagina con emociona nan tabata ora cu Ruman Rutherford a duna e discurso “E Reino” y a declara: “Tende! E Rey ta reina! Boso ta su agentenan di publicidad. Pesey, anuncia, anuncia, anuncia e Rey y su reino.” E siguiente dia, 2.000 delegado a participa den un dia special di predicacion. Algun di nan a bishita casnan cu tabata mas cu 70 kilometer leu for di e luga di congreso. Un ruman homber a bisa: “Hamas lo mi lubida e yamada pa anuncia e Reino ni e celo di e multitud cu tabatin presente!” Y e no tabata e unico cu a sinti asina.

9, 10. (a) Kico e esclavo fiel a haci pa entrena proclamadornan di Reino? (b) Con abo a beneficia personalmente di e entrenamento aki?

⁹ Rond di aña 1922, tabatin mas cu 17.000 proclamador di Reino activo den 58 pais rond mundo. Pero nan tabatin mester di entrenamento. Den e prome siglo, e futuro Rey a duna su discipelnan instruccion bon cla tocante kico nan mester a predica, na unda y con. (Mat. 10:5-7; Luc. 9:1-6; 10:1-11) Awe ta mescos. Hesus ta percura pa tur hende cu ta participa den e trabou di predica e Reino haya instruccion y pa nan tin tur loke ta necesario pa predica na un manera efectivo. (2 Tim. 3:17) Hesus ta uza e congregacion cristian pa entrena su siguidornan pa sirbishi. Un manera cu e ta entrena nan ta via di e Scol di Ministerio Teocratico cu ta ser teni den mas cu 111.000 congregacion rond mundo. Haciendo bon uzo di e instruccion aki, awor mas cu shete miyon publicador tin e preparacion necesario pa predica y duna siñansa na un manera cu ta atrae “tur sorto di hende.”—Lesa 1 Corintionan 9:20-23.

¹⁰ Fuera di e Scol di Ministerio Teocratico, e esclavo fiel a establece mas scol biblico pa entrena anciano di congregacion, pionero, ruman homber soltero, pareha casa, miembro di Comite di Sucursal cu nan  esposa, superintendente biahero cu nan esposa y misionero. * E studiantenan di un klas di e Scol Biblico pa Pareha Cristian a expresa nan aprecio pa e scol cu e palabranan: “E entrenamento special cu nos a ricibi a duna nos mas amor pa Jehova y a prepara nos mas mihor ainda pa yuda otro hende.”

11. Con bin e siguidornan di Hesus por a sigui predica a pesar di e atakenan di Satanas?

¹¹ Nos enemigo, Satanas, no a keda sin ripara e gran esfuerso cu e rumannan ta haci pa predica y siña hende e bon noticia. E kier para e trabou di predica y ta uza tanto atake directo como indirecto contra e mensahe di Reino y contra esnan cu ta predic’e. Pero su atakenan ta envano. Jehova a pone su Yiu ‘sinta mucho mas halto cu tur gobierno, autoridad, poder y dominio.’ (Efe. 1:20-22) Como Rey, Hesus ta uza su autoridad pa proteha y guia su discipelnan pa asina haci sigur cu e boluntad di su Tata ta sosode. * Nan ta predica e bon noticia y ta siña miyones di hende cu tin un curason sincero pa adora Jehova. Esta un gran privilegio nos tin di por participa den e obra magnifico aki!

12. Describi algun aspecto di nos organisacion cu Hesus a refina desde cu el a cuminsa goberna.

¹² Desde cu Hesus a cuminsa goberna como Rey na 1914, e ta refinando e manera cu e sirbidornan di Dios ta organisa pa haci e boluntad di su Tata. (Lesa Isaias 60:17.) Na 1919, nan a cuminsa nombra un director di sirbishi den cada congregacion pa dirigi e trabou di predica. Na 1927, e congregacionnan a cuminsa predica regularmente riba diadomingo. Na 1931, sirbidornan di Dios a cuminsa uza e nomber biblico testigonan di Jehova, y esey a motiva nan pa haci mas den e trabou di predica. (Isa. 43:10-12) Na 1938, nan a stop di vota ora di scoge ruman homber pa dirigi e congregacion. Na luga di esey a bin nombramento teocratico, esta, un ruman homber mester cumpli cu cierto rekisito biblico p’e ser nombra. Na 1972, e responsabilidad di supervisa e congregacion a pasa pa un cuerpo di anciano en bes di ta den man di un solo ruman homber. Tur ruman homber cu por a sirbi den e capacidad ey a haya e animacion pa haci esfuerso pa ‘pastorea e tou di Dios cu tabata bou di nan cuido.’ (1 Ped. 5:2) Na 1976, a organisa e Cuerpo Gobernante den seis comite pa supervisa e obra mundial di Reino. Djey padilanti, Hesus a sigui organisa su  siguidornan progresivamente pa nan haci cos na Dios su manera, esta, na e manera teocratico.

13. Loke e Rey Mesianico a logra durante e prome 100 añanan di su reinado tabatin ki efecto riba bo bida?

¹³ Pensa riba tur loke e Rey Mesianico a logra durante e prome 100 añanan di su reinado. El a purifica un grupo di hende pa carga e nomber di Jehova. El a dirigi e predicacion di e bon noticia di Reino den 239 pais y a siña miyones di hende pa adora Jehova. El a uni mas cu shete miyon siguidor fiel, kendenan a pone nan mes disponibel pa haci e boluntad di su Tata. (Sal. 110:3) Jehova a uza e Reino Mesianico pa haci cosnan realmente grandi y maraviyoso. Y tin cosnan mas emocionante ainda na caminda!

14. (a) Kico nos ta pidiendo Dios pa haci ora nos ta resa: “Laga bo Reino bin”? (b) Kico ta nos texto di aña pa 2014, y dicon e texto aki ta na su luga?

¹⁴ Aunke Jehova a corona su Yiu, Hesucristo, como Rey Mesianico na 1914, esaki no tabata e contesta completo riba nos oracion pa “laga bo Reino bin.” (Mat. 6:10) Bijbel a profetisa cu Hesus lo “goberna meymey di [su] enemigonan.” (Sal. 110:2) Gobiernonan humano bou di poder di Satanas ta opone e Reino ainda. Ora nos ta resa pa e Reino di Dios bin, nos ta pidiendo Dios pa e Rey Mesianico—hunto cu e 144.000 reynan cu ta cu ne den cielo—bin pa pone fin na e gobernacion di hende y tambe na e personanan riba tera cu ta opone e Reino. E accion aki lo cumpli cu e palabranan di Daniel 2:44, cu ta bisa cu e Reino di Dios “lo garna y pone un fin na tur e reinonan aki.” Lo e elimina e enemigonan politico di e Reino. (Rev. 6:1, 2; 13:1-18; 19:11-21) E tempo pa esaki sosode ta hopi cerca. Na aña 2014 ta bay haci 100 aña cu Hesus a cuminsa goberna den cielo. Pues, ta na su luga cu nos texto di aña pa 2014 ta Mateo 6:10: “Laga bo Reino bin”!

15, 16. (a) Menciona algun suceso emocionante cu lo tuma luga durante e Reinado di Mil Aña. (b) Kico lo ta e ultimo cos cu Hesus lo haci como Rey Mesianico, y kico esey lo nifica pa Jehova su proposito en conexion cu henter su creacion?

¹⁵ Despues cu e Rey Mesianico caba cu e enemigonan di Dios, lo e benta Satanas cu su demoñonan den abismo pa 1.000 aña. (Rev. 20:1-3) Unabes e mal influencia ey no t’ey mas, e Reino lo cuminsa yuda hende beneficia mesora di e sacrificio di rescate di Hesus y elimina e efectonan di e pica hereda di Adam. E Rey lo resucita miyones di hende cu ta den graf y lo organisa un programa mundial pa siña nan tocante Jehova. (Rev. 20:12, 13) Henter e tera lo bira un paradijs mescos cu Hofi di Eden. Tur hende fiel lo bira perfecto.

¹⁶ Na final di Cristo su Reinado di Mil Aña, e Reino Mesianico lo a cumpli cu su proposito. E ora ey Hesus lo ­entrega e Reino bek na su Tata. (Lesa 1 Corintionan 15:24-28.) Lo no tin mester di un ­mediador mas entre Jehova y su yiunan riba tera. Tur yiu di Dios, tanto den cielo como riba tera, lo ta den union cu nan Tata celestial como parti di su famia universal.

17. Kico bo ta determina pa haci en conexion cu e Reino?

¹⁷ E sucesonan emocionante cu a tuma luga durante e 100 añanan di gobernacion di e Reino ta duna nos e garantia cu Jehova ta esun cu ta na poder y cu su proposito pa e tera lo cumpli. Pues, laga nos sigui sirbie fielmente y anuncia e Rey y su Reino. Nos ta haci esaki cu pleno confianza cu pronto Jehova lo contesta nos oracion sincero: “Laga bo Reino bin”!